भांगरभूंय | प्रतिनिधी
आयज 14 जून. आयचो दीस पुराय संवसारांत संवसारीक रक्तदान दीस म्हूण मनयतात. ऑस्ट्रेलियांतले डॉ. कार्ल लॅडस्टेनर ह्या संशोधकाच्या यादी निमतान हो दीस संवसारीक रक्तदाता दीस म्हूण मनयतात. 14 जून हो तांचो जल्मदीस. डॉ. कार्ल लॅडस्टेनर हांणी ‘एबीओ’ हो नवो रक्तगट सोदून काडलो. तांच्या ह्या संशोधना खातीर तांकां नोबॅल इनामूय मेळिल्लें.
पयलो संवसारीक रक्तदान दीस 2005 वर्सा मनयिल्लो. उपरांत दर वर्सा हो दीस मनयतात. दरेक वर्सा एक सुत्र घेवन हो दीस मनयतात. पूण सुरक्षा, रक्तदान श्रेश्ठ दान, डोनेट प्लेटलेट्स हे सारके सुत्र घेवन ताची म्हायती ह्या दिसा दितात. रक्तदानाचें आवाहन करतात. संवसारीक भलायकी संघटणेन जाहीर केल्ल्या ह्या दिसाच्या साजरीकरणांत रेड क्रॉस सोसायटीचो व्हड प्रमाणांत वांटो आसता. कावन्सील ऑफ युरोप ही संघटणा लेगीत रक्तदाना विशीं व्हड प्रमाणांत लोकजागृताय करता. भारतांत लेगीत विवीध सरकारी, समाजीक, सेवाभवी संस्था ह्या दिसाचें आयोजन करून लोकां मदीं रक्तदाना विशीं लोक जागृताय करतात.
ह्या दिसा रक्तदात्यांचो भोवमान करतात. रक्तदान शिबिराचें आयोजन करतात. रक्तदान श्रेश्ठ दान अशें म्हणटात, कारण, ह्या दानाक लागून मनशाचो जीव वाटावता. सुरक्षीत रगत ही हालींची वैश्वीक समस्या निर्माण जाल्या.
दर वर्सा 9 कोटी युनिटा परस चड रक्तदान करतात. तरी लेगीत रगताचो उणाव जाणवता. अपघातग्रस्त व्यक्ती, शस्त्रक्रिया जाल्ली व्यक्ती, रगतांतल्यो त्रुटी आशिल्ले व्याधीग्रस्त व्यक्ती. बाळंतपणा वेळार बायलांक येवपी मरण आनी कुपोशण, विवीध प्रकारचें भुरग्यांचें मरण, धामीचीं दुयेंसां अशा वेळार रगताची खूब गरज पडटा. कोरोना काळांत जाल्यार रगताचो कसो उणाव जाणवलो हें आमी पळयलांच. कोरोना काळांत रक्तदान शिबिरां बंद आशिल्ल्यान देशांत रक्तदानाचो सुमारा भायर उणाव जाणवल्लो. रगताच्या उणावाक लागून खूबश्यो शस्त्रक्रिया मुखार धुकलच्यो पडिल्ल्यो.
प्रधानमंत्र्यांनी आनी मुख्यमंत्र्यांनी लेगीत लोकांक रक्तदान करचें अशें आवाहन केल्लें. फुडारांत लेगीत रगताचो उणाव निर्माण जावंक शकता. आपल्या रगतान कोणाचो तरी जीव वाटावता. म्हणूनच रक्तदानाक सर्वश्रेश्ठ दान अशें म्हणटात.
रक्तदानाच्या रुपान आमी मनीसजातीक व्हड प्रमाणांत मजत करतात. रक्तदान केल्ल्यान कसलीच इजा वा दुश्परिणाम जायना. मनशाचे कुडींत 5 लिटर रगत आसता, आनी रक्तदानांत फक्त 350 मिली इतलेंच रगत घेतात. ताका लागून मनशाचे भलायकेचेर कसलोच दुश्परिणाम जायना. विशेश म्हणल्यार 24 ते 48 वरां भितर जितलें रगत दान दिलां तितलेंच तें परतून येता. ताका लागून दरेक मनशान मुखार सरचें आनी रक्तदान करचें. रक्तदान सर्वश्रेश्ठ दान असो प्रचार जायत आसलो तरी आमचे मदल्या रक्तदात्यांची संख्या खूब उणी आसा. भारतांत फक्त 0.6 टक्के लोक रक्तदान करीत आसतात. 140 कोटी लोकसंख्येच्या देशांत हें प्रमाण खूब कमी आसा. ताका लागून देशांत रगताचो उणाव भासता. तातूंत कोरोना सारक्या म्हामारींत जाल्यार सुमारा भायली परिस्थिती निर्माण जाता. अपघातांतले दुयेंती, बाळंतपणाचो काळ, अतिदक्षता विभाग, ताततडीची शस्त्रक्रिया अशा वेळार रगताची गरज निर्माण जाता. जर दुयेंतीक वेळारूच रगत मेळ्ळें ना जाल्यार ताका मरण लेगीत येवंक शकता. ताका लागून दरेकान रक्तदान करूंक जाय. आपल्या रगताक लागून कोणाचो तरी जीव वाटावता. रक्तदान म्हणल्यार जिवदान, रक्तदान सर्वश्रेश्ठ दान हें लक्षांत घेवन दरेकान रक्तदान करूंक जाय आनी करचेंच.
श्याम ठाणेदार
99222546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
