भांगरभूंय | प्रतिनिधी
गोंय हें पर्यटन राज्य. तातूंत हांगाचें राहणीमान उंचेलें. म्हणटकच गोंयांत फुडाराक चड, आनीक चड लायट लागतली. हें सांगपाक खास अभ्यास करपाची गरज ना. आमी स्वताची वीज तयार करपाक शकनात. तशे यत्न कांय प्रमाणांत तीस वर्सां पयलीं जाल्ले, पूण ते अपेशी थारले. सध्या आमकां शेजराच्या राज्यांतल्यान लायट मेळटा. ती हांगा हाडपी यंत्रणा दुबळी जाल्या. म्हणल्यार चड लोड येत जाल्यार ती इबाडून गोंयचो कांय वाठार चार दीस काळखांत उरूंक शकता. तमनार वीज प्रकल्पा वरवीं ही पुराय यंत्रणां बळिश्ट करपाचें काम चलता. नवी उपकेंद्रां, सरयो, खांब्यां वरवीं गोंयांत वीज खेळोवपाक जाळें निर्माण करतात. तमनार प्रकल्प कर्नाटकांतल्यान वीज हाडटलो. मात, कर्नाटकान आतां आपल्या प्रदेशा भितर प्रकल्पाक मान्यताय दिवंक ना. तें तयार जातलें, हे खातीर आतां गोंय सरकाराक खर यत्न करचे पडटले. कर्नाटकांत पर्यावरणाचें चड लुकसाण जावचें ना, हें गोंय सरकारान सर्वोच्च न्यायालयाक पटोवन दिलां. आतां सकारात्मक विचार करपाची गरज आसा, ती कर्नाटकाक!!
तमनार प्रकल्पाच्यो मुळाव्यो सुविधा उबारपाचें काम लागीं लागीं पुराय जालां. सप्टेंबर लागता म्हणसर गोंय सरकार तांकां मुळाव्यो सुविधा दितलें. कोलवाळे ते धारबांदोड्यां मजगतींचे 400 केव्हीए लायनी खातीर सात टाॅवर उबे जावपाचे आसात. धारबांदोड्यां, शेल्ड्यां उपकेंद्रां जाल्यांत. विजेचें जाळें पातळ्ळें काय कर्नाटक, महाराष्ट्रांतल्यान ज्यादा वीज घेवपाक मेळटली. वीज मंत्र्यान ही म्हायती दिली. तांच्या मतान अंदूं गोंयांत विजेची मागणी 820 मेगावॅट आशिल्ली. फाटल्या कांय वर्सांचो नियाळ घेतल्यार ही सगल्यांत चड मागणी. फुडल्या तीन ते चार वर्सांत आनीक 300 ते 400 मेगावॅट लायट जाय पडटली. तमनार गोंयाक 1200 मेगावॅट वीज पुरवण करतलें. हाचे वयल्यान तमनार बेगीन पूर्ण जावप गोंयकार आनी पर्यटन मळाचे नदरेन सामके म्हत्वाचें. सध्याच लायट आपालिपा खेळपाक लागल्या. कांय कडेन एकदां गेल्ली लायट रातभर येना. आतां सगलेंच लायटीचेर अवलंबून. म्हणटकच ह्या गरमेच्या दिसांनी लोकांचे कितें हाल जाता आसतले, तें तांकांच खबर. देखून सरकारान लायटीच्या मळाचेर आमी हुस्क्या मेकळे जातले, हे खातीर बेगीन वावराक लागचें पडटलें.
कंपनीन विजेच्यो सरयो ओडपाक 177 हॅक्टर जमनी वापरपाक दिवपाची परवानगी मागिल्ली. कर्नाटक रानां खात्यान परवानगी दिल्ली. मात अचकीत सरकारान प्रस्ताव भायर मारलो. आतां पर्यावरणाचें नांव मुखार करून हें कोण करता तर कळसा- भांडुरा प्रकल्प बळयां चालीक लावन म्हादयचें उदक घुंवडावपी कर्नाटक. कळसाच्या नांवा खाला पर्यावरणाचो विध्वंस जाला. गांवूय उध्वस्त जाल्यात. म्हादयचें उदक आटल्यार कितें जातलें तें वेगळें सांगपाक नाका. दांडेलीचो हती काॅरिडोर, जोयडाचो काळी न्हंय वाग वाठार, भीमगड अभयारण्यांतल्यान तमनाराचो वीजमार्ग वता अशी कागाळ पर्यावरण मोगींनी कर्नाटक रानां मंत्र्यांक केल्ली. ताका लागून उपरांत कर्नाटकान मदीं पांय आडवे घाले. खरें पळोवंक गेल्यार कितलेशेचे उंच लायटीचे खांबे, उण्यांत उणीं झाडां मारप, नवीं झाडां लावप, जनावरां खातीर खास वाट तयार करप हे उपाय केल्ले आसतना कर्नाटकान पर्यावरणाच्या नांवान फक्त खांबे उबे करपाक हरकत घेवपाक जायनाशिल्ली. पूण आतां जो मेरेन तांचें नाटक सोंपना तो मेरेन गोंयाक वाट पळोवची पडटली.
गोंयांत हेर राज्यांचे तुळेन वीज सवाय अशें सरकार म्हणटा. तर गिरायकांक ती म्हारग लागता. तातूंत ती अखंड 24 वरां मेळना. सेवा सारकी ना जाल्यार पयशे कित्याक दिवपाचे अशें कांय जाणांचे मत. तातूंत कोट्यांनी रुपयांची थकबाकी वीज खात्याक येवपाची आसा. हें वीज बील खास करून उद्देगांचें आशिल्ल्यान सरकार रातयां कनेक्शन तोडपाचो निर्णय घेवपाक शकना. तरीय उद्देगांनी आनी हेर गिरायकांनी लायटीचें बील नेमान भरल्यार राज्या खातीरूच तें फायद्याचें थारतलें.
भायल्यान वीज हाडपाची यंत्रणा सुदारपाक जाय, तशीच भितरलींय उपकरणां बदलपाक जाय. कारण मात्सो वारो आयल्यार हांगा लायट बंद करतात. शारां, उपनगरां सोडल्यार हेर कडेन 10 वरां काळोख पातळिल्लो आसता. कांय कडेन दोन- दोन दीस लायट नासता, अशें लोक सांगतात. लायट ना म्हणल्यार उदक ना. दुरुस्तीच्या नांवा खाला सद्दां खंय ना खंय लायट बंद दवरतात. गोंयाक चड वीज जाय, ते खातीर तमनार प्रकल्प बेगीन पुराय जावंक जाय, तितलेच हे भितरले प्रस्नूय म्हत्वाचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
