भांगरभूंय | प्रतिनिधी
नवी दिल्ली, खबरां संस्था: बांगलादेशांत फाटल्या कांय दिसां सावन चलपी आंदोलनाक लागून शंबरां परस चड नागरिकांक मरण आयलां. ह्या सगळ्या घडामोडींचो आंतरराष्ट्रीय पांवड्यार परिणाम जाला आनी आतां तो वेवसायीक क्षेत्रांतूय दिसपाक लागला. भारत आनी बांगलादेश ह्या दोनूय देशांचो आयात-निर्यात वेपार व्हड आसा. फुडल्या काळांत आंदोलनाचो आनी अराजकतायेचो परिणाम ह्या वेपाराचेर जावपाची शक्यताय आसा.
बांगलादेश आनी भारत ह्या दोनूय देशांतल्या वेवसायाचेर जाल्लो परिणाम फाटल्या कांय दिसां सावन स्पश्टपणान दिसता. एका अहवाला प्रमाण बांगलादेशांतल्या अस्थीर वातावरणाक लागून दर दिसाच्या सुमार १५० कोटी रुपयांच्या वेवसायाचेर वायट परिणाम जाल्लो दिसता. तशेंच जायते वेव्हार पुरायपणान बंद जाल्यात.
ibef.org चे आंकडेवारी प्रमाण बांगलादेश हो भारताचो सगळ्यांत व्हडलो वेपारी भागीदार आनी दुसरो व्हडलो निर्गत भागीदार. २०२३-२४ वित्तीय वर्सा दोनूय देशांचो वेपार १४.२२ अब्ज डॉलर इतलो आशिल्ल्याचो अदमास आसा. आयात-निर्यात तत्वाचेर ह्या दोनूय देशांमदीं जायत्यो वस्तू अदलाबदल जातात.
भारतांतल्यान बांगलादेशांत निर्यात जावपी वस्तू
कापूस, सूत (१.०२ अब्ज डॉलर)
इंधन उत्पादन (८१६ मिलियन डॉलर)
जेवण, धान्य (५५६ मिलियन डॉलर)
सुती कपडे आनी हेर सामान (५४१ मिलियन अमेरिकी डॉलर)
कार्बनयुक्त आनी हेर रसायनां (४३० मिलियन डॉलर)
बांगलादेशांतल्यान भारतांत येवपी वस्तू
आरएमजी कापूस (५१० मिलियन डॉलर)
सुती कपडे, तयार कपडे (१५३ मिलियन डॉलर)
आरएमजी मनीस निर्मित फायबर (१४२ मिलियन डॉलर)
मसाले (१२५ मिलियन डॉलर)
जूट (१०३ मिलियन डॉलर)
फाटल्या कांय वर्सांत भारत आनी बांगलादेश हांचे मदले वेवसायीक संबंद सुदारल्यात. मोदी सरकार भारतांत तिसरे खेपे सत्तेर आयले उपरांत रोखडीच शेख हसीना हांणी २२ जुनाक तांची भेट घेतिल्ली. ह्या वेळार जायत्या करारांचेर निमाणो निर्णय घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
