भांगरभूंय | प्रतिनिधी
-शेतकारांक लुकसाण भरपाय उसरा मेळात आशिल्ल्याची कागाळपणजी : सवाय धान्य दुकानांचेर (सोसायटी) तांदूळ आनी गंव मेळटात. पयलीं भशेन साकर आनी तेल लेगीत दिवचें, अशी मागणी आमदार डॉ. चंद्रकांत शेट्ये आनी आमदार डिलायला लोबो हांणी ही मागणी केली.
सभाघरांत शुक्रारा शेती, नागरी पुरवण आनी हस्तकला खात्यांच्या मागण्यांचेर चर्चा जाली. गोंयांत 400 सोसायट्यो आसात. ह्या सोसायट्यांक लागून कांय जाणांक रोजगार मेळटा. नागरी पुरवण खात्याचे जे गुदांव आसात, तांची तपासणी जावपाक जाय. कारापूर – तिस्का वयल्या गुदांवांची स्थिती बाबत आसा, अशें आमदार डॉ. चंद्रकांत शेट्ये हांणी सांगलें.
बीपीएल रेशन कार्डाचेर 35 कील तांदूळ मेळटात. गंव मेळनात. एपीएल कार्डाचेर 10 कील तांदूळ आनी 5 कील गंव मेळटात. एपीएल कार्डाचेर गंव दिवपाक जाय. तशेंच पयलीं रेशन कार्डाचेर तेल आनी साकर मेळटाली. तेल आनी साकर परतून सुरू जावपाक जाय, अशी मागणी डिलायला लोबो हांणी केली.
सोसायट्यांनी आतां ऑनलायन बिलां जातात. कांय कडेन रेंज नाशिल्ल्यान समस्या जाता. ऑनलायन सेवेंत सुदारणा करपाची मागणी आमदार कार्लोस फेरेरा हांणी केली.
येणावळ चड आशिल्ल्या लोकांनी रेशन कार्डा परत केल्या. पयलीं जाहीर केल्ले प्रमाण ह्या लोकांक अजून ग्रीन रेशन कार्डां मेळूंक नात. बेगिनांत बेगीन ग्रीन रेशन कार्डां दिवपाची गरज आसा. कांय जाण्ट्या लोकांची बोटां फिंगर प्रिंट स्कॅनराक लागनात. हाचेर उपाय काडपाची मागणी आमदार उल्हास नायक तुयेंकार हांणी केली.
सोसायटी दुकानदारांचे कमिशन 5 रूपया मेरेन वाडोवपाची मागणी आमदार संकल्प आमोणकार हांणी केली. मुरगांव मतदारसंघांत सवाय धान्य दुकानांचो आंकडो आनीक वाडोवपाक जाय, अशी मागणीय तांणी केली.
सोसायट्यांच्या दुकानदारांक उर्बा मेळपाक जाय, अशी मागणी युरी आलेमांव हांणी केली.
म्हाल पांवड्यार फार्मींग मार्केट करचें
शेतकारांचो म्हाल पुराय राज्यांत पावपा खातीर म्हाल पांवड्यार सरकारान फार्मींग मार्केट करपाक जाय. फार्मीग मार्केट जाले जाल्यार शेतांतली भाजी, दूद हांकां बाजारपेठ मेळटली, अशें युरी आलेमांव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
