भांगरभूंय | प्रतिनिधी
स्ध्याचे व्यस्त जिणेत करियरा खातीर धांवपळ, कामाचो ताण, वायट आहार सयत हेर कांय गजालींक लागून लोक आपले भलायके कडेन खाशेलें लक्ष दिनात. देखून पिरायेच्या 30 वर्सा उपरांत वेगवेगळे दुयेंस जावपाचो धोको आसता. पिरायेच्या 30 वर्सां उपरांत कुडींत जायते बदल घडटात. देखून तुमच्या आहाराचेर खाशेलें लक्ष दिवप गरजेचें. दादल्यां मदींय 30 वर्सां उपरांत हार्मोनांत आनी हाडांत बदल जातात जाका लागून तांकां कांय दुयेंस जांव येता. देखूनच 30 वर्सां उपरांत दादल्यां खातीर कांय पोशक तत्व गरजेचे आसा.
दरेकल्याक तांच्या पिराये प्रमाण योग्य पोशणाची गरज आसता. देखून तांणी त्या गरजेच्या पोशक तत्वांचो आहारांत आस्पाव करचो, जाका लागून तांकां पिराये प्रमाण शारिरीक पोशण पुराय करपाक मेळटलें. स्वताक फिट आनी निरोगी दवरपा खातीर हें करप गरजेचें. अशे परिस्थितींत समतोल आहार घेवन स्वताक भलायकेन बरें दवरप खूब म्हत्वाचें. तातूंत गरजेचीं प्रथिनां, जीवनसत्वां आनी खनिजां आसतात, जे तुमची रोगप्रतिकार शक्त, हाडां घट करतात तशेंच मेंदू निरोगी दवरता.
जीवनसत्व डी
30 वर्सां उपरांत दर एका दादल्याच्या आंगांतलें टेस्टोस्टेरॉनचें प्रमाण उणें जावंक लागता. जाचो परिणाम मसल्स आनी एनर्जी पातळेचेर जावपाक लागता. अशा वेळार डी जीवनसत्व टेस्टोस्टेरॉनाची पातळी वाडयता आनी हाडां खातीर कॅल्शियम शोशून घेवपाक मजत करता. तशेंच काळजाचे भलायके खातीर आनी कांय प्रकारच्या कॅन्सराक आळाबंदा हाडपा खातीरूय हें उपेगी पडटा.
जीवनसत्व क
फकत हाडां निरोगी दवरपा खातीर न्हय तर मानसीक भलायके खातीरय जीवनसत्व क ची गरज आसता. क जीवनसत्व डिमेंशिया आडायता, ही समस्या दादल्यां मदीं पिराय प्रमाण वाडता. जी पाचव्यो भाजयो, तेल आनी फळां हांचे वरवीं मेळूंक शकता.
जीवनसत्व ए
रोगप्रतिकार शक्त, कातीची भलायकी आनी नदर सांबाळपा खातीर ए जीवनसत्व गरजेचें आसता. तशेंच म्हत्वाचें म्हळ्यार पिरायेच्या 30 वर्सां उपरांत दादल्यां मदीं प्रोस्टेटची भलायकी आनी वाड बरी करपाक ए जीवनसत्व गरजेचें आसता. ही गरज पुराय करपाक दुदाचे पदार्थ, गाजर, कणगीं हे बरे पर्याय आसात.
जीवनसत्व बी 12
30 वर्सां उपरांत दादल्यांक मज्जासंस्था घटमूट दवरपा खातीर जीवनसत्व बी 12 जाय पडटा. जें एनर्जी पातळी सांबाळपाकय उपेगी पडटा. हें खातीर मांस, नुस्तें आनी तांतयां खावचीं.
मॅग्नेशियम
30 वर्सां उपरांत काळजाचे आनी स्नायूंचे भलायके खातीर मॅग्नेशियम घेवप चड म्हत्वाचें. ते भायर मॅग्नेशियम घेतल्यार वजन उणें करपाक, रगतांतली साकरेची पातळी सांबाळपाक आनी ताण उणो करपाक मजत जाता.
झिंक
झिंक टेस्टोस्टेरॉनाचें इस्ट्रोजनांत रुपांतर जावंक दिना, जें दादल्यां मदीं थकवो आनी ताण पयस करपाक मजत करता. आलें, कच्चो कांदो, फोर्टिफायड दूद आनी दाळिंब खावप हें खातीर फायद्याचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
