भांगरभूंय | प्रतिनिधी
अादल्या तेंपार बाजारपेठेचेर कागदाचो शेक चलतालो. म्हणल्यार कड्डण, भाजी, फळां, मसालो, कांदे, बटाटे, नुस्तें… सगलें कागदांत गुठलावन दिताले. ते खातीर कागदाचे दोणें वा खाकी पोतयो वापरताले. आयजूय बेकरेंत ह्यो पोतयो वापरतात. प्लास्टिकान बाजारांत पावल दवरलें आनी सगलें चित्रूच बदलून गेलें. आतां सगलेंच प्लास्टीक पोतयांनी. इतलेंच न्हय, तर चिप्स, बिस्किटीं सयत बरोचसो म्हाल आतां प्लास्टीक पोतयांनीच तयार जावन येता. प्लास्टीक हें जमनींत कितलींय वर्सां पुरून उरलें तरी विरघळून वचना. चिरंतन अशी ही वस्त. म्हणटकच कोयर वाडलो. स्वराज्य संस्था ओलो आनी सुको कोयर एकठांय करतात. उरिल्ले लोक तो सरळ रस्त्या कुशीक व्हरून उडयतात. पालिका मागीर अदीं मदीं येवन तो उखलता. भोवतेक पालिकां कडेन कोयराचेर प्रक्रिया करपाची सुविधा ना. देखून तांकां तो खंय तरी पयस व्हरून उडोवचो पडटा वा साळगांव सारकिल्ल्या प्रकल्पांनी पावोवचो पडटा. हे प्रकल्प राज्यभरांतलो कोयर हाता वेगळो करपाक शकनात. म्हणटकच सरकार आनीक प्रकल्प सुरू करपाक जागो सोदता. मात तांकां सगले कडेन विरोधाक तोंड दिवचें पडलां.
वेर्णेंच्या नियोजीत कोयर प्रक्रिया प्रकल्पाक खर विरोध जावपाक लागला. वेर्ण्यांच न्हय, तर राज्यभरांत लोकवस्ती आसा वा ना थंय पसून लोक विरोध करपाक लागल्यात. इतलेंच न्हय, शेजराच्या पंचायत वाठारांतल्या कोयराक दुसरी पंचायत आपले हद्दींत घेना जाल्या. हाचे वयल्यान चित्र स्पश्ट जाता. छत्रपती शिवाजी महाराज जल्माक येवचो, पूण तो आपल्या घरांत न्हय, तर दुसऱ्याच्या, अशें एक वाक्य आसा. तशीच ही गजाल. कोयर करतले आमी, आमचो कोयर, पूण तो आमच्या वाठारांत नाका. दुसरे कडेन खंयूय व्हरून उडयल्यार जाता, ही आमची मानसिकताय. वेर्णेंचे नागरीक म्हणटात, ह्या कोयर प्रकल्पाक लागून जुवारी, साळ न्हंय प्रदुशीत जातली. वेर्णें सड्याचेर 32 झरे आनी तळें आसात. झऱ्याचें उदक न्हंयांनी वता. लोकूय ह्या झरींचें उदक वापरतात. कोयर प्रकल्प आयल्यार ताचें घाणयारें उदक ह्या झऱ्यांनी मिस्तुरात जावन न्हंयेंत वतलें आनी उदक प्रदुशीत जातलें. जैवविवीधतेचेरूय परिणाम जातलो. हांगा दरदिसा अडिचशे टन कोयर हाडटले. म्हणटकच ट्रकार ट्रक येतले. ताका लागून कोयराचो दुर्गंध वातावरणांत भरून उरतलो. तातूंत प्रकल्पांतल्यान घाण येतली. साहजिकूच लोकांचे भलायकेचेर परिणाम जातलो, असो दावो लोकांनी केला. वेर्णें, नागोवा, नुवें, लोटले आनी सरभोंवतणच्या वाठारांतल्या लोकांचो ह्या प्रकल्पाक खर विरोध आसा.
कांय वर्सां पयलीं पणजे कोयर प्रक्रिया प्रकल्प सुरू करपाचो जाल्लो तेन्ना कांय जाणांनी विदेशांत अभ्यास वारी केल्ली. कोयर प्रकल्पाच्या तेंकून पसून उबो रावल्यार घाण येवची ना, अशें तेन्ना कांय राजकारण्यांनी म्हणिल्लें. मात, आतां पणजे दिवजां सर्कला कडेन उबे रावल्यार दुर्गंध येता. मांडवी पुलारूय घाण येता. सोनसड्या विशीं ना उलयिल्लें बरें. देखूनच वेर्ण्याय तशेंच जातलें, अशें जर थंयच्या लोकांनी मनांत धरलें जाल्यार तांकां दोश दिवपाक मेळचो ना. हो प्रकल्प जावचो न्हय, म्हूण ते 2022 सावन विरोध करतात. ताका लागून सरकारान समिती नेमिल्ली. तिणें थळाव्यांचें म्हणणें आयकून भौशीक सुनावणी घेवची, असो अहवाल दिल्लो. विरोधकांच्या म्हणण्या प्रमाण प्रकल्प जाल्यार नेमकें कितें जातलें, हाचो अहवाल आमी समितीक दिला. ते वटेन वेर्णेंचो कोयर प्रकल्प सामको अत्याधुनीक आसतलो. ताचे पसून कसलेंच प्रदुशण जावचें ना, असो दावो गोंय घन कोयर वेवस्थापन मंडळान केला. लोकांच्या मतान त्या दाव्यांत खरसाण ना. साळगांव प्रकल्पाक लागून जैवविवीधताय आनी लोकांचेर कितें परिणाम जाता, ताची आमकां म्हायती आसा, अशेंय तांचें म्हणणें. थळावे आमदार आलेक्स सिक्वेरा पर्यावरण मंत्री आसात. तांणी हातूंत लक्ष घालचें आनी हो प्रकल्प दुसरे कडेन व्हरचो, अशी मागणीय विरोधकांनी केल्या. आतां आमदार सिक्वेराय कात्रेंत सांपडल्यात.
असो सगल्याकूच विरोध जावपाक लागलो जाल्यार कोयराचें कितें करपाचें? व्हडले प्रकल्प उबारचे परस प्रत्येक पालिका आनी पंचायतींक निदान दोन पंचायती, पालिका वाठारांतल्या कोयराचेर प्रक्रिया करपाक मेळटली, हे तांकीचो प्रकल्प उबारपाक सरकारान मजत करची. कांय पालिका हें करपाक सक्षम आसात. जांचे कडेन जमीन, पोरसूं आसा, तांणी आपापल्या ओल्या कोयराचो सोंपेपणी विलो लावं येता. ते खातीर शेतकी खातें मजत करपाक शकता. पूण, कितेंय जालें तरी कोयर प्रक्रिया प्रकल्प ही काळाची गरज जाल्या, इतलो गोंयांत कोयर वाडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
