भांगरभूंय | प्रतिनिधी
हाथरस, खबरां संस्था: उत्तर प्रदेशांतल्या हाथरसांत मंगळारा सत्संगा उपरांत खेटाखेट जाली. हातूंत भुरगीं आनी बायलो आडकल्यो. गर्देन तीं चिड्डलीं आनी कुडींच्यो राशी पडल्यो. आतां मेरेन खेटाखेट जावन १३० जाणांक मरण आयलें. मरण आयिल्ल्यां मदीं चडशीं भुरगीं, जाण्टीं आनी बायलांचो आसपाव आसा. फाटल्या कांय वर्सांतली ही सगळ्यांत व्हड दुखेस्त खबर.
भोले बाबाच्या ‘चरणांची धुळ’ घेवपा खातीर लोकांनी माचये कडेन गर्दी केल्ली. स्वयंसेवकांनी वॉटर कॅनांतल्यान उदकाचो फवारो मारलो. तेन्ना लोक निसरून जमनीर पडले, मागीर एकामेकां वयल्यान धांवले. अपघाता उपरांत भोले बाबा पळून गेल्ल्यान १७ वरां उपरांत लेगीत पुलिसांक ताचो पत्तो लागूंक ना.
भोले बाबाचो आश्रम ३० एकर जमनीचेर पातळ्ळा. ताचें स्वताचें सैन्य (बावन्सर) आसा. बाबाचेर लैंगीक अत्याचार सयत ५ गुन्यांव नोंद जाल्यात. युपी पुलिशेंत हेड कॉन्स्टेबल आसतना लैंगीक छळाचो आरोप जाले उपरांत ताका काडून उडयलो. तो बंदखणींत गेलो. भायर आयले उपरांत ताणें आपलें नांव आनी वळख बदलली.
खेटाखेट सुरू जातकच भोले बाबा थंयच्यान पळून गेलो. सध्या तो खंय आसा हाची म्हायती मेळूंक ना. कांय जाणांच्या मतान बाबा पुलिसांच्या ताब्यांत आसा. ताका मैनपुरीच्या राम कुटीर आश्रमांत ताका दवरला. आश्रमा भितर आनी भायर पुलीस आसात.
हें प्रकरण थंड जातकच पुलीस ताका अटक केल्ल्याचें दाखोवपाक शकता. हेरांच्या म्हणण्या प्रमाण बाबा फरारी जाला. पुलिसांक ताचो सोद घेवपाक येस मेळूंक ना.
भोले बाबाचें खरें नांव सूरज पाल. तो एटा जिल्ह्यांतल्या बहादुर नागरी गांवांत रावपी. शिक्षण घेतले उपरांत युपी पुलिसांत नोकरी मेळ्ळी. सुरज पाल २८ वर्सां आदीं हेड कॉन्स्टेबल म्हणून काम करतना इटावा हांगा ताका तैनात केल्लो. तेन्ना ताचेर लैंगीक छळ केल्ल्याचो गुन्यांव दाखल जाल्ल्यान नोकरेंतल्यान काडून उडयलो. बंदखणींतल्यान सुटले उपरांत ताणें आपलें नांव बदलून नारायण हरी उर्फ साकार विश्वहरी अशें दवरलें आनी तो धर्मोपदेशक जालो. लोक ताका भोले बाबा म्हणपाक लागले. मेळाव्यांत ताची बायलय ताचे सयत वता.
बाबाचो आश्रम गांवांत ३० एकरांनी पातळ्ळा. जंय खंयच्याच देवाची मूर्त ना. दर दिसा १२ हजार लोक आश्रमाक भेट दिताले अशें सुत्रांनी सांगलें. तो गाडयांच्या ताफ्या सयत भोंवता. प्रसार माध्यमां पसून अंतर दवरपी हो बाबा. अनुयायी ताची शंकर म्हूण उपासना करतात. ताका लागून ताका भोले बाबा हें नांव मेळ्ळें.
भोले बाबा हेर बाबां भशेन भगवे कपडे घालिना. तो थ्री पीस सूट आनी रंगीत वक्ल घालून सत्संगांत दिसता. सूट आनी बूट हांचो रंग सदांच धवो आसता. जायते फावटीं तो कुर्ता-पायजामा आनी तकलेर धवी टोपी घालून सत्संगाक येता. भोले बाबा आपल्या मेळाव्यांनी दावो करता, १८ वर्सां सेवा केल्या उपरांत ९० च्या दशकांत व्हीआरएस घेतलो. ताका सरकारी नोकरे थावन अध्यात्माक कोणे ओडलो हें खबर ना. व्हीआरएस घेतले उपरांत देवाची जाणविकाय जाली. ही कूड देवाचोच भाग आसा हें देवाचे प्रेरणेंतल्यान प्रकट जालें. हाचे उपरांत ताणें आपलें जिवीत मनशाच्या कल्याणा खातीर ओंपपाचें थारायलें.
उत्तर प्रदेश, राजस्थान आनी मध्य प्रदेशांत भोले बाबाचे अनुयायी आसात. अनुसूचित जाती/ जमाती आनी ओबीसी वर्गांत तांणी खोलायेन प्रवेश केला. मुसलमान समाजांतले लोकूय अनुयायी आसात. बाबाचें युट्युब चॅनल आनी फेसबूक पेजूय आसा. युट्युबाचे ३१ हजार सब्सक्राइबर आसात. भोले बाबाच्या सैन्याक सेवादार म्हणटात. दर मंगळारा जावपी कार्यावळीचें आयोजन हे सेवादार पळयतात. सेवादार देशांतल्यान येवपी भक्तांक उदक, जेवण आनी येरादारीची वेवस्था करतात.
भोले बाबाच्या सत्संगाक हाजीर आशिल्ल्या दरेका भक्ताक उदक वांट्टात. हें उदक पिल्यार तांचे सगळे प्रस्न सुट्टात अशें बाबाचे अनुयायी मानतात. एटाच्या बहादुर नगर गांवांतल्या बाबाच्या आश्रमांत दरबार जाता. आश्रमा भायर हातपंपूय आसा. ह्या हँड पंपांतल्यान उदक पियेवपा खातीर भक्तांच्यो लांब रांको लागतात.
भोले बाबाचेर जमनी हडप केल्ल्याचे जायते आरोप आसात. साकार विश्वहारी ग्रुपार कानपुरच्या बिधनु पुलीस स्टेशन हद्दींतल्या करसुई गांवांत ५ ते ७ बिघा जमिनींचेर बेकायदेशीरपणान कब्जो केल्ल्याचो आरोप आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
