भांगरभूंय | प्रतिनिधी
पावशीं कुपां मळबांत दिसूंक लागलीं काय आमी खोशी जातातूच, पूण सगल्यांत चड खोस जाता ती शेतकामत्यांक. पावसाच्या दिसांनी ओले जमनींत कितेंय रोयलें जाल्यार तें किल्लून येता आनी तें पळोवन आमकां खोस जाता. तेच प्रमाण सरकारी नोकरी मेळ्ळी काय आमकां आनंद जाता. हालींच वखदां कंपनींनी गोंया भायले उमेदवार घेवपाक मुलाखती दवरिल्ल्यो. भायले लोक हांगा येवन नोकऱ्यो बळकायतात, अशी कागाळ जाता. देशांत बेरोजगारांचो आंकडो वाडत आसा. ताचीं कारणां वेगळीं आसतूय, पूण सध्या शेती उद्देग बेकारी उणी करपाक शकता. तुमचे कडेन उणी जमीन आसूं, फावो तितलें उदक आसपाक जाय. पावसाच्या दिसांनी ही समस्या आसना. म्हूण ह्या दिसांनी तुमी शेती कडेन वचपाचो विचार करूंक शकता.
गोंय सरकाराच्या शेतकी फाट्यान तर सुरवातीकूच विंगड विंगड येवजण्यो जाहीर केल्यात. तांचो लाव तुमी घेवपाक शकतात. आदले कृशी संचालक नेव्हील आफोंस हांणी दिल्ले म्हायती नुसार शेतकारांनी दर तीन वर्सांनी आपलें रोंवपाचें बियाणें बदलचें. किचन गार्डना खातीर पन्नास टक्के अनुदान बियाणां खातीर मेळटा. शेत नांगरप, पिकावळ काडप हाका पन्नास टक्के अनुदान मेळटा. ट्रॅक्टर भाड्यान मेळटा. तुमी लागींच्या शेतकी कार्यालयांत वचून चवकशी केल्यार कितल्याश्याच येवजण्यां विशीं तुमकां कळटलें. खंयचेय येवजणे विशीं बारीकसाणेन जाणून घेवपाक जाय. जर तुमी ती वेवस्थित आंखली जाल्यार तुमचें लुकसाण जावचें ना.
शेती, पोरसांचे बाबतींत एक लक्षांत दवरपाक जाय की पीक जर पिकलें ना जाल्यार आमी खातले किते? आदल्या तेंपार आमी शेतीक पयली सुवात दिताले. मागीर जमनीक मोल आयिल्ल्यान आमकां दुडवांची चटक लागली आनी आमी जमनी विकून उडयल्यो. जे पारंपरीक वेवसाय आसले ते ना जावपाक लागले. शेती, पोरसू हो असो वेवसाय जाचे कडेन आमी ह्या ना त्या कारणांक लागून आडनदर करतात. उदक उणें आसल्यार पसून तुमी शेती, पोरसूं लावपाक शकतात. इस्रायल हाचें बरें उदाहरण. उणो पावस पडटा म्हूण थंय कोण रडत बसना. सोद, तंत्रज्ञान वापरून तांणी रेंवट जमनी पाचव्योचार केल्यात. शेती हो फाटो सामको म्हत्वाचो. शेतांत वतले जाल्यार हात, पांय मातयेंत घालचे पडटात. खूबजाणांक हें आवडचेंना. पूण तशी संवय करपाक जाय. आमचो शेवट जाता तेन्ना ही मातीच लागीं करची पडटा. म्हूण तर मसंडभुंयेचेर आयज म्हाका, फाल्यां तुका अशें बरयिल्लें आसता.
गोंयांत आतां शेती काॅलेज सुरू जालां. उच्च माध्यमीक पांवड्याचेर होर्टीकल्चर फाटो घेशात जाल्यार गोंयच्या वेंचिक हायर सेकंडरींनी हो अभ्यासक्रम आसा. ल्हान जमनीचेर उण्या उदकांत भाजी, फुलां सारकें उत्पन्न घेवं येता. नाशकाक असले प्रयोग करपी शेतकार आसा. जो तुमकां जाय जाल्यार आॅनलायन म्हायती दिवं शकता. बाल्कनींतलें गार्डन अशें ताणें पुस्तकूय बरयलां. मनीस बळ मेळना म्हणून शेती वेवसाय म्हारग पडटा. गोंयांत सामूहीक शेतीचो प्रकार सुरू केला. हें शिक्षण घेवपाक तुमकां गोंया भायर वचपाची गरज ना. पोरण्यां गोंयां पदवीचें शिक्षण दिवपी संस्था सरकारान सुरू केल्या. तुमचें कडेन गिन्यान आसलें जाल्यार तुमी स्वताचें लुकसाण करीनासतान नवे नवे प्रयोग करपाक शकतात. पदवी मेळोवन सरकारी वा खाजगी नोकरी करपाक शकतात.
जायते शेतकार आसतात तांकां शेतकी खात्याच्या येवजण्यां विशीं कांयच खबर नासता. तुमी तांचो अभ्यास करून त्यो लोकां मेरेन पावोवं शकतात. हे करियर जावंक शकचें ना. पूण तुमकां समाधान मेळटलें. अर्थांत हाचें शिक्षण दिवपी बऱ्योच संस्था आसात. ताची म्हायती तुमकां इंटरनेटाचेर मेळूं शककता. पीक घेवपाक म्हायती तुमी दिवं शकतकात. सध्या इंधनाक पर्याय सोदपाचें संशोधन चालू आसा. कोंड्या पसून इथेनाॅल काडून ताचो इंधन म्हूण वापर चालू जाला. हें तंत्रज्ञान नवें आसा. पूण बांबू लागवडीक उर्बा दिवं शकता. कोंडे लावपाक उदक उणें लागता. उदक ना ते सुवातीचेर कोंडे लावपाचें प्रगत तंत्रज्ञान बंगळुरूक आसा. थंय इथेनाॅल निर्मितीय जावपाक लागल्या. हालींच लुना कायनेटिक कंपनीन बाजारांत इथेनाॅलाचेर चलपी दुचाकी हाडल्या, जी 75 हजारां मेरेन मेळटा. हालींच गोंयचे वेंचिक शेतकार शेजराच्या राज्यांत गेल्ले. ताकां आंब्याची लागवड कशी करु येता, ताची म्हायती अधिकाऱ्यांनी दिली. सांगपाचें म्हणल्यार शेती फाट्यांत खूब व्हडल्यो करियर संधी आसात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
