भांगरभूंय | प्रतिनिधी
मनशाची कुड निरोगी आनी तंदुरुस्त उरतली जाल्यार सदांच व्यायाम करपाक जाय. व्यायामा बगर दुसरो पर्याय ना. नेमान
व्यायाम केल्ल्यान कुडीची भलायकी बरी उरता. मन प्रफुल्लित, चैतन्यमय आनी टवटवीत जाता. मनशाचे जेन्ना स्वास्थ इबाडटा तेन्ना मनीस चिडचिड करपाक लागता. कोणाचो राग कोणाचेरूय काडटा. शारिरीक स्वास्था वांगडा मानसीक स्वास्थूय गरजेचें. आनी तें दिसपट्ट्या व्यायामांतल्यान मेळटा. शारीरीक आनी मानसीक भलायकेचे सुधारणे खातीर व्यायाम सामको गरजेचो. आयच्या काळांत सगळ्यांचेच यांत्रिकीकरण जाल्ल्यान मनशाची जीण सामकी सोंपी जाल्या. मशिना बगर मनशाचें पान हालना. शारिरीक स्रम उणावत चल्ल्यात आनी मनशाची हालचाल कमी जाल्या. ताचो परिणाम ताचे भलायकेचेर जावंक लागला.
नेमान व्यायाम केल्ल्यान कुडीची लवचिकताय वाडटा. आळस पयस जाता. काम करपाची शक्त वाडटा. आत्मविश्वास वाडटा आनी मनूय प्रसन्न उरता. देखून जण एकल्यान सकाळचो वा सांजेचो व्यायाम करपाक जाय. व्यायाम साधारण 30 मिनटां तरी करपाक जाय. आयज दोतोर दर एका पेंश्टाक चलपाचो व्यायाम कर म्हूण सांगता. लोक पासयेक वतात पूण इश्ट इश्टीणी वांगडा. चलतना हाच्यो ताच्यो खबरी मारीत चलतात. ताका व्यायाम म्हणना. चलताना मोबायल वांगडा आसूंक फावना. चलतना घामान कपडे भिजूंक जाय. कुडींतल्यान घामाच्यो पावळ्यो देवूंक जाय. लाकडां फोडपी मानायाच्यो देंवतात तश्यो. मनशाचें चित्त जाग्यार आनी मन शांत उरपाक व्यायामाची गरज. सुदृढ शरीर कमोवपाक व्यायामशाळेंतूच म्हणजे जिमानूच वचपाक जाय अशें ना. घरच्या घरा उपलब्द साधनाचो उपेग करून कितलोसोच व्यायाम करूं येता. पूण ना. जिमान गेल्ल्याचें आनी पयशें मोडिल्ल्याचें समाधान मेळपाक जाय. आयज ही फॅशन जाल्या. आदल्या तेंपार जिम काय फिम. कश्टांची कामां इतलीं आसतालीं. तांतूनूच कुडीक जाय तितलो व्यायाम मेळटालो आनी पुरो जावन सुस्त झेम पडटाली. आयज मनशाची झेम गेल्या. मनशाचे आरोग्य बिघडपाक मोबायल वापराचो अतिरेक आनी जागरणां. तशेंच मनाचेर पडपी ताणतणाव.
आदल्या तेंपार आमचो जिम म्हणजे आख्खो सैमूच. आमकां वेगळो व्यायाम करचोच पडनासलो. दोनूय हातांनी 15 -15 तरव्यांच्यो पेणयो घेवन वांयगणाच्या कुणग्यांनी चलप म्हणजे दिव्यच आसलें. 25- 30 मिटर उंचायेर लागिल्लें आंबे फातरावप सोंपे नासलें. घुड्यान, लाटीन उदक काडून शेताक घालप म्हणजे सगळ्या सर्वांगाक व्यायाम जावचो. पुरणी कसोवप, कल्लें घेवन कुळागर शिंपप. दोंगरार वचून लांकडा हाडप. मिर्गार कामाची ताणी. पायांक थार नासतलो. काजीच्या तेंपार आनी मळणेच्या वेळार तर विचारूंकूच नाका. पायांची सामकी चाळण जाताली. झाडांचेर चडप, तळयेंत, दर्यात वरांची वरां पेंवप. एक वेगळोच आनंद. माथ्यार 10 -10 कुडवांचे साक घेवप. थोडे काम तें? थोडो वावर तो? कुडीक कितलो व्यायाम जावचो.
