भांगरभूंय | प्रतिनिधी
गिमांतलें रखरखीत वताचें दीस सरून पावसाचें दीस येतात. हवामानांत अचकीत बदल घडिल्ल्यान ताचो मनशाचे कुडीचेर लेगीत वायट परिणाम जाता. पावसांच्या दिसांनी कुडीत थंडी, जोर येवपा सारकिल्ल्या दुयेंसांक कांय लोक सैमीक मानतात. पूण जोर आनी थंडी एक जातकूच नाक व्हांवप, खांक येवप, रूच कडू – उणी जावप, भूक लागनासप सारकिल्ल्या कारणांक लागून कूड कमजोर जाता. निमाणें दोतोराक दाखयले बगर थाकाय मेळना. ताचेर उपाय घरांत आसता. पूण तो आमकां खबर नासता. ‘हांडीर चेडो आनी सोदता सगलो वाडो’ ह्या कोंकणीतले म्हणी प्रमाण. दर वर्सा दोतोर आनी वखदां बदलत रावतात. घरांत जेवणाचें जिन्नस करपाक आलें वापरतातूच आनी आलें खावप थंडी आनी खोंकलेचेर एक गुणकारी उपाय.
थंडी आनी खोंकलेचेर उपाय सोडल्यार आलें गंभीर दुयेंसां खातीरय प्रभावी! भारतीय आयुर्वेदांत आलें हो वखदी तत्वांचो खजिनो मानतात. कांय जाण जेवणांत रूच हाडपा खातीर आलें वापरतात. निरोगी जिणे पद्दत आपणावपी चडशे लोक आपल्या जेवणांत आलें वापरतात. आल्याचो वापर फक्त च्या आनी कडो तयार करपा मेरेन मर्यादीत ना. पूण जायत्या गंभीर दुयेंसां खातीरय ताचो उपेग करूं येता. आयुर्वेदांत आलें खावपाचें खूब बरें फायदे सांगल्यात.
आलें हातूंत जिंजरोल नांवाचो एक पदार्थ आसता. जिंजरोल हो अँटी-ऑक्सिडेंट आनी अँटी-इन्फ्लेमेटरी एजंटांचो बरो स्रोत मानतात. आलें सेवन केल्यार कुडीची रोगप्रतिकार शक्त वाडटा. जाका लागून थंडी, फ्लू आनी व्हायरल संसर्ग सारकिल्ले प्रस्न आडावंक मेळटात.आल्याचें दाहक गुणधर्म वजन उणें करपाकय आदार करतात.
तेच बरोबर आल्याक कॉलेस्ट्रोल खूब उणें आसता. हाका लागून स्थूलताय उणी जाताच, पूण कमराची आनी नितंबांतली चरबी उणी जाता. वजन उणें करपा खातीर तुमी तुमच्या आहारांत आलें घालूंक शकतात. गोडेंमूत जाल्ल्या दुयेंतींक आलें खावप हें रामबाण वखद जावंक शकता. आलें खाल्यार कुडींतली रगतांतली साकर उणी जाता.
त्याच वेळार टायप 2 गोडेंमूत जाल्यार आलें खावप बरें. हाचे भायर आलें सेवन केल्यार ऑक्सिडीभवन ताण येना. ताका लागून काळजाच्या दुयेंसांचो धोको उणो जाता.
आल्याचें सेवन केल्यारय पचन तंत्र निरोगी दवरूं येता. आल्याच्या आदारान अन्न सहज पचता. देखून अपचनाची भिरांत ना. नेमान सेवन केल्यार पोट दुखप, थंडी, फुगप, उलटी जावप सारकिल्ले प्रस्न आडावंक शकतात. मासीक पाळीच्या वेळार बायलांक पोटांत खूब दुखता. अशा वेळार आलें खाल्यार हो बायलां खातीर एक व्हड उपाय जावंक शकता. बायलांक दीसपट्ट्या आहारांत आलें घालून मासीक पाळीच्या त्रासांतल्यान सुटका मेळूं येता.
वखदी गुणधर्मांनी भरपूर आशिल्लें आलें कॅन्सरा सारक्या गंभीर दुयेंसां आड झुजपाकय उपेगी पडटा. जिंजरॉलांत आशिल्ले अँटी-ऑक्सिडेंट आनी अँटी-इन्फ्लेमेटरी गुणधर्म कॅन्सराक आडावपाक वावुरतात अशा वेळार कोलोरेक्टल कॅन्सर, स्वादुपींड कॅन्सर आनी यकृत कॅन्सर जावपाची शक्यताय उणी आसता म्हणून आल्याचो वापर करात आनी निरोगी रावात.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
