भांगरभूंय | प्रतिनिधी
दर वर्सा कितलीं तरी घरां आनी कारखाने एकल्या कडल्यान दुसऱ्या कडेन वतात. मागीर ह्या पयलींच्या मालकान भरिल्ल्या डेपोझिटाचें कितें जाता? खंय वतात काय हे दुडू? अशे कितले तरी लाख वीज खात्या कडेन आसूंक जाय.
गोंय सरकारान लोकसभा वेंचणुके उपरांत लायटीचे दर वाडोवन गोंयकारांक बरें इनाम दिलें. आतां हेंच निमित्त करून होटॅलांतल्या खाणाजेवणाचे दर वाडले म्हणून अजाप जावपाची गरज ना. लायटीचेर चलपी गाडयांचें भाडेंय वाडप साहजीक. म्हणटकूच गोंयांत आनीक इल्ली म्हारगाय वाडली तर अजापाची गजाल म्हणूंक जावची ना. हालींच कर्नाटक सरकारान पेत्रोल आनी डिझलाचे दर वाडयले म्हणून खटाखट फटाफट करप्यांनी अजून तरी गोंय सरकारन लायट वाडयली म्हणून सटासट केल्लें वाचूंक मेळना. पेत्रोल डिझल कितें वा लायट कितें सगल्यो गरजेच्यो गजाली. त्यो वाडल्यो म्हणजे म्हारगाय वाडटलीच. पूण कर्नाटकाच्या नांवांन सोशल मिडियाचेर बोवाळ घालपी आपल्याच सरकारान म्हारगाय वाडोवंक हातभार लायला ताचेर जाप काडिनात तें पळोवन अजाप जाले बगर रावना. निमाणें कितें तर ‘आपला तो बाब्या आनी दुसऱ्याचा कार्ट्या’ म्हणटात तें फट न्हय. आतां कर्नाटकच्या पेत्रोल डिझल दरवाडीक विरोध करपीच लोक गोंयांत लायट वाडोवप कितलें गरजेचें आसलें हाचेर प्रवचनां दितना आयकूंक येतलें. श्रीपाद भाऊ केंद्रांत वीज राज्यमंत्री जालो आनी गोंय सरकारान गोंयचे जनतेक ही वीज दरवाडेची भेट दिली म्हणूंक जातलें? अर्थांत हांगा केंद्राक दोश दिवंक मेळचो ना. कारण ही दरवाड राज्य सरकारान केल्या.
तशें आमचें वीज खातें सदांच लुकसाणेंत आसता. कितलीय दर वाडयली म्हणून वीज खातें केन्नाच फायद्यांत येवचें ना. तिजोरेक तसो बुराक पडलो म्हणजे आयिल्ली येणावळ भितर उरतली कशी? ह्या खात्यांतले पयशे वतात खंय ताची खरें म्हणल्यार चवकशी करूंक जाय. कारण वीज खात्यान फाटलीं पंचवीस वर्सां तरी लायटीचे खांबे वा सरयो बदलूंक ना. ट्रान्सफॉर्मर आसात तेय पयलींचेच. खंयूय जर एखादी कॉलनी येता वा एखादो बिल्डर बिल्डींग बांदता जाल्यार थंय जाय आशिल्लो ट्रान्सफॉर्मर हाडूंक बिल्डराक पयशे दिवचे पडटा. उपरांत कोणूय कनेक्शन मागता तेन्ना कनेक्शन केबल ते मिटराचे पयशे खात्या कडेन पयलींच जमा करचे पडटात. इतल्यान जायना, कनेक्शन घेतना आमचे कडेन कनेक्शन केबल ना म्हणपाचें आयकूंक मेळटा आनी कशें तरी कनेक्शन मेळचें म्हणून ते सांगता त्याच दुकानांतल्यान केबल हाडून दिवची पडटा. म्हणजेच कनेक्शन घेतल्याक डबल खर्च. सगलो खर्च जेन्ना कंज्युमर करता तेन्ना खात्याचे पयशे खंय वतात? आनी तांकां खर्चूच करचो पडना तेन्ना खातें लुकसाणेंत कशें? कोणूय सोडयत हें कुवाडें?
