जळीमळीं सायकली दिसच्यो

भांगरभूंय | प्रतिनिधी

संयुक्त राष्ट्रसंघान 12 एप्रील 2018 दिसा 3 जून हो संवसारीक सायकल दीस मनोवपाचो थाराव घेतलो आनी तेन्नाच्यान पुराय संवसारभर बरेच लोक, संघटना तो व्हडा उमेदीन मनयतात. आमच्या देशांत कांय लोकां खातीर सायकल ही गरजेची वस्त, मात उरिल्ल्यां खातीर ती फक्त व्यायामाची गरज. तरी बरींच ल्हान भुरगीं सायकल वापरतात. थारावीक काळा खातीर. इकरावे यत्ते पावले काय तांची सायकल सुट्टा आनी तिचो जागो स्कूटर, मोटारसायकल घेता. तरीय समाजान सायकलीचो जाणुनबुजून प्रचार, प्रसार करपाक जाय. ती काळाची गरज जाल्या. गोंयांतल्या सायकलकारां खातीर रस्तो सुरक्षा जागृताय आराखडो तयार करचो, अशी मागणी हालींच गोवा कॅन ह्या एनजीओन केल्या. सरकारी यंत्रणांनी तिचेर विचार करपाक जाय. गोवा कॅनाच्या मतान, गोंयांत सायकल चलोवप्यांचो आंकडो ल्हवू ल्हवू वाडत आसा. देखून सायकलीं खातीर सुचोवणी तकटे लावचे. तांचे खातीर खास लेन तयार करची, अशेंय तांकां दिसता.
सायकलीचो सोद लागून दोन शेंकडे (1817) जाले. आमच्या भारतांत एका काळार सगलेच कडेन सायकली दिसताल्यो. काॅलेजकुमार पसून सायकली घेवन येताले. कामा- धंद्याक वतना सगलेच सायकल वापरताले. आयज पसून देशाच्या कांय राज्यांनी, गांवांनी सायकलींचो व्हडा प्रमाणांत वापर जाता. सरकारी अदमासा प्रमाण, भारतांत सध्या 30 कोटी सायकली आसात. येरादारी खातीर आनी व्यायामा खातीर त्यो वापरतात. ताचे भायर भुरगीं वापरतात. भारतीय सायकल उत्पादक संघटनेच्या आंकडेवारी प्रमाण, भारतांत पोरूं 1,06,71,582 सायकली खपिल्ल्यो. पेल्या वर्सा 1,04,20,843. हाचो अर्थ सायकलींचो खप नेटान वाडत आसा. मात, तांच्या मतान चडश्यो भुरग्यांच्यो सायकली खपतात. ताचे फाटोफाट व्यायाम करपी वा भोंवडी करपी त्यो विकत घेतात.
सायकलींचो वापर खास करून कामाक वचपा खातीर जावप गरजेचें. तशें जाल्यार हवेचें, आवाजाचें प्रदूशण जावचें ना. इंधनाची गरज उणी जातली. अपघातूय देंवतले आनी म्हत्वाचें म्हणल्यार भलायकेंत सुदारणा जातली. कारण सायकल चलोवन व्यायाम जाता, तसो आनीक खंयचेंच वाहन चलोवन जायना. नेमान सायकल चलोवप्याक काळजाचो आताक वा दुयेंस, गोडेंमूत, सांधेदुखी, कांय तरांचे कॅन्सर जावपाची भिरांत उणी आसता. सायकलकाराचें वजन देंवता. काॅलेस्टेराॅल पातळी सुदारता, स्वासाची यंत्रणा बरी उरता. तोल इबाडना, सांधे तंदुरुस्त उरतात. रक्त घोळप आनी आॅक्सिजन घेवप वाडिल्ल्यान मेंदवाची भलायकी बरी उरता. देखून मेंदवाचीं दुयेंसां जायनात. आयज मेळत थंय येरादारीची कोंयडी, खेटाखेट पळोवंक मेळटा. सायकलींचो वापर वाडल्यार ती उणी जातली. धुंवर ना जातलो. रस्ते रिकामी उरिल्ल्यान एखाद दुसरो वाहन घेवन वचपी आसा ताका बऱ्याक पडटलें. गाडी सांबाळपाक जितलो खर्च करचो पडटा, ताचे फक्त एक टक्के खर्च सायकल सांबाळपाचेर जाता! चीन, नेदरलॅण्डाक सायकलींचें प्रमाण खूबच चड. ताका लागून थंयचे लोक तंदुरुस्त आसात. नेदरलॅण्डाची लोकसंख्या आसा, 1 कोटी 77 लाख आनी थंय सायकली आसात 2 कोटी 30 लाख. म्हणटकच दरेकल्या कडेन 2- 2 सायकली जाल्यो. कामाक वचपी चडशे लोक सायकलीच घेवन वतात. आमच्या भारतांत हें चित्र दिसपाक शकतलें? निदान शारांनी तरी?
सायकलीं खातीर खास लेन तयार करपाक जाय. कांय वर्सां फाटी मुंबय तशी मागणी जाल्ली. थोड्या शारांनी वेगळो मार्ग आसा. पूण सरभोंवतणी दुचाकी, चार चाकी गाडयो धांवतात. देखून सायकलकाराच्या जिवाक धोको निर्माण जावं येता. ह्याच कारणाक लागून सायकलकार इत्सा आसूनय सायकल भायर काडिनात. गोंयांतल्या शारांनी सरकारी कामां करपाक एके कचेरेंतल्यान दुसरे कचेरेंत वचपी कर्मचारी, शाळांनी शिकपी विद्यार्थी, पत्रकार, वेपारी हांकां सायकल वापरप शक्य ना? पोस्टमन, पोदेर अजून वापरतात. लागचे लागीं वचपी, शारांतूच रावपी हांकां तरी तशें करप मात्तूय कठीण न्हय. सायकलीं खातीर सरकारान अनुदान दिवं येता. ते खातीर सायकलीक उर्बा दिवंक सोदपी संस्थांनी फुडाकार घेवचो. कांय लोक तरातरांच्यो सायकली विकत घेतात. चार दीस झेत मारतात. मागीर त्यो कोनशाक मारतात. ह्यो सायकली उण्या मोलाक विकत घेवन गरजूंक दिवं येतात. पूण, सगल्यांत पयलीं जाय, तो सायकलकारां खातीर खाशेलो मार्ग. सरकारान हें मनार घेवचेंच. आयच्या सायकल दिसा निमतान आवडीन सायकल चलोवपी सायकलकारांक परबीं.