भांगरभूंय | प्रतिनिधी
कवी सुधाकर गायधनी हांची एक मराठी कविता आसा. तिचो आशय असो. बोंदरां पांघरून भांगर विकपाक बसलों. गिरायक कशेंच येना. पूण भांगर पांघरून बोंदरां विकपाक बसलों, गर्दी कशीच सोंपना. हो संवसारूच दिखाव्याचो. शिक्षण मळूय हाका आडवाद ना. कडक फेर्राद गणभेस. गळ्यांत टाय, कंबराक बेल्ट, पांयांत बूट आशिल्ल्या शाळांनी गर्दी पडटा. तातूंत ती इंग्लीश माध्यमाची आसल्यार विचारूं नाकात. थंय दर्जेदार शिक्षण मेळूं वा ना मेळूं, पूण कडक शिस्त मात आसपाक जाय. हेच मानसिकतायेक लागून गोंयांतूच न्हय, तर देशभरांत सरकारी शाळा रिकाम्यो पडल्यात. अर्थांत हाका हेर कारणांय आसात. सरकारी शाळा म्हणली काय पालक नाक मुड्डिटात. दिल्लींत आम आदमी पक्षाचें सरकार आयलें तेन्ना तांणी सरकारी शाळांक बरे दीस हाडले. तांचे निकालूय बरे लागपाक लागले. साधनसुविधांचे बाबतींत त्यो शाळा खाजगी शाळांच्या मुखार पावल्यो. तेन्ना पालकांचे दोळे उक्ते जाले आनी आतां ते भुरग्यांक सरकारी शाळांनी धाडपाक लागल्यात. हो ट्रेंड आतां गोंयांतूय सुरू जाला, अशें म्हणू येता.
हालींच धावे यत्तेचो निकाल लागलो. सरकारी विद्यालयांत 1573 विद्यार्थ्यां मदले 1437 विद्यार्थी पास जाले. 78 सरकारी विद्यालयांतल्या 41 विद्यालयांचो निकाल 100 टक्के लागला. ही गजाल तोखणाय करी सारकी. सरकारान पत्रकार परिशद घेवंक नाशिल्ली, जाल्यार हें लोकांक कळचेंय नाशिल्लें. सरकारी शाळांक नांवां दवरप्यांच्या नाकाक दावो हात लावपा सारकी ही गजाल. आतां मेरेन गोंयकार पालक भुरग्यांक शक्यतो खाजगी शाळांनीच घालीत आयल्यात. सरकारी शाळांनी कोण शिकतात, तर थोडीं गोंयकार आनी उरिल्लीं हांगा येवन स्थायिक जाल्ल्या परप्रांतीयांचीं भुरगीं. फट दिसता जाल्यार गांवांनी वचून पळोवचें. राजा – राणयेच्या काणयांनी आवडटी आनी नावडटी राणी आसता. तश्यो ह्यो पालकांच्यो नावडट्यो शाळा. मात हाचे मुखार ह्यो शाळा दर्ज्याचे नदरेन आमकां सुदारच्यो पडटल्यो. सरकारी शाळा म्हणटकच पगार मेळटलो. शिकोवपाची चड मेहनत कित्याक घेवपाक जाय, असो कोणाचो दिश्टीकोन आसा जाल्यार ताणें तो सोडल्यार बरो.
गोंयांत शिक्षकांचो उणाव ना. बरे शिकोवपी जायते शिक्षक आसात. दरवर्सा डीएड, बीएड प्रशिक्षण घेतिल्ले कितलेशेच विद्यार्थी भायर सरतात. तांकां वर्सा भितर नोकरी मात मेळपाक जाय. अनुदानित शाळां परस सरकारी शाळांचे विद्यार्थी तितले हुशार नासतात. तरीय शिक्षकांच्या यत्नांक लागून बरो निकाल लागला. शंबर टक्के निकाल लागिल्ल्या शाळांच्या मुख्याध्यापकांचो भोवमान करपाचें सरकारान थारायलां. ताचेच वांगडा ज्या विशयांचो बरो निकाल लागला, त्या शिक्षकांचो सत्कार करचो. शक्य आसल्यार तांकां पगारांत एक इंक्रिमेंट दिवं येता. पयले पांच क्रमांक मेळिल्ल्या विद्यार्थ्यांक फुडल्या शिक्षणा खातीर अर्थीक मजत करूं येता. तशें केल्यार विद्यार्थी (प्रत्यक्षांत पालक) ह्या सरकारी शाळां कडेन आकर्शीत जातले.
100 टक्के निकाल लागचो म्हूण णववे यत्तेंत विद्यार्थ्यांक नापास करपाचो गुप्त प्रकार बऱ्याच शाळांनी चलता. ताचेर शक्य तितली कडक पावलां उबारपाक जाय. सरकारान हाची दखल घेतल्या ही बरी गजाल. आलायतें शुल्क घेवपी अनुदानीत शिक्षण संस्थांचेर कारवाय करपाची शिटकावणी सरकारान दिल्या. देखभाल आनी हेर सुविधा खातीर अनुदान मेळटा आसतना अशे पयशे घेवप म्हणल्यार गैरवेव्हार. मात खेळां दीस, संमेलनाच्या नांवा खाला डोनेशनां मागपी वा लागपी सगलें सामान विद्यार्थ्यांकूच हाडपाक सांगपी शाळांचेरुय खर कारवाय जावपाक जाय. 100 टक्के पालक हे विशीं कागाळ करचे नात. म्हणटकच कारवाय कशे करतले, हें सरकाराक चिंतचें पडटलें. वर्साच्या बाराय म्हयने कांय शाळांनी कार्यावळी आसतात. ताका लागपी दुडू संबंदीत वेवस्थापन पालकांच्या बोल्सांतल्यान काडटा. हेंय चुकीचें. गोंयांतल्या पालकांची अर्थीक परिस्थिती बरी आसा. पूण सगल्याच पालकांक एकेच तागडेन जोखचे न्हय. गरीब पालकांक वा जांकां 3- 4 भुरगीं आसात, तांचे हाल जातात. सरकारान हेंय लक्षांत घेवचें. शिक्षण म्हणल्यार वेवसाय जाला, अशें कांय लोक म्हणटात, तें ओगीच न्हय. खरें म्हणल्यार उंचेलें शिक्षणूय भुरग्यांक सवाय भितर घेवपाक मेळटलें, हाचेर सरकारान लक्ष केंद्रीत करपाक जाय. शिक्षण मळाचेर वायट प्रवृत्ती घुसल्यात ताचेरुय लक्ष जाय.
सरकारी शाळांचो धावेचो निकाल बरो लागला. फुडल्या वर्सा सगल्या 78 सरकारी शाळांचो निकाल 100 टक्के लागतलो हे खातीर यत्न जावचे. शिक्षकांनी मनार घेतल्यार हें कठीण न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
