दुसरें वैजकी म्हाविद्यालय गरजेचें

भांगरभूंय | प्रतिनिधी

भलायकी संचालनालयांत दोतोर उण्या प्रमाणांत आसात? नवनिर्मणेक तांचो येवकार आसता? बदल्यो वेळार जातात, प्रमोशनां कोणाचीं आडावन उरल्यांत तें समजून घेवचें.

गों यांत 2024 – 25 शिक्षणीक वर्स सुरू जालां. नवो अभ्यासक्रम माध्यमीक शिक्षण पांवड्या वेल्यान  हाडपाचे यत्न जाल्यात. अणभवी शिक्षक, प्राध्यापक वर्गाक शिक्षण मंडळ, म्हामंडळाच्या वावरांत घेवन पुस्तकांय तयार जातात. बारावे उपरांतचें शिक्षण दिवपी म्हाविद्यालयां, विद्यापिठाचे वेवस्थेचो, शिक्षणाचो, अभ्यासक्रमांचो, साधन सुविधांचो नियाळ सरकारान करचो. शिकवण्यो दिवपी (ट्युशन क्लासेस) वर्गांची अकस्मात पळोवणी करून विद्यार्थी, उत्पन्न, शिक्षकांचो अदमास घेवपाक जाय. धारगळ आयुर्वेद (आयुष) संशोधन केंद्र, हाॅस्पिटल अंदूं सावन पुरायपणान जातलेंच अशी आस्त बाळगीतना सरकारान दुसऱ्या वैजकी म्हाविद्यालय हाॅस्पिटलाची मोख दवरची. हें हाॅस्पिटल दक्षीण गोंयांत दोन वर्सां भितर जावप गरजेचें.
तंत्रगिन्यानान व्हड बदल देशांत घडल्यात, धा वर्सांत आदींच्या सरकाराचीं धोरणां चालीक लागल्यांत. चांद्रयानांतल्यान सूर्य आनी हेर गिऱ्यां मेरेन पावपाची वाट दिसपाक लागल्या. जाल्ल्यो चुको सुदारून फुडें वतना नव्यो वाटो दिसतात तेन्ना त्या मार्गाचो अभ्यास जावचो, संशोधनय जावचें. संशोधनांतल्यान तरणाट्यांक देशाचे उदरगतींत वांटेकार जावपाची संद मेळटली. वैजकी मळार संशोधन म्हळ्यार मनीस जीण वाटावपाचो व्हड वावर. तो जालो जाल्यार गोंयकारांकच न्हय तर भारतीयांक लाव जातलो. विदेशांतल्या नागरिकांकय हे संशोधनाचे सुविधेचो फायदो दिल्यार येणावळय वाडटली. ते येणावळींतलो 30 ते 40 टक्के पयसो गरिबांक, गरजेवंतांक फुकट, उण्या दरान वखदांची पुरवण करपा पासत वापरपाक हरकत नासची.
दक्षीण गोंय जिल्हो हाॅस्पिटलाचो बरो उपेग कोविडा वेळार सरकारान केल्लो. ते खातीर बांबोळे वैजकी म्हाविद्यालय, हाॅस्पिटलांच्या दोतोरांक (ज्येश्ठ, युवा) दक्षीण जिल्हो हाॅस्पिटला कडेन जोडपाचे यत्न जाल्ले. दक्षीण गोंय जिल्हो हाॅस्पिटल आयज खंयचे अवस्थेंत आसा? थंय कार्डिओलोजी तशेंच हेर दुयेंसांचेर उपाय करपी बरे दोतोर आसात? खासगी दोतोरांच्या आदारान दक्षीण गोंय जिल्हो हाॅस्पिटलांत सेवा दिवपाक येतली?