आयज 15- 16 वर्सा पिरायच्या भुरग्यांक कश्टाचीं कामां करपाक लज दिसता वा आदली कामां आतां काळाभायरी जाल्यात. आयज किशोरवयीन (टीन एज) भुरगो जिमान वचून शरीर कमोवंक सोदता. फकत हॅन्डसम दिसपा खातीर. भलायके खातीर न्हय. हें साप्प चुकीचें. आदल्या तेंपार नळ नासले. बांयचेर राजवान उदक काडून न्हांवचें पडटालें. बायलां हांडीर दोडी घेवन घरचें उदक भरताली. कपडे बांयचे फातरीर उमळटालीं. मिरसांग रगड्यार वा फातरीर वाडट्टांली. दांत्या़ंर दळटालीं… सगलें जालें इतिहास जमा. लाकडां भरे हाडटाली, चुलीत उजो फुंकताली देखून बायलांचो जीव बरो उरतालो. आतां सगलींच जाणां सांज सकाळ चलपाचो व्यायाम करतात, थोडी जिमानूय वतात. जिमान गेलोच म्हूण जायना. व्यायाम करून येतकच भूक लागता तेन्ना पुश्टीक आहार घेवपाक जाय. तरूच त्या व्यायामाचो फायदो. तें सेलिब्रेटी करतात म्हूण आमकां परवडचेंना हें आमकां कळपाक जाय.
आयचे धांवपळीचे जिणेंत सगळ्यांकच व्यायामाची सामकी गरज आसा. सकाळी उठून सुर्यनमस्कार करात, आसनां, कपालभारती, प्राणायाम, अनुलोमविलोम. व्यायाम केल्ल्यान मनशाक नवीन उर्जा प्राप्त जाता. हेवूय आमी जाणा जावंक जाय. कांय जाण प्रोटीन पावडर खातात. तंदुरूस्त रावपाक आडेची बॉडी उपकारना ती नैसर्गीक वाडपाक जाय. फाटले पिळगेतल्या लोकांनी गरिबी अणभवल्या, कश्ट केल्यात, भूक सोंसल्या. हे पिळगेंतल्या लोका कडेन सामाजीक भान दिश्टी पडटा. संवेदनशीलतेन भरिल्लें हे लोक. निस्वार्थीपणान सामाजीक वावर करतनाय दिश्टी पडटात. संस्कार घेवन जगतना दिश्टी पडटात. सगळ्यां कडेन आपलेपणाचें नातें सांबाळपी ही पिळगी हे पिळगेन समाजा खातीर भरीव अशें योगदान दिला आनी दित आसा. कारण हे पिळगेक कश्ट म्हणजे कितें हे समजलां तांणी खरकश्ट, दगदग अणभवल्या. आनी म्हणूनच ही पिळगी दुस-याक रेस्पेद दिवंक जाणा. आनी रेस्पेद घेवंक जाणा. तें आपणाली बॉडी बिल्ड करपाक खंयच्याच जिमान गेलेना. जण एकल्यान स्पर्धात्मक युगांत जगतना समाजभान दवरून जियेवंक जाय हें खरें आसलें तरी आपले भलायके कडेन आडनदर करून उपकारना. प्रत्येकान आपल्या जिवाची काळजी ही घेवपाकूच जाय. थंय घाळ रावून उपकारना. जण एकल्यान स्वता खातीर वेळ हो काडपाकूच जाय.
वेळोवेळ बॉडी चेकअप करपाकूच जाय. उपरांत ओss म्हणून उपकरना. कितें आसता, समाजसेवेक पसून एक मर्यादा आसता. स्वताचे भलायके कडेन आडनदर करून फकत धांवपळ उपकारना. कितलोय बिझी आसूं. तांतूल्या तांतूत वेळ काडून नेमान व्यायाम करपाकूच जाय. कारण हेल्थ इज वेल्थ म्हणजेच आरोग्य धनसंपदा.
काशिनाथ नायक
9158345844
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
