भांगरभूंय | प्रतिनिधी
कला अकादेमीच्या मोडिल्ल्या पांख्याच्या नांवांन रडपाची कार्यावळ हालींच घडोवन हाडली. अकादेमीच्या दारांतूच जायत्या कलाकारांनी आपणाली रडपाची कला सादर केली. तांची कला पावोवंक खूब जाण जमिल्ले, पूण एकल्याच्याय दोळ्यांत दुक आयिल्लें दिसलें ना. दर एकलो हे कलेची मजा घेतना दिसतालो. तांच्या ह्या रडपाच्या नाटकाचो कितेंय उपयोग जातलो, अशें म्हाका तरी दिसना. तशी कला अकादेमी आमचे खातीर केन्ना सोंपली. एक काळ आशिल्लो जेन्ना कला अकादेमी गोंयच्या लेखकांचीं पुस्तकां विकत घेताली. दर वर्सा साहित्य पुरस्कार दिताली. वर्साक एक फावट साहित्य मेळावो घेताली. पूण हें अशेंच चालू उरल्यार सगळेच बरोवंक लागतले आनी लेखक जातले ह्या भंयान अकादेमीच्या तेन्नाच्या अध्यक्षान त्यो कार्यावळी बंद उडयल्यो. आनी आमचे खातीर तरी अकादेमीचीं दारां बंद जालीं. खंयच्याच साहित्यीकान जाप काडलीना. कारण ताचो कांयच फायदो नासलो, हें सगळेच जाणा आसले. राणे सायब सांगता तीच पूर्व आशिल्ली. ताचे वयर कोणूच जाप काडूंक शकनासलो. सगळे फकत तकली हालोवपांत समाधान मानताले आनी आपणालें सादोवन घेताले. उपरांत अकादेमींत वचप जातालें तें नाटका निमतान. पूण फोंड्यां राजीव कलामंदीर आनी मडगांवां रवींद्र भवन जायत सावन नाटकां दारांत मेळूंक लागलीं. मागीर अकादेमीक मुद्दम भेट दिवंक कोण वतलो? म्हणटकूच आमचे खातीर अकादेमी पयसूच उरली.
आतां अकस्मात कांय जाणांक अकादेमीचो पुळको आयला म्हणपाचें दिसता. हातूंत चार्लस कुरैय्या फावंडेशन इल्लें मुखार आसा. अकादेमी जाग्यार पडची अशें कलाकारांक दिसप सभावीक. पूण कुरैय्या फावंडेशनाक ताची काळजी कित्याक? अकादेमीची वाट लावंक पयल्या इफ्फी पासून सुरवात जाली म्हणटात आनी अकादेमीचे अध्यक्ष सांगतात, काल पयर मेरेन कुरैय्याचेच लोक अकादेमीचे सल्लागार म्हणून काम करताले. हाचोच अर्थ अकादेमीची वाट लावंक तेच जापसालदार जाले नात? मागीर आतां कितें जालें? अकादेमीची वाट लागल्या म्हणपाचें तांकां आतांच कशें कळ्ळें? तांकां आतां थंय काम ना म्हूण कळिल्ल्यान हो साक्षात्कार बी घडून येवंक ना मूं? कारण अजून मेरेन तांणी अकादेमीच्या अध्यक्षान सांगलां तें फट, आमचे लोक थंय सल्लागार नासले वा आमी अकादेमीची वाट लावंक सहभागी नासले म्हणपाचें सांगिल्ल्याचें आमी आयकूंक ना.