मोपा विमानतळा बराबरीन पोळें ते पत्रादेवी म्हामार्गाचें सपन आदले मुख्यमंत्री प्रतापसिंह राणे हांणी पळयिल्लें. उदरगती पासत राज्याच्या हेर मुख्यमंत्र्यांक, मंत्र्यांक तेंको दिवपी, एक मार्गदर्शक. तांची सगलीं सपनां पुराय करपाच्या वावरांत तांचे पूत भलायकी मंत्री विश्वजीत राणे हेवूय सरकारांत आसात. आदले भलायकी मंत्री डाॅ. विल्फ्रेड डिसोझा, आदले मुख्यमंत्री मनोहर पर्रीकार, लक्ष्मीकांत पार्सेकार, आमदार दिगंबर कामत फुडाराचें चिंतपी. पार्सेकार सर आयज शिक्षणाच्या मळार पेडणें तालुक्याक दिका दिवंक पावल्यात. वेवसायीक (वोकेशनल) शिक्षणांतले शिक्षक म्हणून तांणी केल्ल्या मोलादीक वावराची दखल सरकाराक घेवचीच पडटली. मुख्यमंत्री म्हणून उणो तेंप ते आशिल्ले. पूण पंचायत मंत्री, भलायकी मंत्री म्हणून तांचें काम तोखणायेचें.
भलायकी मंत्री विश्वजीत राणे हांणी वैजकी मळार केल्ल्या वावराचीं फळां फुडारांत मेळटलीं. भलायकी खात्या कडेन तांचें चड लक्ष. कुशळ दोतोरांची एक पिळगीच रिटायर्ड जाता आसतना, दोतोर उणे संख्येन आशिल्ले वेळार तांणी भलायकी खात्यांत नवें कितें तरी हाडपाचे यत्नय केल्यात. तरणाट्यांनी वेसना पसून पयस रावचें, वेसनांतल्यान तांकां भायर काडपा पासत व्हड प्रमाणांत जागृताय जावपाक जाय. वरिश्ठ दोतोरांनी हे जागृताये खातीर म्हयन्याक, पंदरा दिसांनी एक दोन वरां दिवचीं म्हणून तांणी संवादांतल्यान दारां उक्तीं करचीं.
पयसो न्हय सेवा ह्या दोतारांच्या ध्येयाची परतून एकदां दोतोरांक याद करून दिवपा खातीर थळाव्या दोतोरांचो मेळावो तांणी घेवचो. त्या मेळाव्यांतल्यान पन्नास दोतोरांचो एक पंगड बांदचो. दोतोरांक जापसालदारकी दिल्यार ते ना म्हणचे नात, पूण तांकांय खंय तरी मानान आपोवचें पडटलें.
भलायकी मंत्र्यांनी भलायकी संचालनालयाचे पणजेंतल्या कांपाल वाठारांतले बिल्डिंगेचें, पणजे मुळाव्या भलायकी केंद्राच्या बांदकामाचें स्ट्रक्चरल आॅडीट करून घेवचें. ते बिल्डिंगेंत कॅबिनांनी बसून वाज आयिल्ल्या दोतोरांची मनांय कळमेल्यांत? भलायकी संचालनालयांत दोतोर उण्या प्रमाणांत आसात? नवनिर्मणेक तांचो येवकार आसता? बदल्यो वेळार जातात, प्रमोशनां कोणाचीं आडावन उरल्यांत तें समजून घेवचें.
भलायकी संचालनालय, गोवा मॅडिकल काॅलेज आनी हाॅस्पिटल, भलायकी केंद्रां, एका वेवस्थापना खाला हाडपाची गरज आसा. केंद्रीय पांवड्यार वा हेर राज्यांनी भलायकी संचालनालयाची वेवस्था कशी आसा? गोंय आनी हेर राज्यांतल्या वाठारांत वेगळेपण आसतलें. भलायकेच्या मळांनी बरी कामकाज यंत्रणा कांय राज्यांनी आसतली तीं गोंयाक उपेगी आसा?
