संवसारीक तंबाखू विरोधी दीस: तंबाखू भलायकेक कितलो वायट

भांगरभूंय | प्रतिनिधी

भारतांतले लाखांनी लोक तंबाखू खातात. पूण हें वेळार सोडलें ना जाल्यार जिवाक धोको आशिल्ल्या दुयेंसांक बळी पडूं येता. एका अभ्यासा प्रमाण, संवसारभर दर वर्सा तंबाखू खाल्ल्यान ८० लाखां परस चड लोकांक मरण येता. संवसारीक तंबाखू विरोधी दीस दर वर्सा ३१ मे दिसा मनयतात. तंबाखूच्या धोक्यांची जाणविकाय करून दिवप हो हे फाटलो हेत. तंबाखू भलायके खातीर सामको माल. ताका लागून तोंड, गळो, फुफ्फुस आनी मूत्रपिंड कॅन्सर जावपाची शक्यताय वाडटा. मात कांय गजाली आपणाव तंबाखू सोंपेंपणान सोडूं येता.

तंबाखूंतलें निकोटीन लुकसाण करता

एका अभ्यासा प्रमाण तंबाखूंतलें निकोटीन भलायकेक खूब वायट आसता आनी ताका लागून कॅन्सर जावंक शकता. तंबाखू खावप वा सिगरेट ओडप आसूं, तातूंत आशिल्ल्या कार्सिनोजेनीक घटकांचो कुडीचेर वायट परिणाम जाता. तंबाखू पियेवपी चडशे लोक आपलें तोंड पुराय उगडूंक शकनात. तंबाखू खाल्ल्यार तोंडाच्या भितरल्या भागाच्या दोनूय वटांनी धवी लायन तयार जावप हें कॅन्सराचें लक्षण. वेळार ताची जतनाय घेवंक ना जाल्यार ताचें गंभीर परिणाम जावपाक शकता.

काळजाचो आताक येवपाचो धोको

तंबाखूचो कुडीचेर खोलायेन आनी वायट परिणाम जाता. चड करून दर एका अवयवाचेर ताचो परिणाम जाता. तंबाखू खावप आसूं वा सिगरेटीचो धुंवर कुडींत घेतात तेन्ना निकोटीन, टार आनी कार्बन मोनॉक्सायड हीं हजारांनी रसायनां कुडींत भितर सरतात. निकोटीन हो एक खूब लुकसाण करपी पदार्थ. तो रगतपेशींत भितर सरता आनी ब्लड प्रेशर वाडटा. हाका लागून काळजाचो आताक आनी स्ट्रोक अशा काळजाच्या समस्यांचो धोको वाडटा. ते भायर तंबाखूच्या धुंवरांत आशिल्ल्या टारांत कार्सिनोजन आसता आनी तें फुफ्फुसाच्या ऊतकांक लुकसाण करतात. ताका लागून फुफ्फुसांचो कॅन्सर जावपाक शकता. तंबाखूंतल्यान जावपी कॅन्सर हो सगळ्यांत चड प्रमाणांत जावपी कॅन्सर.

वेगवेगळ्या कॅन्सराचो धोको

तंबाखू खाल्यार तोंड, गळो, पोट, मुत्राशय आनी गर्भाशय अशे हेर कॅन्सरूय जावंक शकतात. ते भायर तंबाखूच्या धुंवराक लागून स्वास घेवपाचेर परिणाम जाता आनी ताका लागून क्रॉनिक ऑब्स्ट्रक्टिव्ह पल्मोनरी डिजीज (COPD), क्रॉनिक ब्रॉंकायटीस आनी वातस्फीत ह्या सारक्या दुयेंसांचो धोको वाडटा. इतलेंच न्हय तर तंबाखू खाल्यार रोगप्रतिकार शक्तूय दुबळी जाता, जाका लागून मनीस सहजपणान संसर्गाचो बळी पडूंक शकता.