भांगरभूंय | प्रतिनिधी
कोणाक मान्य नासूं, पूण मुळावें शिक्षण आवयभाशेंतूच जावपाक जाय, हो संवसारांतल्या भाशीक, शिक्षणीक तज्ञांनी मान्य केल्लो सिद्धांत. इतलेंच न्हय, तर भुरगो शाळेंत वच्चे पयलीं घरांत आसता तेन्ना पसून ताच्या कानार सदांच आवयभाशेंतलींच उतरां पडपाक जाय. हें जाताच अशें ना. आमच्या गोंयांत तर इंग्लिशीचो सोंस फाटल्या 25- 30 वर्सां सावन चडूच वाडिल्लो दिसता. इंग्लीश उलोवपाक आयली म्हणटकच आपलो भुरगो वैचारीक नदरेन खूब मुखार पावलो, अशें कांय पालकांक दिसता. तांकांच कित्याक, त्या भुरग्याक उलयतना आयकुपी पसून ताच्या व्यक्तीमत्वाक शंबरांतले 101 गुण (तुस्त, तोखणायेचो एक बोनस) दितात. आवयभास, तिच्यो बोली वा थळावे भाशेंत उलोवपी भुरग्यांक गांवठी, पेज समजुपी शेंकड्यांनी लोक आयज पसून सरभोंवतणी आसात. आमच्या देशांत सगल्याच मळांचेर इंग्लिशीक माथ्यार घेवन नाचपाची संवय आशिल्ल्यान आनी नोकरेंत हेच फिरंगी भाशेक चड म्हत्व दिल्ल्यान पालक आपल्या भुरग्यांक घेवन इंग्लीश माध्यमांच्या शाळां मुखार रांको लायतात. खरें म्हणल्यार मुळावें शिक्षण आवयभाशेंत घेतिल्ल्या भुरग्यांच्यो थळाव्यो भाशा बऱ्यो आसतात, काॅलेजींत पाव मेरेन तो इंग्लिशींतूय हेरांच्या मुखार पावता. फक्त ताचे कडेन जाय ती जिद्द, आत्मविस्वास आनी शिकपाची आवड!
पालकांचें इंग्लीश माध्यमाचें पिशें पारखिल्ल्या शिक्षणीक संस्थांनी इंग्लीश माध्यमांच्या मुळाव्या शाळांक प्राधान्य दिवपाक सुरवात करून खूब वर्सां जालीं. पूर्ण इंग्लीश माध्यमांचीं हायस्कुलां पसून गोंयांत आसात, आयल्यांत. फाटलीं कांय वर्सां इंग्लीश मुळाव्यो शाळा सुरू करपाचें फॅड कांयशें उणें जाल्लें. मात आतां 1- 2 शाळा त्यो सुरू करपाक सोदतात. तांणी ना हरकत प्रमाणपत्रूय मागलां, अशी म्हायती उक्तडार आयल्या. कोंकणी माध्यमाची मान्यताय घेवन ल्हवूच इंग्लीश शाळा सुरू करपाचें तांणी थारायलां, अशें कळटा. कोंकणी भाशा मंडळान तशें पत्र सरकाराक बरयिल्लें. ताची मुख्यमंत्री डाॅ. प्रमोद सावंत हांणी रोखडीच दखल घेतली. तशें करपी शाळा वेवस्थापनाचेर कडक कारवाय करतले अशी शिटकावणी तांणी दिल्या. हाचे मुखार नव्या इंग्लीश मुळाव्या शाळांक मान्यताय मेळची ना, अशेंय तांणी सांगलां. केंद्र, राज्य सरकार सध्या नवें शिक्षणीक धोरण चालीक लायता. तातूंत देशी भाशांक अर्थांत चड म्हत्व दिलां. म्हणटकच हाचे मुखार इंग्लीश मुळाव्या शाळांक देशभरांत मान्यताय मेळप तशें कठिणूच दिसता. सरकारी अनुदान घेनासतना मात त्यो शाळा घडये सुरू करपाक मेळटल्यो आनी पालकांक भरपूर फी दिवन थंय आपल्या भुरग्यांक धाडपाक मेळटलें. इंग्लीश ही गिन्यानाची भास. ती पांचवे यत्ते उपरांत वांगडा आसतना, पयले सावनूच ती माथ्यार मारून भुरग्यांचे उदरगतीक कित्याक आडमेळीं हाडपाक जाय?
गोंय सरकारान आवयभाशेंतल्या शिक्षणाक प्राधान्य दिल्लें आसतना इंग्लीश शाळांक परवानगी दिवपाक नेमको कोण मुखार सरला, हाचो सोद प्रादेशीक शिक्षणाक प्राधान्य दिवपी शिक्षणीक संस्थांनी घेवचो पडटलो. भुरग्यांचे मानसिकतायेचे नदरेन, तो थळावे संस्कृतायेक दसून उरचो, तिची ताका आवड निर्माण जावची, ताची योग्य बौद्धीक, समाजीक उदरगत जावची, तो आपलीं मुळां विसरचो न्हय, हे खातीर ताका आवयभाशेंतल्यान शिकोवपाक जाय, अशें जाणकारांचें म्हणणें. इंग्लीश शिक्षणाक लागून भारतीयांची संस्कृताये कडेन आशिल्ली नाळ तुट्टा, अशेंय थोड्यांचें मत. खरें म्हणल्यार हायस्कूल पांवड्यार एक विशय कोंकणी आनी हेर विशय इंग्लिशींत शिकयतात, तरीय बऱ्याच पालकांक मुळाव्या पांवड्यारूय इंग्लीश कित्याक जाय तें कळना. तांकां घरांतूच इंग्लीश शिकोवप शक्य ना?
गोंयांत सरकारी प्राथमीक शाळा आसात. इंग्लीश शाळाय आसात. पूण ते तुळेन कोंकणी शाळा तश्यो उण्योच. राज्यांतल्या प्रत्येक तालुक्यांत उण्योच 10 तरी खाजगी, सरकारी कोंकणी मुळाव्यो शाळा आसच्यो. थंय चवथी यत्ते मेरेन सगले विशय कोंकणींतल्यान शिकोवचे. असल्या शाळांक शिक्षण खात्यान उर्बा दिवपाचो वेळ आयला. कांय वर्सां पयलीं माधव कामत समिती, भास्कर नायक समितीन मुळावें शिक्षण आवयभाशेंतल्यानूच आसपाक जाय, असो अहवाल सादर केल्लो. दूरदिश्टीचे फुडारी मनोहर पर्रीकार हांणीय हाचे मुखार इंग्लीश मुळाव्या शाळांक मान्यताय दिवप ना, असो निर्णय 2014 त घेतिल्लो. इतलें आसून जर मान्यताय दिली जाल्यार तो सर्गेस्त पर्रीकार हांचो अपमान थारचो ना? सरकारान इंग्लीश माध्यमांच्या मुळाव्या शाळांक आनीक मान्यताय दिवची न्हय, असो निर्णय जाहीर केला. चेपण आयलें तरी सरकारान ठाम रावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
