भांगरभूंय | प्रतिनिधी
रगतदान हें सगळ्यांत श्रेश्ठ दान अशें मानतात. कारण हें सुरक्षीत रगत मनशाचो जीव वाटावंक शकता. गुरवारपणांत आनी भुरग्याक जल्म दितना बायलो, एनिमिया आशिल्ल्या भुरग्यांक, जायते फावट मलेरिया वा कुपोशणाक लागून, अपघातांतल्या जखमी, शस्त्रक्रिया जाल्ली व्यक्ती आनी कर्करोगांच्या दुयेतींक रगताची गरज आसता. अशा वेळार मनशान दिल्लें रगत तांचो जीव वाटावंक शकता.
रगत वापरचे पयलीं फकत मर्यादीत काळा खातीर सांठोवंक मेळटा, देखून रगताच्या बँकांनी रगताची नेमान पुरवण करपाची सतत गरज आसता. हाका लागून फावो त्या प्रमाणांत भलायकेन घटमूट आशिल्ल्या लोकांनी नेमान रगतदान करचें पडटा. देखून गरज पडटा तेन्ना तेन्ना रगत मेळटलें. हे विशीं जागृताय निर्माण करपा खातीर आनी भलायकेन बर्या लोकांक रगतदान करपाक उबर दिवपा खातीर दर वर्सा १४ जून दिसा संवसारीक रगतदात्यांचो दीस मनयतात.
संवसारीक रगतदात्यांच्या दिसा निमतान भलायकी मंत्रालयान देशांत रगत संक्रमाची मागणी चड आशिल्ले कडेन भर दिल्या. भारतांत दर दोन सेकंदाक कोणाक तरी रगताची गरज आसता. देशांत वर्साक सरासरी १.४० कोटी रगत युनिटांची गरज आसता आनी भारतांत १० लाख युनिटांचो सतत उणाव आसता. ह्या गंभीर प्रस्नाचेर उपाय काडपा खातीर मंत्रालयान रगतदान कार्यावळींची माळ सुरू केल्या, ती म्हणल्यार ‘रगतदान अमृत महोत्सव’मोहीम.
वैजकी मळार तंत्रगिन्यानाची उदरगत जाल्या तरी रगताक पर्याय ना. भलायकेन घटमूट आशिल्ल्या मनशान दिल्ल्या रगतांत तीग जाणांचो जीव वाटावपाची तांक आसता. संभाव्य दात्यांक रगतदाना पसून परावृत्त करपी गैरसमज पयस करपाची गरज आसा. डॉ. मकरंद गणपुले हांणी हे गैरसमज पयस करपाचो यत्न केलो.
रगतांत नेमकें कितें आसता?
रगतदान करचे पयलीं रगतांत नेमकें कितें कितें आसा आनी आमचे कुडींत ताचें काम कितें तें समजून घेवप गरजेचें. रगताचें मुखेल काम म्हळ्यार पेशींत ऑक्सिजन व्हरप आनी पेशींत तयार जावपी कार्बनडाय-ऑक्सायड पुलमांवांत व्हरप. रगताचें काम म्हळ्यार आमकां जेवणांतल्यान मेळपी पोशक तत्वां, प्रथिनां, कार्बोहायड्रेट पेशींत व्हरप. रगतांत तांबडी रगतपेशी, धवी रगतपेशी, प्लेटलेट आनी प्लाझ्मा आसता. तांबड्या रगतपेशींचें काम म्हळ्यार ऑक्सिजनाची येरादारी करप. धव्या रगतपेशींचें काम म्हळ्यार संसर्ग आनी हेर दुयेंसां आड झुजपाक आदार करप. जखम जाल्यार गोठेवप आनी रगत थांबोवप हें प्लेटलेटांचें काम. प्लाझ्मा म्हळ्यार रगतांतलें उदक. प्लाझ्मांत वेगवेगळे पोशक तत्व आसतात, ताचें मुखेल काम म्हळ्यार तांकां आमचे पेशींत व्हरप. तशेंच प्लाझ्माचें मुखेल काम आसता, नाका आशिल्ले घटक कुडींतल्यान मुत्रपिंडांत व्हरप, अशी म्हायती डॉ. गणपुले हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
