भांगरभूंय | प्रतिनिधी
हरियाणाच्या मनू भाकर हे 22 वर्सांचे चलयेन नेमबाजींत दोन कांश्यां पदकां जिखलीं आनी विक्रमाचेर विक्रम जाले. आनी पुराय देश खोशेच्या ल्हारांत बुडून गेलो. स्वातंत्र्या उपरांतच्या काळांत एकाच ऑलिंपिकांत भारतांतल्या कोणेच दोन पदकां जिखूंक नाशिल्लीं. ती कामगिरी मनून केली. 10 मिटर अॅर पिस्तूल प्रकारांत आनी मिश्र सांघीक 10 मिटर अॅर पिस्तूल प्रकारांत (सरबज्योत सिंग हाचे वांगडा) ताका कांश्या पदक मेळ्ळां. ताच्या नांवाचेर बरेच विक्रम जाल्यात. फाटल्या 20 वर्सांनी वैयक्तीक सर्तींत आॅलिंपीक निमाणें फेरयेंत पावपी ती पयली नेमबाज. हाचे पयलीं 2004 तल्या ग्रीस ऑलिंपिकांत 10 मिटर अॅर रायफल प्रकारांत सुमा शिरूर हाणें निमाणें फेरयेंत पावल दवरिल्लें. ताका आठवें स्थान मेळिल्लें. म्हणटकच मनू भाकराक खूब- खूब परबीं फावतात. कारण ल्हान पिरायेचेर ताणें 2- 2 पदकां जिखपाचो पराक्रम केला.
29 जुलय मेरेन चीन 6 (वट्ट 14) भांगरा पदकां सयत पयल्या स्थानाचेर, तर जपान 6 (वट्ट 12) भांगरां पदकां सयत दुसऱ्या स्थानार आशिल्लो. तिसरो क्रमांक 5 भांगरा पदकां मेळोवपी येजमान फ्रान्साचो आसा. आमचो भारत 28 व्या स्थानाचेर आसा. अर्थांत आॅलिंपीक जशें – जशें मुखार वता, तसो हे वळेरेंत बदल जातलो. हाॅकी हो भारताचो खेळ. एका काळार तातूंत भारत पयल्या क्रमांकाचेर आशिल्लो. सध्या ताचो जागो क्रिकेटीन घेतला. आशियायी सर्तींत भारत हालींच्या वर्सांनी मुखार आसा, तो बाॅक्सींग, कुस्तींत. मात, आॅलिंपिकांत आमकां खूब मेहनत घेवची पडटा. आतां मेरेनच्या आॅलिंपीक इतिहासांत आमी फक्त 37 पदकां जिखल्यांत. तातूंतलीं 10 भांगरां पदकां, 9 रुप्यांचीं आनी 18 कांश्यां पदकां. हाॅकींत आमी 8 भांगरां पदकां सयत वट्ट 12 पदकां जिखल्यांत. पयलें भांगरा पदक मेळ्ळां तें हाॅकींत, 1928 त.
भारता खातीर पयलें पदक मेळयलें तें कोलकातांत जल्मल्ल्या मूळ ब्रिटीश खेळगडो, अभिनेतो नाॅर्मन प्रितचार्ड हाणें. तें आॅलिंपीक पॅरिसांतूच जाल्लें, 1900 त. ताका 200 मिटर धांवप आनी हर्डल ह्या प्रकारांनी मेळून दोन रुप्यां पदकां मेळिल्लीं. फक्त भारतीय न्हय, तर पदक मेळोवपी तो पयलो आशियायी. एकाच आॅलिंपिकांत दोन पदकां मेळोवपी तो पयलो भारतीय. दुसरें मनू. दोनूय सर्ती पॅरिसांत, हो योगायोग. उपरांत खाशाबा जाधव (सातारा- महाराष्ट्र) हाणें 1952 च्या हेलसिंकी आॅलिंपिकांत कुस्तींत कांश्या पदक मेळयलें. हें तिसरें वैयक्तीक पदक. पयलें आॅलिंपीक भांगरा पदक मेळ्ळें अभिनव बिंद्राक. 2008 त बिजींगांत. नेमबाजींत. थंयच विजेंद्र सिंग (बाॅक्सींग) आनी सुशील कुमार (कुस्ती) हांणी कांश्यां पदकां मेळयलीं. 2012 त सुशील कुमारान लंडनांत रुप्यां पदक जोडलें. पदक मेळोवपी पयली भारतीय बायल थारली, कर्णाम मल्लेश्वरी. तिणें कुस्तींत 2012 त कांश्या पदक हातासलें. कुस्तींत आमकां आतां मेरेन दोन रुपीं आनी पांच कांश्यां पदकां मेळ्ळ्यांत. तर बाॅक्सिंगेंत तीन कांश्यां पदकां. विजेंद्र, मेरी कोम आनी लोविना बोर्गोहेन (ती पॅरीस आॅलिपिकांतूय खेळटा.) हे ते बाॅक्सर.
भारताक कुस्ती, बाॅक्सिंगेंत बरी कामगिरी करपाची संद आसा. आॅलिंपिकांत आनीक पदकां जोडपाची संद ह्याच खेळांनी चड आसा. ताका लागून खेळां खात्यान पेलवान, बाॅक्सरांक सगले तरेचो तेंको दिवंक जाय. फाटीं बायलां पेलवान उपासाक बशिल्लीं, तशें हाचे मुखार केन्नाच जावंक फावना. हरियाणा कुस्तींत फुडें आसा. बाॅक्सिंगेंतूय ताणें नांव जोडलां. आतां मनूक लागून आनीक कांय वर्सांनी थंय नेमबाजीच्या मळार चले, चलयो नांव गाजोवंक शकतात. 25 जून 1983 दिसा भारत संवसारीक क्रिकेट सर्त जिखली आनी मागीर देशभरांत क्रिकेट खेळगड्यांचें पिकूच आयलें, तशें. आतां खेळां खात्या वयली जापसालदारकी वाडल्या. तांणी खेळा समित्यांचेर आदल्या राष्ट्रीय खेळगड्यांक नेमून खेळांक खऱ्या अर्थान उर्बा दिवंक जाय.
आमच्या गोंयांत राष्ट्रीय पांवड्या वयले खेळगडे तयार जातले आनी तांचे कामगिरींत सातत्य उरतलें हे खातीर यत्न जाय. गोंयांत हालींच राष्ट्रीय खेळ जाले. मैदानां तयार आसात. शिक्षणीक संस्थांक चड मेहनत घेवची पडटली. एका काळार गोंयचे फुटबाॅल, हाॅकी खेळगडे राष्ट्रीय, आंतरराष्ट्रीय पंगडांनी खेळटाले. पीटर पाॅल फर्नांडीस, वाॅल्टर डिसोझा, लिओ पिंटो, मॅक्सी वाझ, मेरी डिसोझा, लेव्ही पिंटो (हो 100 मिटर शर्यतींत उपांत्य फेरयेंत पाविल्लो.) आनिकूय खूब जाण आसात. यत्न केल्यार हे आदले दीस परतून येवप कठीण न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
