भांगरभूंय | प्रतिनिधी
आमदार, मंत्री, मुख्यमंत्री अशा उंचेल्या पांवड्यार बशिल्ल्या व्यक्तींनी जबाबदारीन उलोवप गरजेचें आसता. मात आमचे कांय राजकारणी जबाबदारीन वागतना दिसनात. भौसांत आसतना कशें उलोवप आनी कितें उलोवप हाचेर लेगीत स्वताचें लक्ष आसपाक जाय आनी जिबेचेर नियंत्रण आसपाक जाय. गोंयांतली फेणी बरी म्हूण ती इल्ली ‘कुट्ट’ करात अशें भौसांत, तेंवूय बी सरकारी कार्यावळींत म्हणप फक्त चुकूच न्हय तर अशें उलोवपी व्यक्ती ही बेजापसालदार हें सिद्ध जाता.
ह्या सप्तकांत गोंयांत दोन दिसां खातीर सोऱ्याचो, म्हणल्यार ‘कुट्टेलाचो’, विशय गाजलो. विशय आशिल्लो ‘‘शिक्षणीक थळां लागीं आनी धर्मीक थळां लागीं चलपी बार्रांचो’’. फाटलीं चार दसकां अशा सुवातांनी बार्रां चलतात. पूण ह्या बार्रांचो वा थंय नव्यान येवपी बार्रांचो परवानो/नुतनीकरण शुल्क दुपेटीन वाडयिल्ल्याची अधिसुचोवणी सरकारान उजवाडायतकच विरोधी पक्षांतले फुडारी कसलेंच भान नासतना ‘राजकी फुगड्यो’ घालतना दिसले. जेन्ना शिक्षणीक संस्था वा धर्मीक संस्थांचो उल्लेख जाता तेन्ना भान दवरून आनी जबाबदारीन वागप हें दरेकल्याचें कर्तव्य आसता. तातूंत राजकारण्यांनी तर खुबूच जतनाय घेवंक जाय आनी जबाबदारीन वागपाक जाय. कित्याक तर ते जें कितें उलयतात तें तांचे समर्थक उखलतात आनी विशय तापता. पूण ह्या विशयाचेर विरोधक जबाबदारीन वागतना दिसले नात.
भाजप सरकारान नवो कायदो हाडून धर्मीक आनी शिक्षणीक संस्थां लागीं बार्रां उक्तीं करपाची मेकळीक दिल्या अशे तरेचें चित्र विरोधकांनी तयार केलें. जें चूक आशिल्लें. पूण हे चुकीचो पश्चताप विरोधकांक जायना आनी ते ‘चुकीची दुरुस्ती’य करिनात. केली जाल्यार लोक तांकां ‘सिरयस’ घेतले? घेवचे नात!
विरोधी पक्ष फुडारी युरीबाब आलेमांव हांणी तर सरकाराक ह्या विशया वयल्यान लक्ष्य करपाचो यत्न केलो. देवळां आनी शिक्षणीक संस्थां लागीं बार्रांक येवपाक दिवपाची ही अधिसुचोवणी सरकारान बेगोबेग फाटीं घेवची अशी मागणी तांणी केली.
सरकार जर धर्मीक थळां कडेन आनी शिक्षणीक संस्थां लागीं, म्हणल्यार 100 मिटरां भितर, बार्रां घालपाची परवानगी दिता वा कायदो हाडटा जाल्यार ताचो विरोध जावंकच जाय. मात सरकारान करूंक नाशिल्ली गजाल केल्या म्हूण सांगप हें विरोधी पक्ष फुडाऱ्याक सोबना. आनीक कसल्याय विशयाचेर राजकारण करपा खातीर मुद्दो उपस्थीत केलो जाल्यार समजूंक शकता, पूण जंय धर्म आनी शिक्षण आसता, थंय नियंत्रणान वागचें अासता.
युरीबाब आलेमांव हे युवा राजकी फुडारी. तांचे कितलेशेच जाण ‘फॉलोवर्स’ आसतले. ते सोशल मिडियाचेर कितें पोस्ट करतात तें शॅर करपीय लोक आसतले. तांणी चूक बरयल्यार लोकां मदीं चूक पावतली हें मतींत दवरपाक जाय. दुसरें म्हुणल्यार लोकांचो तांचेर जो विस्वास आसा तो तांणी कमी जावंक दिवंक जायना.
ही चूक युरीबाब आलेमांव हांणी एकल्यानूच केली अशें ना. पूण गोंयच्या राजकारणांत जांकां अभ्यासू आनी हुशार राजकारणी म्हूण वळखतात ते गोवा फॉरवर्डचे मुखेली विजयबाब सरदेसाय हांणीय ह्या मुद्याचेर सरकाराक धारेर धरपाचो यत्न केलो.