जेन्ना कोणूय आपलें घर विकता तेन्ना तो वीज कनेक्शन घर घेतिल्ल्याच्या नांवांर करूंक सांगता. विकतल्यान कनेक्शन घेतना डेपोझीट भरिल्लें आसता. घर विकलें म्हणजे नव्या मालकाक कनेक्शन आपल्या नांवांर करूंक परतें नवें डेपोझीट भरचें पडटा. पूण विकतल्याक ताणें आदीं भरिल्लें डेपोझीट परतें मेळना. दर वर्सा कितलीं तरी घरां आनी कारखाने एकल्या कडल्यान दुसऱ्या कडेन वतात. मागीर ह्या पयलींच्या मालकान भरिल्ल्या डेपोझिटाचें कितें जाता? खंय वतात काय हे दुडू? अशे कितले तरी लाख वीज खात्या कडेन आसूंक जाय. इतलेंय आसून खातें लुकसाणेंत कशें? बुराक खंय पडला तो पळोवचो सोडून कंज्युमराच्या बोल्साक बुराक घालप कितलें योग्य? सरकार हाचेर विचार करीत?
आयच्या काळांत वीज म्हणटात ती गरजेची जाल्या. विजे बगर आमचें पावल उखलना म्हणल्यार जाता. पूण ही वीज आमकां सारकी बरी मेळटा व्हय? विजेचो दर वाडयलो म्हणून तरी वीज वेवस्थीत मेळटली? दिसाक चारचारदां वता ती अखंडीतपणान येतली? कोण दितलो हाची गॅरंटी? मात्शें कितेंय काम करूंक बसतां म्हणल्यार लायट गुल. लायट गेली म्हणजे लागली वाट. केन्ना येतली तेंय कोणाच्यान सांगूक जावचें ना. वीज खात्याचे फोन एक तर सदांच बिझी वा वाजत रावपाचे.
कालचीच खबर, पोस्टांत गेलों. थंयच्या मनशान सांगलें लायट ना कांयच करूंक मेळना. पाकिटाचें वजन करतलो तर लायटी बगर वजनकांटो चलना. कंप्युटर चलना, नेट ना. लायट केन्ना येतली हेंय ताका खबर ना. तो म्हणटा अर्द वरा पयलीं पंदरा मिणटांनी येतली म्हणिल्लें. ताचे उपरांत दोनदां फोन लायलो तर तीच जाप. पंदरा मिणटांनी येतली. आतां तांची पंदरां मिणटां केन्ना सोंपतलीं खबर ना. आतां आमचे दवर्ले लायट वता तें समजूंक जाता. पोरण्यो सरयो, मात्शें वारें आयलें आनी झाडा खांदी सरयेक तेंकली वा माडाचें चुडीत पडलें तरूय सरी तुटपाची आनी लायट वचपाची. पूण मडगांव – आक्यां जंय जमनी पोंदच्यान लायट गेल्या थंयूय दिसाक दोनदां लायट वचप आनी ती वर वर येवप ना हाका कितें म्हणप? कसलो विकास हो? आनी रस्त्या पोंदच्यान वायरी वचुनूय जर हेंच जावपाचें जाल्यार लायट पोंदच्यान वचून कितें फायदो? कित्याक हो खर्च करपाचो?
बेठेच रस्त्यांची वाट लावचे परस पयलींचीच खांब्या वयल्यान गेल्ली लायट बरी न्ही? खंयूय वायर तुटली जाल्यार नदरेक तरी पडटा. जमनी पोंदा खंय कितें जालां म्हूण कशें कळपाचें? फक्त रस्ते मात फोडपाचे. वीज मंत्री घडये म्हणत, ‘तुमकां कांय खबर ना.’ खऱ्यांनीच हें अशें कित्याक घडटा तें आमकां खबर ना आनी तें कळची गरज आसा. सांगात न्हय आमकां, परत परत लायट कित्याक वता? खांब्या वेल्यान गेल्ली लायट वताच पूण जमनी पोंदच्यान गेल्लीय लायट वता. लायट वचपाचीं कारणां कितें? वीज दरवाड केली म्हूण खातें फायद्यांत येतलें? आनी लायट अखंडीत मेळटली? मेळत आमकां अखंडीत लायटीची गॅरंटी? काय तीय मोदी दितलो म्हूण आमी वाट पळोवपाची?
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
