आत्महत्या पुलांची

भांगरभूंय | प्रतिनिधी

ताचे वयल्यान तांच्या दर्ज्याचेर, बांदकामांतल्या भ्रश्टाचाराचेर कोणे दुबाव घेतलो जाल्यार ताचें तोंड कोण बंद करूंक शकना. कारण….

भारत आनी श्रीलंके मदलो रामसेतू सगल्यांक खबर आसा. भारत आनी श्रीलंके मदीं दिसपी 48 किलोमिटरांची चुनखडीच्या फातरांची रांक ही हजारांनी वर्सां पयलीं सावन अस्तित्वांत आशिल्ली आनी तेन्नाचे लोक तिचो पुला सारको वापर करून आलतड – पलतड वताले, अशें नासाचें संशोधन सांगता. रामायणांतल्या श्लोकां प्रमाण, नल आनी नील ह्या भावांच्या फुडारपणा खाला वानरसेनेन हो रामसेतू बांदिल्लो. सध्या तो उदका पोंदा आसा. पूण अंतराळांतल्या उपगिऱ्यांनी धाडिल्ले ताचे फोटे उजवाडाक आयल्यात. हेच तरेच्यो फातराच्यो रांको आनीक कांय जाग्यांचेरुय नासाक सांपडल्यात. सांगपाचो उद्देश हे सेतू अजून तिगून आसात. गोंयांत पुर्तुगेज तेंपार बांदिल्ले सांकव पसून तंदुरुस्त आसात. मागीर हालींच्या वर्सांनी बांदिल्ल्या पुलांक जाता तरी कितें? खाऱ्या उदक- वाऱ्याक, ओलसाणेक लागून पुलाक घाल्लें लोखण कलमेता आनी तो पडटा, हें एक वेळ समजूं येता. मात दोन, तीन वर्सां पयलीं बांदिल्ले पुलय घालून घेवपाक लागले जाल्यार कितें म्हणपाचें? बिहारांत हालींच्या दिसांनी पुला फाटल्यान पूल आत्महत्या करपाक लागल्यात. 18 दिसांनी 12 पूल पडल्यात. देशाच्या स्वातंत्र्या उपरांतचो हो विक्रम आसतलो.
बिहाराचेर सगल्यांत बिमारू राज्य ही म्होर बसल्या आसली, तरी एका काळार हो वाठार ज्ञानसंपन्न म्हणटात तसो आशिल्लो. 15 नोव्हेंबर 2000 दिसा बिहाराचे दोन कुडके जावन झारखंड राज्य निर्माण जालें. खनीज, धातू, कोळश्यान गिरेस्त अशीं हीं दोनूय राज्यां. मानवी संस्कृतायेची सुरवात जाली ताचे उल्लेख बिहाराच्या इतिहासांत मेळटात. गौतम बुद्धाक हांगाच ज्ञानप्राप्ती जाल्ली. सम्राट अशोक हो म्हान राजा हांगाचोच. आयएएस अधिकारी तयार जातात, तातूंत 14 कोटी लोकसंख्येच्या बिहाराचो देशांत दुसरो क्रमांक लागता. देशांतले सगल्यांत बरे रांदपी बिहारी. हांगाचे लोक कितले मेहनती तें गोंयकारांक सांगपाची गरज ना. कारण हांगा शेंकड्यांनी बिहारी काम करतात. पूण, हें राज्य भिकेक लावपाचें, बिमारू करपाचें कर्म कोणें केलें तर थंयच्या राजकारण्यांनी. गोरवांचे खावडीची भानगड आदले मुख्यमंत्री लालूप्रसाद यादव हांचे कारकि‍र्दींत जाली. तातूंत दोशी सांपडिल्ल्यान तांकां ख्यास्तूय जाल्या. पूण, फाटोफाट कोसळपी पुलांक लागून थंयचो भ्रश्टाचार बंद जावंक ना, हें सिद्ध जाता. आपणे पुलाचेर 50 टक्के हप्तो घेतला, अशें विदेशी फुडाऱ्यान सांगतकच, बिहारी फुडारी म्हणटा, ते न्हंयेचेर तुका पूल दिसता? विदेशी म्हणटा, ना. ताचेर बिहारी फुडारी म्हणटा, 100 टक्के हप्तो. हो विनोद अजूनय लोकप्रीय आसा…. आनी आतां नेमके पूल पडिल्ल्यान तो परतून लोकांचे जिभेर खेळपाक लागला.
सध्या बिहाराच्या मुख्यमंत्री पदाचेर नितीशकुमार आसात. तांचे आनी लालूसुत यशस्वी यादव (उपमुख्यमंत्री) हांच्या काळांतले कांय पूल. तर थोडे 15 वर्सां आदले. तेन्नाय नितीश कुमार, जितनराम मांझी मुख्यमंत्री आशिल्ले. आतां बारा सरकारी अभियंत्यांक निलंबीत केल्यात. चवकशी चलता. आप- पापाचो बुडकूलो तांच्या माथ्यार फोडून तांकां बंदखणींत पसून धाडपाक फुडारी फाटीं फुडें पळोवचे नात. ताका लागून फुडारी बोले आनी सरकारी बाबू डोले, बंद जावंक जाय. कारण कितेंय वायट जालें जाल्यार चड करून सरकारी अधिकारीच सांपडटात. हे पूल मोडल्यात, ताचे फाटल्यान ते पोरणे जाल्ले आनी ताची देखभाल सारकी करूंक नाशिल्ली, हें कारण मुखार आयलां. पूल बांदतना बरें सामान वापरूंक जाय आनी ते वेळार पूर्ण जावंक जाय, अशें नितीशकुमार हांणी हालींच म्हणलां. आतां नेमिल्ली समिती कितें तो अहवाल दितलीच. पूण ह्या एकूण प्रकारांत भ्रश्टाचार जावंक ना आनी जालाच जाल्यार तातूंत एका पसून फुडाऱ्याचो हात ना, असो अहवाल आयल्यार अजाप दिसचें न्हय!
हरशी आपले आवडीचो विशय सोदून राष्ट्रीय खबरां चॅनल तो सप्तकाच्या सप्तकां लावन धरतात. नुस्त्या मार्केटांतलें माना पसून लजतलें, इतल्या नेटान भासाभास, बोवाळ चलता. मात, बिहाराच्या पुलांचें प्रकरण कोणें गंभीरपणान घेवंक ना. एखादो आडवाद आसत. मेल्ल्यांक आनीक कित्याक मारप, अशें बी चर्चा दवरप्यांक दिसलां आसतलें!! बिहाराचे मुख्यमंत्री नितीशबाबून केंद्र सरकाराक तेंको दिला, घडये तेंय कारण आसत. मात, कुठ्ठाळे कांय मिनटां भितर झाडां पडलीं तशे हे पूल पडल्यात. ताचे वयल्यान तांच्या दर्ज्याचेर, बांदकामांतल्या भ्रश्टाचाराचेर कोणे दुबाव घेतलो जाल्यार ताचें तोंड कोण बंद करूंक शकना. कारण, हाचे पयलीं एक से बढकर एक भ्रश्टाचार प्रत्येक सरकाराच्या काळांत जाल्यात. थोडे उक्ताडार आयल्यात, थोडे येवंक नात, इतलेंच.