भांगरभूंय | प्रतिनिधी
स्मार्ट सिटीचें खंयूय पावूं, सध्या पणजेचीं पावलां सोलर सिटी वटेन पडपाक लागल्यांत ही खोसदिणी गजाल. अक्षय उर्जा ही आयच्या काळांत सगल्यांत म्हत्वाची. पर्यावरण मळाचेर तर तिचें चडूच म्हत्व. आतां मेरेन पणजे शारांतल्या वट्ट 7314 वाठारांनी सौर उर्जे वरवीं 20,333 किलोवॅट वीज निर्मणी जाता. पणजेचो आंवाठ पळयल्यार हो आंकडो तसो उणोच, पूण हे उजू सुरवातीक येवकार दिवंक जाय. हेर शारांनीय सौर उर्जा पावल्या. ती येवपी काळांत शारां हुपून गांवांनीय पावची. गोंय उर्जा उदरगत एजन्सी (गेडा) हे नदरेन यत्न करता, मात लोकांचो तेंको मेळ्ळे बगर सौर उर्जा गोंयभर पातळची ना, हेंवूय तितलेंच खरें.
सध्या पणजे सौर उर्जा निर्मणी 18 विभागांनी वांटून घाल्या. तातूंत लोकांचो राबिताे आशिल्ल्या सुवातांचेर सगल्यांत चड सोलर पॅनल आसात. 6327. जाल्यार दुसऱ्या क्रमांकाचेर वेवसायीक आस्थापनां आसात. तांणी 747 पॅनल बसयल्यात. सगल्यांत चड वीज निर्मणी करता हवामान खातें. 2668 किलोवॅट. डाॅन बाॅस्को उच्च माध्यमीक विद्यालय आनी गोंय विज्ञान केंद्र दरेकी 2529 किलोवॅटां सयत दुसऱ्या क्रमाकांचेर आसात. पणजे कदंब बसस्टॅण्ड वाठारांत 1905 किलोवॅट वीज निर्माण जाता. भोवतेक सरकारी आस्थापनांनी सौर उर्जे बाबतींत फुडाकार घेतला. आतां विद्यालयां, हायर सेकंडरी, काॅलेजींनी फुडाकार घेवंक जाय. डाॅन बाॅस्को विद्यालयाचो आदर्श तांणी घेवं येता. सौर उर्जा वापरल्यार दीसपट्टे विजेचें बील उणें येतलें. वीज बचत जातली ती चड म्हत्वाची. कारण सध्या गोंयाक चडांत चड वीज जाय. सौर उर्जे वरवीं हो उणाव आमी भरपाक शकतात.
सौर उर्जा ही अर्थांत सूर्य आसा तेन्ना सावन आसा, हें कोणूय सांगतलो. मात तिचो सोद आमकां लागलो, तो सादारण 200 वर्सां पयलीं. पूण अजुनूय ही उर्जा वापराविणें फुकट वता. सध्या संवसार वापरता ते उर्जेच्या 10,000 पट चड उर्जा सूर्य आमकां दिता. सादारण 173,000 टेरावॅट. जगांत सौर उर्जा वापरतात. कितली? सगल्यां तरांच्या उर्जेच्या फक्त पांच टक्के. ताका लागून आमकां यत्न केल्यार कितली सौर उर्जा वापरूंक मेळटली, हाची फक्त कल्पना करची. सगल्यांत चड सौर उर्जा चीन वापरता. 430 गिगावॅट. आमचो क्रमांक संवसारांत पांचवो लागता. आमी चीना वांगडा हे बाबतींत सर्त करूं येता. आतां गोंयां सयत प्रत्येक राज्य सरकारां सौर उर्जेच्या प्रसारा खातीर यत्न करता. घरांचेर सोलर पॅनल लावपाक सरकार 18 हजार रुपया अनुदान दिवपाचें आसा. गोंय उद्देगीक संघटणेनूय फेब्रुवारींत 20 मेगावॅट सौर प्रकल्पा खातीर फुडाकार घेतिल्लो. तांच्या कामांक सुरवातूय जाल्या आसतली. उद्देगीक आस्थापनांनी आपापल्या पाख्यांचेर सौर उर्जा पॅनल बसोवपाक चालना दिवपाचें तांणी थारायलां. पणजे शारांत सौर उर्जा पॅनल बसोवप्यां मदीं बरींच खाजगी आस्थापनां आसात. उद्देग, वेवसायांनी हे बाबतींत फुडाराक घेतलो जाल्यार ह्या मळाचेर क्रांती जावं येता. शाश्वत उर्जा आपणावपाक चालना दिवप, कार्बन उणो करप हे नदरेन उद्देग संघटणा वावुरता. सहकार तत्वाचेर पावलां उबारल्यार तांकां 20 मेगावॅट सौर उर्जा तयार करप तशें कठीण न्हय. सध्या पिळर्ण उद्देगीक वसणुकेंत एक सौर उर्जा प्रकल्प आसा. तसो दरेके वसणुकेंत जावचो.
फक्त उद्देगूच न्हय, तर पणजे शारांतल्या प्रमाण हेर कडल्या खाजगी संस्थांनी मुखार पावल मारून सौर उर्जा आपणावची. वयर म्हणलां ते प्रमाण शिक्षणीक संस्था, बँको, देवळांच्यो अग्रशाळा, आपमजत गट, लघुउद्देग हांणी सोलर पॅनल बसोवप गरजेचें. फक्त उदक तापोवपा पुरतोच सौर पॅनलांचो चड वापर जाता. मात, तांचो सगल्या तरांचो वापर जातलो हे खातीर सरकारी यंत्रणांनी फुडाकार घेवंक जाय. सौर उर्जा वापरून स्ट्रीट लायट पेटोवपाक मेळटा. घरांनी वीज वापरूं येता. आयज अन्न पुरवण वेवसाय खूब वाडला. गोंयांत बरींच हाॅटेलां आसात. तातूंतलीं व्हडलीं हाॅटेलां सौर उर्जा वापरतात. पूण ल्हान हाॅटेलांनीय ते नदरेन यत्न करूंक फावो. जांकां तेर्रास आसा, तांणी तर हाचो लाव घेवपाकूच जाय. आपमजत गटांक खाणां तयार करतना शेगडी लागता. सौर उर्जेचेर चलपी शेगडी तीं वापरीत जाल्यार अर्थीक बचत जातली. अग्रशाळांकूय सौर उर्जा पॅनल गरजेचे.
पणजे शारान सौर उर्जेचो आदर्श घालून दिला. आतां हेर शारांनी (आनी गांवांनीय) मुखार सरचें आनी पणजेच्या खूब खूब मुखार पावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