हातूंत राजकारण्यांकूच जबाबदार धरून जावचें ना, कित्याक तर एका राष्ट्रीय पांवड्या वयल्या दिसाळ्याक लेगीत जबाबदार धरचें पडटलें. कित्याक तर ‘‘धार्मीक आनी शिक्षणीक संस्थांच्या 100 मिटरां भितर बार्रां हाडपाची सरकाराची अधिसुचोवणी’ अश्या आशयाची बातमी ह्या दिसाळ्याचेर छापून आयली. ते उपरांत ती बातमी राजकारण्यांनी उखल्ली आनी त्या विशयाचो अभ्यास करिनासतना सरकाराक कात्रेंत हाडपाचो पोको यत्न केलो.
गोवा लिकर ट्रेडर असोसिएशनान मात सावध भुमिका घेवन खरी परिस्थिती मांडली. कित्याक तर सरकारा बराबर तांकांय हो विशय खबर आशिल्लो. खबर नाशिल्लो तो विरोधकांक. पूण इतलो आवाज करून विरोधकांनी किदें सादयलें? दुसऱ्या दिसा अर्द मिणटांची ‘बायट’ दिवन मुख्यमंत्री प्रमोद सावंत हांणी ह्या विशयांतलें वारेंच काडलें आनी विरोधकांची चूक दाखोवन दिली.
धर्मीक आनी शिक्षणीक संस्थां लागीं आपणें बार्रां हाडूंक नात, तर 1980 सावन हें अशेंच चालू आसा अशी म्हायती दितना तांणी आदली अधिसुचोवणीय दाखयली. आपणें आपल्या कार्यकाळांत अश्या सुवातांनी एकाय बार्राक परवानगी दिवंक ना. आपणें शुल्क वाडोवन अश्या बार्रां मुखार आडमेळ्यो निर्माण केल्यात अशेंय तांणी सांगलें आनी विरोधकांक सामकेच पंक्चर केले.
गोवा लिकर ट्रेडर असोसिएशनाक लेगीत धर्मीक आनी शिक्षणीक थळां लागीं बार्रां आयिल्लीं नाकात. समाजांत रावतना आपलें समाजा खातीर आशिल्लें देणें हें तांकांय खबर आसा आनी ते खातीर ह्या संघटणेचे अध्यक्ष दत्तप्रसाद नायक हांणी अश्या सुवातांनी बार्रां घालीं म्हूण ताचो पर्यटनाक कसलोच फायदो जावचो ना अशें म्हणलें.
तांच्या म्हणण्या प्रमाण सोरो हें दुदा सारकें पेय न्हय, जाची गरज घराघरांत लागता. हे खातीर अश्या सुवातांनी परवाने दिवंकूच जायना.
मुळांत हो विशय खूब नाजूक आनी समजून घेवपाचो आसा. धर्मीक आनी शिक्षणीक संस्थां लागीं बार्रांक परवानगी दिवपाचो अधिकार थेट अबकारी खात्याक ना, तर हो विशय मुख्यमंत्र्याच्या अधिकार क्षेत्रांत येता. तो काडून उडयलो जाल्यार कितल्या बार्रांचेर हावळ येत सांगूंक शकना. मुख्यमंत्र्यांच्या म्हणण्या प्रमाण सुमार हजारभर बार्रां अशा सुवातांनी आसात. तीं बंद पडलीं जाल्यार, तांकां न्यायालयांत वच्चें पडटलें आनी आंदोलनांय करचीं पडटलीं.
2017 वर्सा जेन्ना पालिका आनी शार वांठारांतल्या (राष्ट्रीय आनी राज्य ) म्हामार्गाच्या 500 मिटरां भितर आशिल्लीं बार्रां बंद करपाचो निर्णय सर्वोच्च न्यायालयान दिल्लो, तेन्ना सोऱ्याचो वेवसाय करपी गोंयचे हजारांनी लोक आंदोलनां करताले. ते उपरांत न्यायालयान ही मर्यादा 220 मिटरांचेर हाडिल्ली. सर्वोच्च न्यायालयाचो असो आदेश आसतनाय जर खंयच्याय सरकारान पर्वरे सारक्या महामार्गां लागीं आशिल्ले सुवातेंत कोणाकूय बार्राचो परवानो दिला आसत जाल्यार सरकाराच्या कारभाराचेर बोट दाखोवचेंच पडटलें. अशा वेळार आमच्या विरोधकांनी बोवाळ घाल्यार जाता. पूण अशे परवाने घेवपी सादे मनीस आसतले व्हय? तांच्या विरोधांत विरोधक उलयतले? ना!!!
संजय बोरकार
(लेखक आयएएनएस ह्या राष्ट्रीय खबरां संस्थेचे गोंयचे मुखेल प्रतिनिधी आसात)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
