दक्षीण भारतांतल्या होयसळ मंदिरांचो युनेस्कोच्या संवसारीक दायज वळेरेंत आसपाव

भांगरभूंय | प्रतिनिधी

होयसळ साम्राज्यान कर्नाटकाच्या चडश्या आनी गोंयच्या कांय भागांचेर राज्य केल्लें

होयसळ, खबरां संस्था: युनेस्कोच्या संवसारीक दायज वळेरेंत कर्नाटकांतल्या होयसळ समुहांतल्या देवळांचो आसपाव केला. दक्षीण भारतांतल्या ९०५ वर्सां आदलीं हीं देवळां स्थापस्थ कलेचो उत्कृश्ट नमुनो जावन आसा. हीं देवळां भारताच्या इतिहासाचीं साक्षीदार आसात.
युनेस्कोच्या संवसारीक दायज स्थळ २०२३चे वळेरेंत कर्नाटकांतल्या होयसळ समुहांतल्या देवळांचो आस्पाव जाला.
होयसाळेश्वर देवूळ कर्नाटकांतल्या हसन जिल्ह्यांत आसा. होयसळेश्वर मंदीर ते म्हैसूर विमानतळ हाचें अंतर सुमार १५० किमी आसा. हसन रेल्वे जंक्शन हें कर्नाटका सयत दक्षीण भारतांतल्या सुमार सगळ्या मुखेल शारां कडेन रेल्वेन जोडलां. हसन जंक्शन होयसलेश्वर देवळा पसून फकत ३० किमी अंतराचेर आसा.

होयसळेश्वराचें देवूळ उंचायेर बांदिल्ल्यान ह्या चबुतर्‍याचेर १२ कोरीव थर आसात. होयसाळ वास्तुकलेचें हें एक उत्कृश्ठ उदाहरण आसा. कारण ह्या १२ थरांक जोडपा खातीर चुनो, सिमेंट वा हेर खंयचेंच सामान वापरूंक ना. हांगचें कोरीव काम अजाप करपा सारकें आसा.

ह्या देवळाची निर्मीती ११२१त केली.
होयसाळ राजांनी तांचे कारकिर्दींत सुमार १,५०० देवळां बांदलीं. कर्नाटक राज्यांतल्या होयसळ समुहांतलें देवूळ राजा विष्णुवर्धनाचे कारकिर्दींत बांदिल्लें.
इसवी सन १० व्या ते १४ व्या शेकड्या मजगतीं दक्षीण भारतीय होयसळ साम्राज्य हें अस्तित्वांत आशिल्लें. ह्या होयसळ साम्राज्यान सध्याच्या कर्नाटक राज्याच्या चडश्या भागांचेर तशेंच गोंयच्या कांय भागांचेर राज्य केलें.