‘ह्या’ पांच कारणांक लागून जावंक शकता मायग्रेन
भांगरभूंय | प्रतिनिधी
तुमकां केन्नाय खूब तकली दुखपा वांगडाच त्रासदायक वेदना जाता जाल्यार तुमकां मायग्रेन जाल्ल्याचे आसूं येता. मायग्रेन ही एक सामान्य समस्या आसून तांचो त्रास जायत्या जाणांक जाता. मायग्रेनाचे चड त्रास जावपाक लागल्यार दिसपट्टी काम करप कठीण जाता.
बदलपी जिणे पध्दतीचो लोकांच्या भलायकेचेर परिणाम…
ह्या दिसांनी लोकांची जिणे पद्दत नेटान बदलत आसा. वाडत वचपी कामाचे ताण आनी बदलपी कामाची संस्कृताय फकत शारिरीक न्हय तर लोकांच्या भलायकेचेरुय परिणाम करपाक लागल्यात. तशेंच मानसीक भलायकेचेरुय परिणांम जावपाक लागला. जिणे पध्दतींत बदल करपा वांगडाच चुकीचे खावपाचे संवयेक लागून भलायकेचेर जायते त्रास जावंक शकतात. मायग्रेन ही अशीच एक समस्या जी चडशा लोकांक ह्या दिसांनी भोगची पडटा.
मायग्रेन जावपाक कांय कारणां आसात…
हो एक प्रकारचो तकली दुखपाचो दुयेंस तांचे वांगडाच चड करून मळमळ, उलटी आनी अतिसंवेदनशीलताय जाणावता. ताचेर विशिश्ट उपचार नाशिल्ल्यान जिणे पध्दतींत बदल करून आनी कांय वखदां वापरून ताचेर नियंत्रण दवरूं येता. हाचे भायर कांय कारणां आसात, तीं वळखून मायग्रेनाचें दुख्ख व्हड प्रमाणांत टाळूंक मेळटा.
ताण- हलींची जिणे पध्दत खूब ताणाची जालां. कामाच्या दबावाचो आनी हेर घटकांचो फकत शारिरीक न्हय तर मानसीक भलायकेचेर परिणाम जाता. हाका लागून लोक चड करून ताण आनी उदासीनतायेक बळी पडटात आनी ताका लागून मायग्रेन जावंक शकता.
न्हिदेंचो त्रास- निरोगी रावपा खातीर बरी आनी पुराय न्हीद खूब गरजेची. पूण वायट जिणे पध्दतीक लागून चड करून न्हीदेचो त्रास जाता. अशा वेळार अनियमीत न्हीदेची पध्दत, फावो ती न्हीद ना वा चड न्हीद घेवप कांय जाणांक मायग्रेन जावपाक कारण जावंक शकता.
हार्मोनांत बदल- हार्मोनांत बदल जाल्ल्यानय मायग्रेन जावंक शकता. इस्ट्रोजेनांतल्या उतार-चडावाक लागून मायग्रेन वेदना जावंक शकता. बायलांक मासिक पाळी, गुरवारपण वा रजोनिवृत्ती वेळार अशें जाता.
पर्यावरणाचे घटक- केन्ना केन्ना कांय पर्यावरणीय घटकांक लागूनय मायग्रेन वेदना जावंक शकता. खर वत, व्हड आवाज, खर वास आनी हवामानांत बदल आदीं लागून कांय जाणांक मायग्रेनाचो त्रास जावं येता.
कांय खाण- ह्या सगळ्या कारणां भायर कांय खाणांक लागूनूय मायग्रेन जावपाक शकता. पोरणें चीज, प्रक्रिया केल्लें मांस आनी आर्टिफिशियल स्वीटनर हें पदार्थ संवेदनशील व्यक्तीं मदीं मायग्रेनाची सुरवात करुंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
