ट्रम्पा वयलो हल्लो

भांगरभूंय | प्रतिनिधी

हिंसा हो दुबळ्या लोकांचो, दुबळे मानसिकतायेचो निमणो आसरो, असो एक विचार आसा. मनशाचीं तत्वां, विचारसरणी मात पसून आवडूंक ना म्हूण ताका जिवेशीं मारप हो उपाय न्हय. मात, नावडट्या मनशाक सोंपयलो काय ताचे विचारुय सोंपतले अशें चडश्या लोकांक दिसता आनी ते हिंसेचो मार्ग आपणायतात. मागीर ताचें समर्थनूय करतात. पूण मारिल्ल्या मनशाचे विचार नश्ट जायनात. राजकारण आनी लोकशायेंत हिंसेक थारो ना, अशें प्रधानमंत्री नरेंद्र मोदी हांणी म्हणलां. ताचें कारण जालां, अमेरिकेचे आदले अध्यक्ष डोनाल्ड ट्रम्प. तांचेर शेनवारा हल्लो जालो. गुळी तांच्या कानाक लागून गेली. सुरक्षा रक्षकांनी तांकां वेळारुच सुरक्षीत जाग्यार व्हेले म्हूण ते वाटावले. अमेरिकेंत हाचे पयलीं असले कितलेशेच हल्ले जाल्यात. अब्राहम लिंकन, जाॅन एफ केनेडी, जेम्स ए गार्फिल्ड, विलीयम मेककिनले हांची फार मारून हत्या जाल्या. तर बिल क्लिंटन, रोनाल्ड रिगन, सिनियर जाॅर्ज बुश, जो बायडन, बराक ओबामा हांचेर हल्ले जाल्यात. थोडक्यांत सांगपाचे जाल्यार अमेरिकेच्या भोवतेक सगल्याच अध्यक्षांचेर हल्ले जाल्यात. हाचे भायर मार्टीन ल्युथर किंगा सारक्या म्हान फुडाऱ्यांकूय मारल्यात. अमेरिकाच न्हय, संवसारांतल्या सगल्या देशांच्या फुडाऱ्यांक मारल्यात. तांकां मारपांत कांय राजकी पक्षांचो, संघटनांचोय हात आशिल्ल्याचें सिद्ध जालां. कांय जाण निर्दोश थारल्यात. मात, अमेरिकेंत फारान मारप ही तशी सदचीच गजाल म्हणल्यार जाता. कारण थंय दरेकल्या कडेन परवानो घेवन बाळगिल्लें पिस्तुल आसता.
अमेरिकेंत अध्यक्षपदाची वेंचणूक जावपाची आसा. सध्या थंय संवसारांतल्या जायत्या लोकांचे नावडटे उमेदवार डोनाल्ड ट्रम्प (रिपल्बिकन पक्ष) जिखून येवपाची चड खात्री राजकी जाणकारांनी उक्तायल्या. ते पेनसिल्व्हेनियांतले प्रचारसभेंत उलयतना फारपेटाचो आवाज जालो. एक गुळी ट्रम्प हांच्या कानाक लागून गेली. तर दुसरी तकले वयल्यान. (हाचो फोटो व्हायरल जाला.) सुरक्षा रक्षकांनी तांकां रोखडेच थंयच्यान व्हेले. माचये वयल्यान सकयल देंवतना ट्रम्प घोशणा दितना, हाताची मूठ लोकांक दाखोवन अभिवादन करतना दिसले. फारपेट करपी 20 वर्सां पिरायेचो थाॅमस क्रुक्स अशें एफबीआयन जाहीर केलां. ताका प्रतिहल्ल्यांत सिक्रेट सर्व्हिसाच्या सैनिकांनी मारलो. मात, ताच्या हल्ल्या फाटलो उद्देश कितें तो कळूंक ना. तो मैदाना लागसारचे एके इमारतीचेर वयर बशिल्लो. म्हणल्यार सुरक्षा वेवस्था घाळ रावली अशें म्हणचें पडटलें. कारण अमेरिके सारक्या महासत्ता देशांत असल्यो घडणुको चुकूनच जातात. अल कायदा संघटनेन वेपारी केंद्राच्यो दोन इमारती उडयले उपरांत परतूय वेगवेगळ्या मार्गांनी अमेरिकेचेर हल्लो करपाचे यत्न केले. मात, ते फळादीक जाले नात. पूण, शाळांनी फारपेट करून भुरग्यांक मारपाच्यो घडणुको वर्साक एक तरी जाताच. राजकी फुडाऱ्यांक कडक सुरक्षा वेवस्था आसता, ताका लागून तें कवच भेदून वचप हल्लेखोरांक शक्य जायना. मागीर हल्लेखोर आपलो राग निश्पाप आनी उणी सुरक्षा आशिल्ल्या शाळा, बाजार असल्या थळांचेर काडटात.
न्यू याॅर्क, कॅलिफोर्निया सारक्या कांय राज्यांनी बंदूक वापरपाचे कायदे खूब कडक आसात. पूण हेर कडेन तीं सोंपेपणी मेळटात. 2022 च्या सरकारी आंकड्या प्रमाण अमेरिकेंत 2 कोटी 20 लाख पिस्तुलधारी लोक आशिल्ले. कायदेशीर परमीट होल्डर. त्या वर्सा अमेरिकेची लोकसंख्या आशिल्ली 33 कोटी. हाचे भायर बेकायदेशीर पद्दतीन पिस्तुलां घरांत दवरपी आनीक कितले लाख आशिल्ले, ते तांकांच खबर. उपरांतच्या दोन वर्सांनी हो आंकडो देवंक ना, हें विशेश. अमेरिकेंत लग्नसंस्था तशी मुक्त आसा. घटस्फोटाचें प्रमाण व्हडलें. तरीय थंय घोव- बायले मदीं बारीकसारीक कारणां वयल्यान केस्तांवां जातात आनी मागीर ढो, ढो..!! हायस्कूल, काॅलेजींनीय होच प्रकार. पबांनी तर विचारूं नाकात. आतां अमेरिकेंतले हे प्रकार हेर देशांनीय पातळूंक लागल्यात. पिस्तुलाचे परवाने दिवपाचें प्रमाण उणें जायना, तकली सटकुपी लोक ताळ्यार येनात, तो मेरेन हे फारपेटाचे प्रकार वाडतूच वतले. पोरूं ज्यो बायडन- हॅरीस प्रशासनान पिस्तुल परवाने दिवपाचेर बंधनां हाडपाचो विचार उक्तायिल्लो. आतां 21 राज्यांनी परवानो दिवचे पयलीं संबंदीत मनशाची फाटभूंय तपासून पळयतात. ताका पिस्तूल नेमकें कित्याक जाय, ताचीय बारीकसाणेन चवकशी जाता. आनीक 13 राज्यांनी भौशीक जाग्यांचेर वा उक्तेपणी पिस्तुलां, हॅण्ड गन बी व्हरपाचे नियंत्रण घालां. कॅलिफोर्निया, कनेक्टीकट, फ्लोरिडा आनी इलिनोएस हांगा कोणाकूच पिस्तुलां भौशीक जाग्यांचेर व्हरपाक मेळनात. तरीय ह्यो फारपेटीच्यो घडणुको जातात. ट्रम्प हांचे वयल्या हल्ल्याक लागून कायदो, सुरक्षा वेवस्थेचो प्रस्न परत धड्यार आयला. आतां अमेरिका पिस्तुलांच्या परवान्यांचेर आनीक कडक निर्बंध घालता काय ना, तें पळोवपाचें.