भांगरभूंय | प्रतिनिधी
भांगरभूंय । प्रतिनिधी
पणजीः गोंयांतल्या 12 आयटीआयंत 14 ते 15 तरांचे अभ्यासक्रम आसात. तांचो विवीध कुशळटाय उदरगती खातीर फायदो जावपाक शकता. कांय विद्यार्थ्यीं आयटीआय केले उपरांत येसस्वी उद्देजक जाल्यात. ताका लागून आयटीआय उणाक दर्ज्याची समजुचें न्हय. 15 जुलयच्यान सुरू जावपी हॉस्पिटॅलिटी अभ्यासक्रमाक लागून विद्यार्थ्यांक फायदो जातलो, अशें मुख्यमंत्री डॉ. प्रमोद सावंत हांणी सांगलें.
मुख्यमंत्री डॉ. सावंत हांणी वेळगेच्या श्रीमती हायस्कुलांतल्यान आभासी पद्दतीन गोंयभरांतल्या 8 वी ते 10 वी यत्तेंतल्या सुमार 60 हजार विद्यार्थ्यां कडेन संवाद सादलो. हे कार्यावळींत डॉ. महादेव गांवस हांणी करियर मार्गदर्शन केलें. जाल्यार पुलीस अधिक्षक राहुल गुप्ता हांणी सायबर गुन्यांवांची म्हायती दिली.
मुख्यमंत्र्यान सांगलें, गोंयांत हेर राज्यां प्रमाण स्पर्धात्मक परिक्षां खातीर गरजेची अशी संस्कृती तयार जावपाक जाय. ते खातीर उच्च शिक्षण पांवड्यार यत्न जावपाक जाय. स्पर्धा परिक्षा हो विद्यार्थ्यां खातीर एक बरो पर्याय थारपाक शकता. हे खातीर यत्ता धावी उपरांतूच तयारी सुरू करची. करियरा विशीं कांय दुबाव आसले जाल्यार आपल्या शिक्षकांक विचारचे. गांवगिऱ्या वाठारांतल्या शिक्षकांनी विद्यार्थ्यांची आवड पळोवन तांकां करियरा विशीं मार्गदर्शन करचें.
आमी दर वर्सा पळयतात, धावीचो निकाल 90 ते 92 टक्क्यां मेरेन लागता. मात विद्यार्थ्यां सयत शिक्षकांनी विशेश यत्न केल्यार हो निकाल 100 टक्के लागपाक शकता. गोंयांतल्या विद्यार्थ्यांनी यत्ता धावे उपरांत राज्यसेवा वा लोकसेवा आयोग अश्या स्पर्धा परिक्षांची तयारी करची, असो उलो मुख्यमंत्री डॉ. सावंत हांणी मारलो.
सायबर गुन्यांव फांट्याचे पुलीस अधिक्षक राहूल गुप्ता हांणी सांगलें, विद्यार्थ्यांनी गरज आसता तेन्नाच स्मार्ट फोन वापरचो. गेमींग, सोशल मिडिया वा हेर ऑनलायन माध्यमांतल्यान आपली सायबर फटवणूक जावची ना, हाची जतनाय घेवची. आपूण स्पर्धा परिक्षा दितना मोबायल फक्त थारावीक काळा खातीर वापरतालो. तुमी लेगीत स्पर्धा परिक्षांची तयारी करपाची आसा जाल्यार मोबायलाचो उण्यांत उणो वापर करचो, अशें तांणी सांगलें.
सोशल मिडियाचेर इश्टागत करतना सांबाळून
विद्यार्थ्यांनी सोशल मिडियाचेर इश्टागत करतना सादुरकाय बाळगुपाची गरज आसा. अनोळखी व्यक्तींच्यो फ्रेंड रिक्वेस्ट स्विकारच्यो न्हय. ज्या व्यक्तींक आमी प्रत्यक्ष वळखतात, तांचेच कडेन ऑनलायन इश्टागत करपा विशीं विचार करचो, असो सल्लो पुलीस अधिक्षक राहूल गुप्ता हांणी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
