भांगरभूंय | प्रतिनिधी
विराट पर्व 4
अभिमन्यूचें लग्न
(तांच्या अज्ञातवासाच्या काळांत फाटले वर्सभर आमचेकडेन काम करतालीं. येद्या व्हडल्या मनशांकडल्यान आमी आमची कामा करून घेतल्यात ही आमचे खातीर सामकी लजेची गजाल…. आतां मुखार,,,)
उत्तर हे सांगताना विराट राजा केन्ना आपल्या शिंवासना वयलो उठलो आनी केन्ना ताणें युधिश्टीराचे पांय धरले हें ताचें ताकाच कळ्ळें ना. विराटान तांची सगल्यांची क्षमा मागली आनी व्हड मानान हातांक धरुन थंय आशिल्ल्या आसनार बसयले. ताणें परत एकदां तांचे कडल्यान वा तांच्या घरच्या कडल्यान तांचे विशीं कितें आगळीक घडल्या जाल्यार तांची चूक मोठ्या मनान पदरात घेवची अशें पांडवा कडेन मागलें. विराटान अशें म्हणटकच युधिश्टीरान ताका म्हणलें, खरें म्हणल्यार आमीच तुका देव बरे करूं अशें म्हणूक जाय. कित्याक तर आमचे अज्ञातवासाचे एक वर्स तुज्या राज्यांत बरे भशेन हुस्क्या मेकळें गेलें. विराटराक तें आयकून ताच्या माथ्या वयले व्हडले वजे देंवल्या सारकें दिसलें.
कांय दिसा उपरांत दुर्योधनान धाडिल्लो दूत विराटाच्या दरबारात आयलो आनी ताणें तो दुर्योधनाचो निरोप पांडवाक दिवपाक आयला अशें विराटाक सांगलें. त्या वेळार पांचूय पांडव विराटाच्या दरबारात हाजीर आशिल्ले. दुतान सांगलें दुर्योधनान पांडवांक म्हजे कडल्यान निरोप धाडला. ताका लडायेत हारोवपी बायल मनीस ही अर्जुन हें ताणें वळखलां. अज्ञातवासाचे वर्स आजून सोंपूक ना. तेन्ना फांश्यांच्या खेळांत लायिल्ल्या पणा प्रमाण पांडवांनी परत वनवासाक वचपाची तयारी करची. दुर्योधनान धाडिल्लो तो निरोप आयकून युधिश्टीर व्हडल्यान हांसलो आनी तांणे त्या दुतांक म्हणलें, “तुज्या दुर्योधनाक सांग. तेरा वर्सा सोंपल्या कांय ना हें ताका ताचो आजो भीष्म महाराज वेवस्थीत सांगतलो. तेन्ना ते ताका विचार. तुर्ताक कांय दीस आमकां सुखान रावूंक दी.” युधिश्टीराचो निरोप घेवन तो दूत मागीर हस्तिनापुराक दुर्योधना कडेन गेलो.
कांय वेळान विराटान युधिश्टीराक म्हणले, धर्मराजा, अर्जुनान म्हजें राज्य बळिश्ट कौरवां कडल्यान वांचयलां. ताचे हे उपकार हांव केन्नाच विसरचोना. म्हज्या मनांत एक विचार आयला. म्हजी चली उत्तरा हिचें लग्न अर्जुना कडेन जांवचें. तुका कितें दिसता? युधिश्टीरान कितें म्हणचें पयली अर्जुन बेगीबेगीन उलयलो, हांव उत्तरेचो नृत्यकलेचो गुरु. गुरु हो बापाय भशेन आसता. तेन्ना हांव तिचे कडेन लग्न जावंक शकना. पूण एक करुं येता. म्हजो पूत अभिमन्यू हो आतां लग्नाचो जाला. ताच्या वांगडा उत्तरेचें लग्न लावया. उत्तरा म्हजी सून जाली जाल्यार म्हाका खूब बरें दिसतलें. अर्जुनाचें म्हणणें विराटान रोखडेंच मान्य केलें. मागीर सगळे जाण अभिमन्यू आनी उत्तरा हांच्या लग्नाचे तयारेक नेटान लागले.
पांडवाचो अज्ञातवास सोंपलो आनी मत्स्य देशाचो राजा विराट आपले चलयेचे लग्न अभिमन्यू वांगडा करता ही खबर मेळना फुडें द्वारकेंतल्यान कृष्ण, बलराम, सुभद्रा, सात्यकी हे सगले जाण अभिमन्यूक घेवन विराट नगरात आयले. ते वटेन कांपिल्य नगरांतल्यान राजा द्रुपद, धृष्टद्दुम्न, शिखंडी, पांडवांचे पांच पूत हेय आयले. अभिमन्यू आनी उत्तरेच्या लग्नाच्या निमतान विराटान आपल्या राज्यातले एक गांव उपप्लाव्य नगर पांडवांक रावपाक दिल्लें. थंय पांडवांचे सगळे सोयरे- धायरे एकमेकांक मेळ्ळे. अभिमन्यूच्या लग्नाचे निमंत्रण पांडवांनी तांच्या सगळ्या बरे मागणी राजांक धाडून दिले. उपप्लाव्य नगरांत राजांची आनी राजघराण्यांतल्या लोकांची ही गर्दी जाली. मागीर एका बऱ्या म्हुर्तार पांडवाचो पुरयत धौम्य रुशी हांणे अभिमन्यूचे लग्न उत्तरावांगडा व्हडा दबाज्यात लायलें. सबंद उपप्लाव्य नगर खोशयेन व्हांवन गेलें.
(मुखार चलता)
अनील नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