गोंयची उदरगत जाल्ल्यान जंय गोंयकार वचूंक सोदनात अशा मळांनी गोंया भायले तरणाटे कामार येतात. तांची रावपाची वेवस्था कशीआसा? ते गोंयकारांच्या भलायकी सुविधांचेर वजें जावन आसात? फाटल्या कांय वर्सांची म्हायती एकठांय करून अभ्यास केल्यार वैजकी, शिक्षणाच्या हेर मळांनी गोंया भायले चड येवंक लागल्यात हें कळटलें. तांकां आडावपाक येवचें ना पूण ते माथ्यार बसचे नात, गोंयच्यो साधन सुविधा इबाडून उडोवचे नात हाची जतनाय घेवची पडटली.
कोयर, उदक, उपेगांत हाडिल्लें उदक वेवस्थापन, नितळसाणी पासत वावुरप, सुदारणा घडोवपाक विद्यार्थी समित्यो आसच्यो. वैजकी व्हिजिटींग समित्यो पयलीं वरी बांदल्यार हाॅस्पिटलां, भलायकी केंद्रां सुदारतलीं.
दोतोर कामकाजाच्या वज्या खाला आसतात तेन्ना तांकांय मनरिजवण सुविधा मुखेल करून संगीत, टीव्ही वैजकी केंद्रांनी आसचे. वाॅर्डांतल्यो सुविधाय सुदारपा पासत सुचोवण्यो करपाक कागाळी पेटूल दवरूं येता. पेटलांत उडयिल्ल्या कागाळीं बराबरीन ई मेल हेर सोशल मिडियांतल्यान सुचोवण्यो धाडूंक येतात. त्यो धाडटना भास कशी आसची तेंवूय शिकोवपाचो वेळ आयला व्हय?
वैजकी संचालनालय, गोमॅकाॅ, मुळावीं भलायकी केंद्रां, नागरी भलायकी केंद्रां, मेंटल हाॅस्पिटलाचो वावर वाडटा. दोतोर ते संख्येन आसात? लोकसंख्या वाडटा, गोंयांतय ती वाडल्या, ते नदरेंतल्यान भलायकी सुविधांची नवी बांदावळ करची पडटली. बेगीन वखदां मेळचीं, दोतोरांनी चड दुयेंत आशिल्ल्यांक दिसाक दोन वेळा तरी तपासचें, विश्वास दिवचो हे खातीर वैजकी प्रशासकी फांटो वावर करूंक शकता.
धारगळ आयुष हाॅस्पिटल, संशोधन केंद्र जातना राज्यांतल्या पयल्या आयुर्वेद आनी होमिओपाथीच्या हाॅस्पिटलांची अवस्था कशी आसा? हाॅस्पिटलांतल्यान बरे दोतोर मेळ्ळ्यात? शिक्षणाचो पांवडो कितें आसा? भलायकी मंत्र्यांनी नियाळ करचो, हाॅस्पिटलांनी वच्चें.
‘नीट’ परिक्षेचो गोंदळ पळेल्यार सगली परिक्षा यंत्रणा किडिल्ली आसा हो दुबाव उक्तावप जातलें. कांय राज्यांनी बऱ्योच यंत्रणा परिक्षेच्या गोंदळांत घुस्पल्यात, सगलें सोदपाक वर्सभरय पावचें ना, पूण फुडाराक तशें जावचें न्हय हे खातीर केन्नाय तरी मुळा कडेन वचपाक जाय. अती खासगीकरणांतल्यान हें घडलां व्हय?
एकसुऱ्या सरकारी फार्मासी म्हाविद्यालयाचेर धांपिल्ली ताडपत्री कितलो तेंप उरतली. तंत्रीक शिक्षण संचालकांक फार्मासी म्हाविद्यालया कडेन पळोवपाक वेळ आसा? सेवा मुजतवाड, सगल्या खासगी इंजिनियरींग म्हाविद्यालयांच्या प्रशासकी मंडळाचे समितीरय तेच. तंत्रज्ञान वैजकी शिक्षणांत येता, गोंयांतय तें आयलां. नियंत्रक कोण ? वैजकी शिक्षण संचालनालय गरज आसा, दुसरें वैजकी म्हाविद्यालय येतना तशी वेवस्था जावची.

सुहासिनी प्रभुगांवकार
9881099260