भांगरभूंय | प्रतिनिधी
मोबायल फोना वरवीं आमी घरांत बसून वा खंयचेय सुवाते वयल्यान गरजेचीं सगलीं कामां करपाक शकतात. खरें म्हणल्यार मोबायल फोन ही एक सामकी गरजेची गजाल. तशेंच खूब म्हत्वाची. जिणेचें तशेंच वेव्हारीक दरेक क्षेत्र मोबायल फोन, संगणक, इंटरनेटा बगर अपूर्ण आसा. निदान आयच्या काळांत तरी. आयज मोबायलाचें राज्य आयलां अशें दिसता. चड करून खूब तरणाटे ते जाण्टे मेरेन मोबायल फोना खातीर पिशे जाल्ले पळोवंक मेळटात. पूण, खरेंच सगल्यांनी मोबायल फोनाचो योग्य आनी बरो वापर करचो.
सद्याचें युग हें म्हायती तंत्रगिन्यानाचें. अशा ह्या युगांत मोबायल फोन ही सामकी गरज जाल्या. संगणक, लॅपटॉप, मोबायल फोन हीं म्हायती तंत्रगिन्यानाचीं संपर्क साधनां. इंटरनॅटाचो वापर करून आमी मोबायल फोन, संगणका वरवीं जायती नवी म्हायती मेळोवंक शकतात. संगणक, मोबायल, लॅपटॉप हें मशीनयुगान मनशाक दिल्लें कल्पनेचें झाड. इंटरनॅट हें खरेंच फॅन्टसी झाड. आयच्या संवसारांत जिणेच्या दर एका मळार मोबायल फोन गरजेचो जाला. तुमच्या चिंतेचेर, दुख्ख, खोशी आनी हेर घडणुकां विशीं तुमच्या नात्यांतल्या लोकां मेरेन खिणांत पावपाक मोबायल फोन हें सगल्यांत बरें साधन.
दरेकलो आपल्या विचारा प्रमाण मोबायलाचेर वेगवेगळे अॅप्स वापरत आसात. मोबायलाच्या माध्यमांतल्यान आमी एका खिणाक गरजेचीं कामां करपाक शकतात. आमी प्रत्यक्षांत व्हिडियो कॉलिंगांतल्यान एकामेकां कडेन उलोवंक शकतात. तर पळयात, मोबायल फोन कितलो म्हत्वाचो. ती व्यक्ती खंय आसूं. ह्या मोबायल फोनाक लागून आमी एका खिणाक हजारांनी किलोमिटर पयस वचूंक शकतात आनी इश्ट, नात्यांतल्या लोकां कडेन गजाली मारूंक शकतात.
आमच्या अणभवांतल्यान आमच्या मतांची म्हायती हेरांक मेळूंक शकता वा आमचे प्रस्न लेगीत सोडोवंक शकतात. मनशाच्या जिविताच्या दर एका मळार मोबायल तंत्रगिन्यानाची भुमिका खूब व्हडली. कांय वायटपणां, लुकसाण मतींत घेतल्यार ताचे फायदे खूब चड आसात. देखून मोबायल तंत्रगिन्याना वरवीं मनशान केल्ली प्रगती खऱ्यांनीच मनशाच्या जिविताक फायद्याची, अशें म्हाका दिसता. कारण मोबायल आयची गरज जाल्या. मोबायल ही एक गरजेची सेवा जाल्या. आयच्या तरणाट्यांच्या जिविताचो मोबायल हो एक अभिन्न भाग जाला. तशेंच मोबायलांचे वेगवेगळे स्पेसिफिकेशन आनी मॉडेल बाजारांत उपलब्ध आसात. देखून तरणाट्या पिळगे मदीं मोबायलाचे वेगवेगळे मॉडेल विकतें घेवपाची पिशें दिसानदीस वाडत आसा. मोबायलांत रेडिओ, एमपी थ्री सारकीं कार्यां आसतात, जाच्या आदारान आमी वेगवेगळीं गितां आयकूंक शकतात. तशेंच मोबायलांत गणनेचो पर्याय आसा, जाका लागून आमी खंयच्याय प्रकारची गणना (गणित, मेजप) खंयच्याय सुवातेर करूंक शकतात. चडशे लोक मोबायलाचेर युट्युबाच्या आदारान व्हिडियो, मनरिजवणेचे शो, सिनेमा पळोवपाक पसंत करतात.
