भांगरभूंय | प्रतिनिधी
पणजीः फाटल्या कांय वर्सांत गोंयच्या दर्यादेगांची नेटान धूप जायत आसात. 1990 ते 2018 मेरेनच्या 28 वर्सांत राज्यांतल्या दर्यादेगांची 19.2 टक्के म्हळ्यार वट्ट 139.64 किमी.च्या 26.82 किमी. दर्यादेगांची धूप जाल्या. केंद्रीय विज्ञान आनी तंत्रज्ञान राज्यमंत्री डॉ. जितेंद्र सिंग हांणी लोकसभा अधिवेशनांत लेखी जापेत ही म्हायती दिली. दक्षीण गोंयचे खासदार विरियातो फर्नांडीस हांणी हे विशीं तारांकींत एक प्रस्न विचारिल्लो.
जापेंत दिल्ले म्हायती प्रमाण नॅशनल सेंटर फॉर कोस्टल रिसर्च (एनसीसीआर) हांणी 1990 ते 2018 ह्या काळांत दर्यादेगांची धूप जावपी प्रक्रियेचो अभ्यास केल्लो. संस्थेन गोंयच्या 139.64 किमि. दर्यादेगांचो अभ्यास केल्लो. वयल्या काळांत उत्तर गोंयांतल्या 36.4 किमि. म्हणल्यार 18.3 टक्के दर्यादेगांची धूप जाल्या. जाल्यार दक्षीण गोंयांतल्या 103.24 किमि. दर्यादेगां मदीं 20.16 किमि. म्हणल्यार 19.05 टक्के दर्यादेगांची धूप जाल्या.
राज्यांत वेगवेगळ्या कारणांक लागून दर्यादेगांची धूप जायत आसा मात रेंव सांचपाची प्रक्रियाय चालू आसा. हाका लागून आदल्या धूपाची भरपाय जाता. १९९० ते २०१८ ह्या काळांत १९.१ किमी.म्हळ्यार राज्यांतल्या 13.7 टक्के दर्यादेगांचेर परतून रेंव भरपाची प्रक्रिया सुरू जाली. हातूंत उत्तर गोंयच्या 12 किमी (33 टक्के) आनी दक्षीण गोंयच्या 7.1 किमी (6.9 टक्के) दर्यादेगांनी रेंव भरपाची प्रक्रिया सुरू जाल्ली.
राज्यांतले 67.1 टक्के दर्यादेगाे घटमूट
एनसीसीआरान केल्ल्या अभ्यासा प्रमाण राज्यांतल्या 139.64 किमी.च्या दर्यादेगांतले 93.72 किमी (67.1 टक्के) दर्यादेगो स्थीर वा घटमूट स्थितींत आसात. हातूंत उत्तर गोंयांतली 17.74 किमी आनी दक्षीण गोंयांतली 75.98 किमी. दर्यादेगांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
