भांगरभूंय | प्रतिनिधी
कोरगांव, चोपडें गाव आनी सरभोंवतणच्या वाठारांनी सध्या तिडकीचें ल्हार पातळ्ळां. पेडणें म्हाल अस्वस्थ जाला. कारण थारलां ह्या वाठारांनी जावपी मेगा प्रकल्प, जमनीचीं रुपांतरां. गांवांत कितेंय करपाचें आसल्यार पंचायत, कोमुनिदादीक, गांवच्या मुखेल गांवकारांक विस्वासांत घेतात. मात, कांय वेळार उदरगतीचे वा हेर कसलेय प्रकल्प येतात, ताची खबर गांवाक आसताच अशें ना. कोरगांव पंचायतीक देवसूंच्या मेगा प्रकल्पाच्या परवानगेचो अर्ज मेळ्ळा. तर चोपड्यां पंचायतीक आनी थळाव्यांक विस्वासांत घेनासतना जमनीचें रुपांतर जालां खंय. राज्यांत हेर कडेनूय रुपांतरां, मेगा प्रकल्प वयर सरपाक लागल्यात. फुडाराक येवपाचेय आसात. ते सगलेच बेकायदेशीर, अशें कोण म्हणचोना. तरीय ताचो गांवचे समाजीक जिणेचेर कितें परिणाम जातलो, ताचो अभ्यास गरजेचो. कारण, गोंयच्या एकूण आंवाठाचे तुळेन हांगाची लोकसंख्या फुगपाक लागल्या. ताचो साधनसुविधांचेर, लोकसंस्कृतायेचेर परिणाम जातलो, हें सांगपाक पारख्याची गरज ना.
हालीं हे प्रकल्प वा जमनींचीं रुपांतरां जातात तीं चडशीं दोंगरांचेर. पयसुल्ल्यान सोबीत पाचवोचार सैमाचें वा मोनेळ घालपी दर्याचें दर्शन जाता. म्हणटकच गोंयां भायले दुडवाकार कितलेय कोटी मोडून थंय सेकंड होम घेतात वा फ्लॅट घेवन पर्यटकांक भाड्यान दितात. हाचें सरकाराचे तिजोरेक लुकसाण जाता. फाटीं एक आदलो क्रिकेट खेळगडो पसून ह्या बेकायदेशीर कामांत घुस्पल्लो. मागीर ताणें तें प्रकरण मिटयलें जावये. देवसूंत झाडां कापपाचें काम नेटान चालू आशिल्ल्यान सरकारी यंत्रणांनी कारवाय करची असो थाराव कोरगांव ग्रामसभेन मानून घेतलो. अर्थांत यंत्रणां ते मानून घेतली काय ना, तें फुडाराक कळटलें. जमनीचो झोन बदलपाची नोटीसूय उजवाडाक आयल्या. हे ग्रामसभेंत एकल्यान एक दुबाव उक्तायलो. गांवांतल्या जमनींची थळाव्यांक खबर नासता, मात देड- दोन हजार किलोमिटर अंतरा वयल्या डिलरांक, लोकांक खंय कितें विकपाचें आसा तें ज्युस्त कशें कळटा, अशें ताणें विचारलें. चिंतपा सारकी ही गजाल. भायल्यांक ह्यो गजाली कोण सांगतात? इंटरनेट वेबसायटींचेर हे विशीं म्हायती येना मूं? तशें आसल्यार, कोण तरी गोंयकारुच हाचे फाटल्यान आसतले. घर, फ्लॅट, इमारत, दोंगर, शेत, जमीन कोणाचे मालकेची, कोणाक कसो पटोवपाचो, परवाने, दाखले कोणा कडल्यान घेवपाचे हें भायल्यांक चड बरें खबर आसता… आनी हीं कामां ते धडाधड शक्य तितले बेगीन करतात. थळाव्यांक वास लागलो जाल्यारुच बोवाळ. पूण, गांवकार फाटपुरवण करीनात जाल्यार वर्स, देड वर्सा उपरांत सगलें शांत जातकच गांवची ती जमीन गांवकारांच्या हातांतली केन्ना वता तें कोणाकूच कळना. तो मेरेन लढपाची जिद्दय बाविल्ली आसता. कोरगांव पंचायती कडेन ना हरकत दाखल्या खातीर अर्ज आयला. पूण अजून दाखलो दिवंक ना. थळाव्यांचे मान्यताये बगर पंचायत तो दिवची ना, अशें सरपंचान, थळाव्या पंचान म्हणलां. पळोवया.
चोपडेंच्या दोंगरार सादारण चार लाख चौखण मिटर जमनीचें रुपांतर जालां. थंय व्हडल्यो निवासी इमारती येवपाच्यो आसात. हें रुपांतर बेकायदेशीर, असो थळाव्यांचो आरोप. ताका विरोध करपाक पंचायतींत गांवकार जमिल्ले तेन्ना थंय थळावे आमदार जीत आरोलकार आशिल्ले. आपूण गांवकारां वांगडा आसा आनी आपलो ह्या प्रकल्पाक विरोध आसा, अशें तांणी सांगलें. वेळ पडल्यार न्यायालयाचो सगलो खर्च स्वता करतलों, अशी घोशणाय तांणी केली. गांवकारांनी मार्ग मेळना जाल्यार रस्त्यार देवन आंदोलन करपाची शिटकावणीय दिल्या. पोरूं पेडण्यांतल्या जमनींच्या झोन बदला बाबतींत पंचायतींक, लोकप्रतिनिधींक विस्वासांत घेवंक ना, म्हूण आमदार आरोलकार हांच्या फुडारपणा खाला आंदोलन जाल्लें. उपरांत तो आराखडोच रद्द जाल्लो. ह्या वेळारूय चोपडें पंचायत आनी थळाव्यांक विस्वासांत घेवंक ना, अशें आमदारान सांगलें. थळावे आमदार सरकाराचे एक घटक आशिल्ल्यान मुखार कितें जातलें, हाचे कडेन सगल्यांचीच नदर आसतली.
दोंगराचेर इमारती आयल्यार ताचो परिणाम चोपडें, आगरवाडो गांवांचेर आनी थंय रावपी गांवकारांचेर, तांच्या फुडल्या पिळग्यांचेर जातलो, अशी भिरांत थळाव्यांनी उक्तायल्या. भायल्यान आयिल्ले कोणूय थळाव्यां मदीं मिसळून एकरुप जावपाक दोन पिळग्यो तरी वच्च्यो पडटात. वास्को, मुंबय, दिल्ली, बंगळुरू ही ताचीं उदाहरणां म्हूण अभ्यासकांनी पळोवंचीं. बळिश्ट, हुशार, धुर्त, जिद्दी, पाताळयंत्री, मेहनती….. आसात ते वयर सरतात. मात हें जातना त्या शाराचें, गांवांचें रुप बदलता. आदलें सगलें दायज शेणटा…. आनी तो वाठार पोरणीं पाळां- मुळां हुमटून नव्यान जल्मता. थळाव्यांक अनवळखी अशें रुप घेवन!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
