भांगरभूंय | प्रतिनिधी
विधानसभा सुरू जावपाची आसता तेन्ना कांय जाण आपल्या समस्यांचें निवेदन लोकप्रतिनिधींक चुकनासतना दितात. मागीर ते विधानसभेंत ताचेर चर्चा करतात. घडये त्यो समस्यांचेर आस्वासनां मेळटात वा त्यो सुटाव्योय जातात. वेंचणुकांच्या दिसांनीय कांयसो असोच प्रकार जाता. तो म्हणल्यार समस्या सोडोवपाक तुमी कितें करतले, असो प्रस्न मतदार विचारतात. मागीर दारांत वा सभा, बसकेक आयिल्ल्या उमेदवाराक आस्वासन दिवचेंच पडटा. कारण निमणो मतांचो प्रस्न आसता. उपरांत तो तें आस्वासन पाळटा काय ना, तें येवपी काळूच सांगता. म्हालांतल्या रानवटी जनावरांच्या सतावणुके विशीं भुमिका स्पश्ट करची, असो उलो भाजपाचे श्रीपाद नायक आनी काँग्रेसीचे रमाकांत खलप ह्या उमेदवारांक सत्तरींतल्या शेतकारांनी मारला. जिखून येता तांणी हो प्रस्न लोकसभेंत मांडचो, अशेंय तांणी मागलां. फाटलीं बरींच वर्सां आमकां सतावपी ह्या जनावरां विशीं आवाज काडला, निवेदनां भेटयल्यांत, उपोशणां केल्यांत. मात कोणेंच ताचे कडेन लक्ष दिवंक ना, असो शिणूय शेतकारांनी काडला.
सत्तरींतल्या शेतकारांच्या मतान, म्हालांत खास करून रानां कुशीक आशिल्ल्या शेतां, पोरसां, बागायतींनी रानवटी जनावरांचो खूब त्रास जाता. ताका लागून पिकाचें खूब लुकसाण जाता. फायदो मातयेंत वता. फाटीं शेतकारांनी खर मागणी करतकच रानदुकराक उपद्रवी प्राणी म्हूण जाहीर केल्लो. मात उपरांत ताचेर बोवाळ जालो. शेतां- भाटांतलें पीक ना करता अशें कारण दिवन रानदुकराचो कांस करपाचें प्रमाण वाडटलें, अशे प्राणीमोगीक दिसपाक लागलें. पूण, हे रानदुकर, खेतीं, माकड, शेकरूं (व्हडली चानी), गवे शेतकारांक त्रास, मनस्ताप दितात, हातूंत दुबाव ना. हें पयलीं सावन चलत आयलां. ताचेर साबार दिसाळ्यांनी वार्तापत्रां, मुलाखती, लेख, अग्रलेख आयल्यात. पूण, जनावरांचो बंदोबस्त काय जावंक ना. तेन्ना निदान लोकसभेंत तरी हो प्रस्न अॅड. खलप वा श्रीपाद नायक हांणी काडचो, अशी शेतकारांची मागणी. श्रीपाद हांणी तो प्रस्न काडूंक ना, अशेंय तांचें म्हणणें. हे बाबतींत सरकाराचें एक धोरण आसचें, अशेंय शेतकारांक दिसता. सत्तरींत शेतकार फळां, भाजयो, भात सगलेंच पीक घेतात. जनावरांक लागून चड लुकसाण जाता तें नाल्ल, सुपारी, केळीं, आंबो, काजू हांचें. माकड हो चड उपद्रवी जाला. सुपारी, माड हें उंच रुख. तरीय रानवटी जनावरांचो ताका फटको बसता. वाऱ्यान सकयल पडिल्ले नाल्ल, सुपारी, काजू, आंबे खावपाक, तांची नासधूस करपाक रानदुकर आसातूच. शेतकारांच्या मतान, सरकारान हे संबंदी कसलेंच धोरण आखूंक नाशिल्ल्यान लोकांनी नाल्लाची (कवाथे) लागवड बंद केल्या. ही हुस्क्याची गजाल. गोंयचें मुखेल अन्न नाल्ल. तातूंत आमकां नाल्ल केरळ, कर्नाटकांतल्यान हाडचो पडटा. सध्या गोंयांतलें उत्पादन आनीक उणें जालें जाल्यार नाल्लाचें मोल मळबाक तेंकतलें. ताचो भौसाकूच त्रास जातलो. आनीक एक भिरांत आसा ती म्हणल्यार, नवी पिळगी चड फायदो जायना हें स्पश्ट दिसतकच घरच्या शेती, बागायती वेवसायांत देंवची ना. तोय हुस्को आतांच दिसपाक लागला. फाल्यां कचकचीत दुडू मेळटात, म्हूण तरणाटे घरची जमीन भायल्यांक विकूंक फाटी रावचे नात. सरकारान हेंय लक्षांत घेवपाक जाय. कृशी खातें साबार येवजण्यां वरवीं नव्या, पोरण्यां शेतकारांक उर्बा दिता. तांकां शेताचे राखणे खातीर, बी, सारें, कीडनाशकां, वंये खातीर अनुदान, सवलत दिता. आदारभूत मोल दिता. पूण उपद्रवी रानवटी जनावरां पसून पिकाची राखण करपा विशीं रामबाण उपाय दिना. तांकां शेतकारांचे हे समस्येची जाणीव ना काय?
शेतकाराक अडाणी, बावळट, मागास लेखपाची एक संवय कांय जाणांक आसा, पूण तो कितलो म्हत्वाचो तें पिकाची टंचाय जाली काय कळटा. लाखांनी दुडू आसात, पूण खावपाक कड्डण, फळां, भाजी, दूद ना, जाल्यार कित्याक उपकारता? शेतकार आसात, म्हूण आमकां हें मेळटा हें आमी विसरूंक फावना. शेतकार हो आमचो अन्नदाता. ताका देवा समान मानपाक, वागोवपाक जाय. उपद्रवी रानवटी जनावरां ही ताची समस्या जाल्या. रानांनी खावपाक कांय नाशिल्ल्यान जनावरांक गांवांनी येवचें पडटा आनी ताचो फटको बाबड्या शेतकाराक बसता. हें आनीक कितलीं
वर्सां चलतलें?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