एक गजाल आमी मतींत घेवंक जाय, ती म्हणल्यार संवसारांत शास्वत अशें कांयच आसना. आज आसा तें फाल्यां बदलता, ना जाता. ताचे जाग्यार नवें रूप तयार जाता. सगळेंच तश्या तशें उरिल्लें जाल्यार संवसारांत अजापां म्हणून आसा ताका मोल आसचें नासलें. आनी आमी एकूच जर घेवन बशिल्ले जाल्यार इंजिनियर, आर्किटेक्ट हांकां तरी खंय मोल आसपाचें? बदलाची गरज आसा म्हणून तर हे सगळे जाय न्ही. तशे पोरण्या घरांचें जतन करून दवरपी वा ताचेर सल्ले दिवपी जायते आर्किटेक्ट, इंजिनियर गोंयांत आसात, पूण आमकां सोस भायल्यांचो. गोंयकार चलता पूण तो गोंयांभायर रावपी आसल्यार ताका प्राधान्य दिवप ही आमची सवंय. म्हणटकूच आमी शेजरा आशिल्ल्याक कित्याक विचारतले? आनी मजेची गजाल म्हणल्यार एकाय आर्किटेक्टान वा इंजिनियरान अकादेमीच्या वास्तूचेर आपणालें मत मांडिल्ल्याचें आयकूंक येना. तांकां विचारलेंच ना तर ते कित्याक उलयतले? जें कितें आयकूंक मेळटा तें फावंडेशना वतीन.
हेवटेन रडपाचें नाटक चलतालें आनी तेवटेन पावस धुमशणां घालतालो. तसो अंदु पावस बरो पडलो म्हणचो पडटलो. ताणेय बरें नाटक चलयलां. अजून तरी उणो जावपाचीं चिन्हां दिसनात. झाडां- पेडां पडत आसात, घरां मोडत आसात आनी पालसणां कोसळत आसात. आतां दोश पावसाक दिवपाचो काय आमचींच कर्मा हीं म्हणून तकलेर हात मारपाचो तेंच कळना जालां. आमचो विकास कितलो उखलापो तेंच हो पावस दाखोवन दिता. आमी खळयो मारतात, पायपां घालूंक चर मारतात आनी हाका लागून झाडाचीं पाळां हालतात. केन्नाय एकेवटेनचीं पाळां कापतात. मागीर झाड उरतलें कशें? पावस आयलो, माती वोली जाली म्हणजे झाड पडटलेंच. दोंगर कातरले. पावसाक धरून दवरपी झाडां कापलीं. पावस कसो उरतलो? पावसाचें उदक व्हांवत सकले वाटेन येतलें. वांगडाच माती, फातर हाडटलें. व्हाळ- न्हंयो पुरवल्यो म्हणजे उदकान कितें करपाचें? गांवांत घुसचें पडलें ना? येवपी बुट्टी हो आमचो विकास. कोसळपी पालसणां हो आमचो विकास.
दोंगर कशे कापचे हें इंजिनियरींग शिकतनाच शिकयतात. पूण आमचे तकलेंत तें वचना कशें? शेकानशेक उबेच दोंगर कशे कापतात काय? कोण हे शाणे? कोन, सोपणां कांयच ना? मागीर पालसणां उरतलीं कशीं? काँट्रेक्टर जें कितें करता तें दोळे धांपून पळेतात काय हे? कशें पास करतात तांचें काम? आतां जें कितें घडलां ताची जापसालदारकी कोणे घेवपाची? खरें म्हणल्यार सरकारान हाय वे कामाचेर देखरेख करपी सगळ्या इंजिनियरांक घरा बसोवपाची गरज आसा. इतलेंच न्ही तर तांचेर मनशांक मारपाचो कट केलो म्हणून खटलोय घालूंक जाय. कारवार लागसार पालसण कोसळून एक कुटूंब गेलें, ते भायर हेर लोकांक मरण आयलें. तांकां न्याय मेळूंक नाका? हें सारकें शिकून इंजिनियर जाल्यात काय फटींगपणां करून तेंय तपासून पाळोवंक जाय. राखणे वणत बांदतना उंची पाळोवन रूंदाय थारावची आसता म्हणपाचें हांकां कशें कळना? पावस आमकां आमी कितें तें दाखोवन दिता. अकादेमी खातीर रडटनाच जे कोण ह्या पावसांत उबंतर पडल्यात, जांचो जीव गेला तांचे खातीरूय दोन दुकां गळोवंया न्ही. लागणूक ती आमची.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
