भांगरभूंय | प्रतिनिधी
कोवीड काळा पसून आडकून उरिल्ली वीज दरवाड अखेरेक आयतारच्यान लागू जाल्या. वीज नियामक आयोगान तशी मान्यताय दिल्या. युनिटा फाटल्यान 15 पयशे वाडल्यात. म्हणटकच 200 युनिटां मेरेन आनी ताचे वयर वीज वापरपी सगल्या गिरायकांक हाचो फटको बसतलो. वीज खात्याच्या जाणकारांच्या मतान, दरवाडीचो सामान्य लोकांक त्रास जावचो ना. गोंयांत अर्थीक नदरेन गरीब आशिल्ल्यांगेर पसून लायट आसा. लायटीचेर चलपी विवीध उपकरणां आसात. म्हणटकच वीज उणी वापरूं वा चड तांच्या बोल्साक खार पडटलोच. तरीय लोक लायटीचो वापर तसो उणो करपाक शकनात. कारण आयज सगलेंच लायटीचेर. गोंयांत वीज निर्माण जायना. म्हणटकच शेजराच्या राज्यांतल्यान ती विकत घेवची पडटा. सरकार म्हणटा, दर युनिटा फाटल्यान 5.68 रुपया भरचे पडटात. गिरायकांक ती 2.87 रुपयान दितात. म्हणटकच वयलें सगलें लुकसाण. पोरुंच्या अर्थीक वर्सांत, सरकारान 3057 कोटींची वीज विकत घेतली. मात, येणावळ जाली फक्त 2442 कोटी रुपया. अर्थसंकल्पांत तजवीज केल्ल्यान वयले पयशे भरले. तरीय हो वेव्हार लुकसाणेचो. ताचेर वीज खात्यान कितें तरी उपाय काडपाक जाय. पोरूं वीज गिरायकां कडल्यान आठशें ते हजार कोटी रुपया थकबाकी येवपाची आशिल्ली. तातूंतले 450 कोटी खंय सरकारी कार्यालयां कडल्यान येवपाचे आसात. हाचो अर्थ कितें?
लायटीच्या बिलाची थकबाकी आसा, ती सामान्य गिरायकाची न्हय. नाजाल्यार आतां मेरेन तांचीं कनेक्शनां तोडपाचे. थकबाकी उरल्या तें उद्देगीक मळा वयलें गिरायक. उद्देगांची वीज पुरवण बंद करीत जाल्यार गोंयांक अर्थीक नदरेन लुकसाण जातलें. पूण, खुद्द सरकाराक लुकसाण जाता ताचें कितें? फाटीं एक रकमी बील भरपाची येवजण चालीक लायिल्ली. तिचे वरवीं कितली रक्कम सरकारी तिजोरेंत आयली, तें जाहीर जावंक ना. हालींच परत एक फावट थकबाकी भरिना जाल्यार कनेक्शन कापपाचें जाहीर जाल्लें. उद्देगां प्रमाणूच सरकारी कार्यालयां, खात्यांचीय थकबाकी आसा. तोय आंकडो व्हडलो. आतां ही रक्कम कोणे आनी केन्ना भरपाची? थकबाकीची आठशे ते हजार कोटी रुपयांची रक्कम एक रकमी जावं वा हप्त्यांनी, वसूल जायना जाल्यार ताचें पानवळ वीज खात्याक, म्हणल्यार सरकाराकूच भोगचें पडटलें. म्हणटकच सरकाराक हाचेर विचार करचोच पडटलो. सामान्य गिरायकाक जो कायदो, तोच हेर गिरायकांकूय आसपाक नाका?
आतां तमनार प्रकल्पां वरवीं राज्यांत वीज येतली. ती बेगीन येवची अशें सगल्यांचें मत. मात कोण ना कोण ह्या प्रकल्पाकूय विरोध करीत आसा. एका हाय टेन्शन वीज खांब्याक लागता तितली पसून जमीन दिवपाक कांय भाटकार तयार नात खंय. थोड्यांक दिसता खांबो, सरयो आसात त्या वाठारांत शाॅक लागतलो. शेतां पिकचीं नात. हे सगले गैरसमज वीज खात्याक पयस करचे पडटले. कितेंय जालें तरी गोंयाक वीज जाय. कारण आमचें राज्य हें पर्यटन राज्य. विजेची मागणी वाडत वतली. जाणकारांच्या मतान, 2021 सावन आतां मेरेन गोंयांत लायटीचो वापर 10 टक्के वाडला. म्हणटकच लायट वापरपी घरां, आस्थापनां, उद्देग वाडल्यात. तांकां सद्दां विजेची पुरवण करप हें आनीक कांय वर्सांनी कुस्तार जातलें. तातूंत लायटीची चोरीय जाता. कांय वर्सां पयलीं एका मंत्र्याचेर तशे आरोप जाल्ले. मागीर तो धुंविल्ल्या तांदळा परसूय नितळ आशिल्ल्याचें सगल्यांक जाणवलें. आसूं. पूण विजेची बचत, थकबाकी वसुली आनी चड विजेची आयात शक्यतो बेगीन जावप गरजेचें.
विजेचें बील वाडल्यार उपकारता, पूण दर्जो सुदारपाक जाय, अशें मत कांय वेवसायिकांनी, उद्देजकांनी उक्तायलां. गोंयांत परतून परतून लायट वचपाचे प्रकार सगलेच कडेन घडटात. गांवांनी चड. थोड्यांच्या मतान 10- 12 वरां पसून लायट येना. ताचो परिणाम उदक, भलायकी सगल्यांचेरूच जाता. हाचो फटको उद्देगांक चड बसता. गडगड्याचो आवाज आयलो काय लायट चल्ली. आल्तिन्याचेर जशी लायट आसता, तशी ती सगले कडेन आसपाक नाका? सौर उर्जेचो वापर करपाचें सरकार आनी उद्देगीक संघटणांनीय फाटीं थारायिल्लें. तें खंय मेरेन पावलां? आयोगान दरवाडीक मान्यताय दिल्या, पूण पुरवण सुदारची, थकबाकी वसूल करची, बेकायदेशीर कनेक्शनां तोडून तीं घेतिल्ल्यांचेर खर कारवाय करची, अशेंय म्हणलां. ताचेरूय वीज खात्यान बेगीन पावलां उखलचीं. तांकांच तें बऱ्याचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
