भांगरभूंय | प्रतिनिधी
नवी दिल्ली, खबरां संस्था ः भारतांतल्या 5-15 वर्सां पिरायेच्या सगळ्या शारांतल्या भुरग्यां मदल्या एक तृतीयांश भुरग्यांक 2030 मेरेन मायोपिया दुयेंस जावपाची शक्यताय आसा अशें दोळ्यांच्या दोतोरांनी सांगलां. तशेंच 2050 मेरेन देशांतल्या दर दोन भुरग्यांतल्यान एक भुरगो मायोपिक जातलो असोय अदमास तांणी उक्तायला. 1999 ते 2019 ह्या 20 वर्सांच्या काळांत भारतांतल्या शारांतल्या भुरग्यांमदीं मायोपियाचें प्रमाण अनुक्रमान 4.44% वयल्यान 21.15% मेरेन तिपटीन वाडलां.
फाटल्या कांय वर्सांत शारांतल्या भुरग्यां मदीं मायोपियाचें प्रमाण स्थिरपणान वाडत आसा. दर वर्सा भारतभरांतले 20 वर्सां सकयले सुमार 1 लाख 20 हजार मायोपिक दुयेंती दोळ्यांच्या हॉस्पिटलांत भेट दिता. 5 ते 15 वर्सां पिरायेच्या शारांतल्या भुरग्यांमदीं मायोपियाचें प्रमाण 1999 वर्सा 4.44% आशिल्लें तें 2019 वर्सा 21.15% जालां.
दर वर्साक 0.8% प्रमाण आमचो अदमासा आसा, शारांतल्या भुरग्यां मदीं मायोपियाचें प्रमाण वाडटलें. 2023 वर्सा 31.89%, 2040 वर्सा 40% आनी 2050 वर्सा 48.1%. हाचो अर्थ भारतांतल्या दर दोन भुरग्यांतल्या एका भुरग्याक फुडल्या 25 वर्सांत मायोपियाचो त्रास जातलो, जो सध्याच्या चारांतल्या एका भुरग्या परस चड आसा अशें डॉ. स्मित एम बावरिया हांणी सांगलें.
मायोपिया वाडपाची कारणां
दोतोरांच्या म्हणण्या प्रमाण जिणे पद्दतीक लागून, चड काळ स्क्रीन वापरपाक आनी भायर उण्या प्रमाणांत भोंवप हाका लागून भुरग्यांमदीं मायोपियाचे प्रमाण नेटान वाडत आसात. स्क्रीनाचेर चड वेळ घालोवप भुरग्यांचे दोळे, रेटिना आनी मेंदू उत्तेजीत करता. जाका लागून दोळ्यांच्या बुबुळाक गती मेळटा आनी मायोपिया नेटान वाडता.
लेसर नदर दुरुस्ती उपचारूय पिरायेच्या 19 वर्सां उपरांत करुं येता. पूण नेमान दोळ्यांची तपासणी करप, स्क्रीन वेळ समतोल दवरपा खातीर भुरग्यांक निवळ सुर्याच्या उजवाडांत व्हरप आनी मायोपियाची फुडली प्रगती मंद करपा खातीर अॅट्रोपिन दोळ्यांचे थेंब वा मायोपिया नियंत्रण चश्मे सारकिल्या वैजकी गजालींचो विचार करप म्हत्वाचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