मोबायल फोन हो अर्विल्ल्या संवसाराचो एक भाग. आयज मोबायल ही सगळ्यांची गरज जाल्या, भुरगीं ते व्हडले, आमकां सगळ्यांच्या हातांत मोबायल दिसतात. म्हणजे मोबायल नासतना सगळो संवसार अपूर्ण आसा अशे दिसून येता. आयचो दीस मोबायलाच्या अलार्मानय सुरू जाता. आयचे पिळगेक मोबायलाची इतली गरज आसा की खंयचेंय काम करपाक मोबायलाची गरज पडटा. इतलेंच न्हय, मोबायलांत कॅमेरा फंक्शन आसता, जाच्या आदारान कोणाचेंय वा जाग्याचें चित्र काडप शक्य जाता. इतलेंच न्हय तर मोबायलांतल्या सेल्फीचेर आदारून आमी स्वताचो फोटोय काडूंक शकतात.
मोबायलाचेर वेगवेगळे प्रकारचे अॅप्स मेळटात, जाचे आदारान आमी घरांतल्यान ऑनलायन खरेदी करूंक शकतात. मोबायलाच्या आदारान आमकां घरांत वेव्हार करपाची सुविधा मेळ्ळ्या. पयशे धाडपाक वा काडपाक बँकेंत आतां रांक लावन बसपाची गरज ना. बँकेच्या कर्मचाऱ्यांकूच हाचो फायदोच म्हणचें पडटलें. कोणाक बेगोबेग मदत जाय जाल्यार आपत्कालीन क्रमांकाची सुविधा दितात. जशें, पुलीस, एम्ब्युलन्स रोखडेंच मदती खातीर आपोवंक मेळटा. इतलेंच न्हय, मोबायलाक लागून रेल्वेची तिकीट, बस तिकीट, हॉटेलाची तिकीट आदी घरा बसून बुकींग करप शक्य जालां.
जश्यो नाण्याक दोन बाजू आसतात, तेच प्रमाण मोबायलाकय दोन बाजू आसात. मोबायलाचे जितले फायदे आसात तितले ताचे वायट परिणामूय आसात. मोबायल फोन एक उपेगी साधन जावचे परस एक वेसन जावपाक लागलां. मोबायला वरवीं ब्लॅकमेल करप, वेगवेगळीं उलोवपां वा फट पातळावप वाडत आसा. मोबायलाक लागून सगले लोक व्यस्त आनी त्रस्तूय जाल्यात. मोबायलाक लागून इश्टां मदलें अंतर वाडत आसा. नातीं पयस वचत आसात. कोणाक तरी वाडदीस वा उत्सवाची परबीं दिवपा खातीर सगळेच मोबायलाचो वापर करतात. गेम खेळप, व्हिडियो पळोवप, दीसभर मोबायलाचेर चित्रां पळोवप हें दोळ्यांक त्रास जावपाक लागलां.
आयज आमकां सगळ्यां वांगडा मोबायल फोन दिसता. मोबायलाचो वापर शारां आनी गांवगिऱ्या वाठारांनीय चालू आसा. अन्न, कपडे आनी रावपाची गरज हांचे वांगडाच आयच्या काळांत मोबायलाचीय गरज आसा. सामके ल्हान भुरगे ते जाण्टे मेरेन सगल्यांच्या हातांनी मोबायल फोन पळोवंक मेळटात. कांय जाण धाकट्या भुरग्याक लागून मोबायलाचेर गीत लेगीत घालून हातांत मोबायल दितात आनी मागीर बाळ बरी न्हीद घेता. भुरगीं अभ्यास पुराय करून मोबायल फोन खेळपाक मागतात. गेमी खेळत बसतात. इतलेंच न्हय, कांय भुरग्यांक मोबायलाचें इतलें वेसन आसा की जेन्ना- जेन्ना तांकां कितेंय करपाक सांगतात तेन्ना पयलीं मोबायल फोन मागतात. जेवपाक सांगल्यार लेगीत मोबायल हातांत दिल्यारच जेवतात. देखून भुरग्यांकय ल्हान पिरायेचेर मोबायलाचें व्यसन जाता. पूण इतले ल्हान पिरायेचेर भुरग्याक मोबायल फोन दिल्यार ताचे दुश्परिणाम जावंक शकतात. ही हानीकारक संवय त्या भुरग्याक ल्हान पिराये सावन योग्य न्हय. योग्य काम, बरी आनी उपेगी म्हायती खातीर बुद्धीचो वापर करूनच मोबायलाचो बरो उपेग करपाक जाय. मोबायल फोन म्हळ्यार गरजेच्या सेवां खातीर, बऱ्या कामा खातीर वापरिल्ली वस्तू वा उपकरण. सगळ्यांनी ह्या आधुनिक सोदाचो योग्य वापर करचो. दुरुपेग करचो न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
