ही संद जरूर घेवची

भांगरभूंय | प्रतिनिधी

आ मकां सरकारी नोकऱ्यो जाय, पूण सरकारी संस्थांनी शिकपाक नाका, ही वस्तुस्थिती आमी न्हयकारपाक शकनात. मुख्यमंत्री डाॅ. प्रमोद सावंत हांणी हालींच आयटीआयंत नवे अभ्यासक्रम सुरू करपाची घोशणा केल्या. फ्रेंन्च, रशियन सारकी भाशा शिकोवपाची वेवस्था आयटीआयंत केल्ल्याचें तांणी सांगलें. विदेशी भास ही फक्त पर्यटकां खातीरुच गरजेची आसता अशें ना. तुमी बारीकसाणेन पळयत जाल्यार तुमकां जर आवड आसत, तर तुमी ते भाशेंतलें साहित्य अणकारपाक शकता. पर्यटकांचे बरें मार्गदर्शक म्हूण काम करपाक शकतात. हाचेच वांगडा नेट सेट परिक्षेक जे इत्सूक आसात, तांचे खातीर मार्गदर्शन सरकारान दवरलां. ताचो लाव परिक्षेक बसपाक सोदपी विद्यार्थ्यांनी जरूर घेवचो. हेर विद्यार्थ्यांनीय तो घेवचो. आमकां तान लागली काय बांय खणपाची संवय जाल्या. म्हणल्यार आमी परिक्षेचो विचार करपाक लागतात, तेन्नाच तयारेक लागतात. तशें केल्यार येशाची खात्री कोण दिवंक शकना. परिक्षेची तयारी पयलीं सावन केल्यार तुमकां येश मेळपाची खात्री आसता. भाशेचें शिक्षण गोंयांत पयलीं सावन कांय खाजगी संस्था दितात. देखीक फ्रेंच भाशा अलायन्स दे फ्रेंच शिकयता. हेर भाशा लेगीत खाजगी संस्था शिकयतात. मात आतां आयटीआयंत ह्यो भाशा सरकार शिकयतलें. म्हणजे तुमकां फी पसून परवडपा सारकी आसतली.
पर्यायी इंधन
पर्यायी इंधनाचेर व्हड व्हड भाशणां तुमी आयकल्यांत आसतली. जो सूर्य आमकां सदांच दिता, ती सौर शक्ती आमी उणी वापरताले. आतां शास्त्रज्ञांनी हाचेर संशोधन करून सगल्यां सोलर पॅनल तयार करून दिल्यात. ताच्या माध्यमांतल्यान तुमकां घरांतूच उर्जा मेळटा. केंद्र सरकार तर आतां मुफत सौर पॅनल बसोवन दितलें. तांणी तशी येवजणूच तयार केल्या. दुचाकी, चारचाकी आनी हेर गाडयां खातीर आमी पॅत्राॅल, डिझल वापरतात. तें सोंपलें काय मागीर कितें? आमकां तर गाडयांची संवय जाल्या. कांय कारणांक लागून आमी गाडी चलोवप टाळपाक शकनात. हें मतींत दवरून पर्यायी वेवस्था म्हूण सोलर शक्ती वापरांत आयली. इलेक्ट्रीक गाडयो वाडल्यात. ताचेर सरकार अनुदानूय दिता. पूण त्यो दुरुस्त करपाक गांवांगांवांनी मॅकानीक जाय. सध्याच्या मॅकानिकांनी तें शिकपाक जाय. सरकारान हें मतींत दवरून आयटीआयंत सोलर टेक्निशियन कोर्स सुरू केला. ताचो लाव सगल्यांनी घेवचो.
नेट सेट परिक्षा
आतां नेट सेट परिक्षेचेर उलोवया. तिची तयारी पयलीं सावन करशात तर तुमकां ती खूबच फायदेशीर थारतली. नेट आनी नीट परिक्षे भितर फरक आसातो कळपाक लागतलो. नीट परिक्षा ही विज्ञान फांट्याच्या विद्यार्थ्या खातीर आसता तर नेट सेट ही काॅलेजींत शिकोवपी प्राध्यापकांक उपेगी पडटा. ताचो फरक म्हणल्यार तुमी सेट परिक्षेक बसश्यात तर गोंय आनी महाराष्ट्रांतली संद तुमकां मेळूं शकता. तर नेट परिक्षेचो विचार देशभर जाता.
तुमकां आदले पेपर वेबसायटीचेर पळोवपाक मेळटात. ताचो लाव तुमकां सराव करपाक घेवं येता. गोंयांत उच्च शिक्षण संचलनालयांत नॅशनल टेस्टिंग एजन्सीची हे परिक्षेचें मार्गदर्शन दिवपाचे वर्ग सुरू केल्यात. 211 विद्यार्थी हातूंत आयज मेरेन पास जाल्यात. https ://forms.gle/qwnP9GHDz4R kvy5 हो फॉर्म भरचो. 17 जुलया मेरेन तुमकां तो दिवपाक जाय. म्हायती खातीर सुभाष 99234 84696 वा अँथनी 98225 85141 हांचे कडेन संपर्क करचो. सर्वसामान्यांक तीनशे रुपया, ओबीसींक 250 रुपया, तर एससी, एसटीं खातीर 100 रुपया मोल भरचें पडटलें. जांच्या लागीं नोंदणी कार्ड आसा, तांकां तें नवें करपाची गरज ना आनी फी लेगीत भरची पडची ना. 18 ते 23 जुलय मजगतीं नवें नोंदणी कार्ड दितले. नेट सेट परिक्षेचो अणभव घेवचे पयलीं तिची म्हायती घेयात. ही परिक्षा वर्सांत दोनदां जाता. https://ugcnet.nta.ac.in/ ह्या वेबसायटीचेर तुमकां सगली म्हायती मेळूं शकता. ती जरूर पळोवची.