भांगरभूंय | प्रतिनिधी
नाटकां म्हणलीं की दोळ्यां मुखार येतात ती भरजरी कपडे घालून हातान तरसादी, गदा घेवन केल्लीं इतिहासीक आनी पौराणिक नाटकां. पयलीं जात्रा काल्यांनी गांवचे लोक हौशी नाटकां करताले. पूण हळू हळू तो जागो वेवसायीक नाटकांनी घेतलो आनी जात्रे, काल्यांनी बरीं- बरीं वेवसायीक नाटकां करपाची सर्तूच सुरू जाली. पळयता- पळयता ह्या सर्तींनी कितल्योशोच संस्था वांटेकर जावन दर वर्सा 50, 75, 100 प्रयोग करून उंचेल्या पांवड्यार पावल्यो आनी सहज प्रेक्षकांच्या काळजार राज्य करुंक लागल्यो.
अशीच एक नावाजलेली संस्था म्हणजे “गौरी तनय कला संघ धोणशी नागेशी”. गेली चोवीस वर्सां ही संस्था दर वर्सा नवीं दर्जेदार नाटकां प्रेक्षकां मुखार सादर करीत आयल्या. फक्त विनोदी नाटकांच न्ही तर ‘उठ गा देवा’, आजून कांयच जावना, भूंय म्हजी भांगराची, आतां तरी जागे जायात अशीं दर्जेदार आनी सत्य घटनेचेर आदारीत नाटकां कोंकणी नाट्य सर्तींनी सादर करून प्रेक्षकांचीं मनां जिखल्यांत. घरान माव जाता तें जावं, धर ताका सोडू नाका, काय बरी सून माय जाली हून, दिसता तशें नासता, बायल नट्टा घोव रडटा, चेडो म्हजो रेडो, वासू आतां आंसू, मोग असो करता पिसो, झक्क मारले आनी लग्न केलें, कर्मा तूजी दैना म्हजी, यादू जालो जादू, भाचे करता मोग मामा लायता फोग, गुरुची कमाल बायलांची धमाल, घोवा बायलें झगडीं बाबूराव घालता फुगड़ी, भुरगी मिरयता बापूय जिरयता, जावय शेणलो मावोड्ड्या, अशीं विनोदी नाटकां सादर करून आपलो वेगळो असो प्रेक्षकवर्ग निर्माण केला.
पोरूं माय कास्ताद सून वस्ताद ह्या विनोदी नाटकाचे नॉन स्टॉप 111 प्रयोग करून अंदूंय हे संस्थेन शेजारी आमी शेजारी ह्या नाटकाचे सगळ्यांत पयलीं आनी सगळ्यांत फ़ास्ट जैतवंत 115 प्रयोग सादर करून लोकांचीं मनां जिंकल्यात. संस्था ही आपलो दुसरो परिवार अशे मानून चलपी आनी मना पासून आपली संस्था तिगोवन दवरपी “युवा पुरस्कार” जैतवंत तुळशीदास धोणशीकार म्हणल्यार ह्या संस्थेचो मुखेल खांबो. जो दर वर्सा नवीं- नवीं नाटकां बरोवन आनी त्या नाटकांनी आपल्या अभिनयाचो रंग सारोवन आपली संस्था सांबाळपाचें काम करता. तसोच दुसरो खांबो म्हणल्यार कलाकार दुर्गादास नारू नाईक, जो एक उत्कृष्ठ लेखक, दिग्दर्शक, अभिनेतो, कवी, आनी गायक जावन आसा. जो आपल्या दिग्दर्शनान आनी आपल्या गोड अभिनयान आपल्या संस्थेचो भार पेलपाचो पुरेपुर यत्न करता. फाटलीं अठरा वर्सां ही जय विरुची जोड़ी सातत्यान नाट्य मळार वावुरता. आपल्या गांवचे तशेंच हेर गांवच्याय नवे कलाकारांकय ते आपल्या संस्थेंत सुवात दिवन आपली कला सादर करपाची संद दितात. ह्या वर्सा तर तांच्या नाटकांत दिवचल- कारापुरचो कलाकार प्रितेश डिचोलकार, करमळीची कलाकारा कु. प्रणीता काणकोणकार आनी फोंडेची कलाकारा दियांका नायक आशिल्ली.
हे संस्थेचीं नाटकांच हांसोवपी आनी बरो संदेश दिवपी आसल्या कारणान प्रेक्षक सहज तीं उबारून धरता. ह्याय वर्सा तांचें शेजारी आमी शेजारी हें नाटक तशेंच आशिल्लें. शेजारी शेजारी केन्नाच झगडूं नाकात, माये मोगान रावात हो निमणो मोलादिक संदेश ह्या नाटकांत दिला.
अशा ह्या नाटकाचे 115 प्रयोगूच न्हय तर 215 लेगीत जाल्ल्यार कमीच अशे म्हाका तरी दिसता. नाटक आतां फक्त हौशे पुरतें उरुंक ना, तर पोट भरपाचेंय एक बरें साधन जालां. हें गौरी तनय कला संघान आनी हेर वेवसायीक संस्थांनी दाखोवन दिल्लें आसा.
रुपेश नायक भामयकार
9049569517
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
