भांगरभूंय | प्रतिनिधी
सद्या जायत्या शारांनी पर्यावरणाची समस्या गंभीर जावपाक लागल्या. वाडत वचपी वाहनांचो आंकडो आनी ताका लागून
जावपी प्रदुशणाक लागून जायत्या जाणांक स्वास घेवपाचे विकार जावपाक लागल्यात. दिल्ली आनी बेंगळुरू शारांतली हवा खूब प्रदुशीत आसा, थंय भुरग्यांक स्वास घेवपाच्या विकारांक लागून त्रास जातात, अशें आमी वाचतात.
हवे वांगडाच उदकूय प्रदुशीत जायत आसा. जायत्यो न्हंयो व्हांवनात. ताचेर जलपर्णी वनस्पती वाडत आसा. म्हणजे तें उदक पिवपाक योग्य ना. जायत्या वाठारांनी झाडां कापून ताचे बदला शिमीट, काँक्रीटाचे रस्ते बांदपाक लागल्यात. एकूण पळयल्यार हवा, उदक आनी भलायकी दुर्मीळ जायत आसात, पिकाचेर वखदांचो फवारो मारतात, देखून ह्या सगळ्यांचो मनशाच्या अन्न पदार्थांत आस्पाव जावपाक लागला. सध्या जायत्या शारांनी तापमान 40 अंशां मेरेन पावलां. फुडल्या काळांत तातूंत आनीक वाड जावपाची शक्यताय आसा. एकंदरीत पर्यावरणाची समस्या दिसानदीस गंभीर जायत आसा.
झाडां प्रत्यक्षांत मनशाचे इश्ट आसतात. ताची लागवड सगळे कडेन करपाक जाय. आदले भशेन न्हंयो व्हांवपाक जाय. सुमार चार- पांच दशकां आदलो काळ याद जाता. त्या वेळार न्हंयांक नितळ उदक आसतालें. गांवांनी जायते तरेचीं झाडां फुलतालीं. आतां सारकी वाहनांची धांवपळ नाशिल्ली. देखून भलायकी बरी तिगून उरतालें. आयज उरफाटी परिस्थिती आसा. त्या वेळार लोकांक पयशांचो उणाव आशिल्लो. पूण तंदुरुस्त भलायकी. आयज पयशे आसात. सुविधा आसात. व्हड वाहनां आसात. पूण भलायकी ना. देखून पुर्विल्ल्या लोकांनी ‘आरोग्य म्हणल्यार गिरेस्तकाय’ अशें सांगलां.
आयज लोक पयशांच्या फाटल्यान आसात. तांकां पयशे जाय पूण ताचे वांगडाच तांकां बरी भलायकीय जाय. भलायकी बरी आशिल्ल्या मनशाक जियेवपाचो आनंद मेळूंक शकता.
स्कॉटलंडांत दोतोरांचो उणाव
स्कॉटलंडाचे अस्तंत दर्यादेगेर आशिल्ल्या बेंबकुला वाठारांत दोतोरांचो खूब उणाव आसा. ह्या वाठारांत रावपाक आनी काम करपाक सरकारान म्हयन्याक देड कोटी रुपया (भारतीय चलनांत) पगार दिवपाची तयारी केल्या. हो पगार युके वा युरोपांतल्या दोतोरांक मेळपी पगारा परस 40% चड आसा. ह्या पगारा भायर जे रोखडेंच हाजीर रावतले तांकां 10 हजार पावंड दिवपाचें थारलां. इतलेंच न्हय तर सरकारान रावपाचीय वेवस्था केल्या.
पूण, इतलीं सुविधा आनी सवलती दिवन लेगीत दोतोर ह्या वाठारांत येवपाक तयार नात. ह्या वाठारांत दोतोर येवंक सोदिनात हाचे फाटलें कारण म्हळ्यार ह्या वाठारांत शारांतल्यो सुविधा नात. लोकांक आपूण गांवांत रावता अशें दिसता. आयज भारताचीय हीच परिस्थिती आसा. चडशे नोकरे निमतान गांवांत रावपाक तयार नात, सगळ्यांक शारांचें आकर्शण. प्रत्यक्ष सैम आनी हवेचे नदरेन पळयल्यार शारांतल्या जिविता परस गांवांतलें जिवीत भलायकेन भरिल्लें आसता. पूण शाराचें आकर्शण उणें जायना. जायत्या भारतीय वाठारांनी हीच प्रवृत्ती दिसता. आयज लेगीत जायते लोक गांव सोडून नोकरी, शिक्षणा खातीर शारांत येतात. हो प्रवाह चालू उरलो जाल्यार फुडाराक शारां लोकांनी भरून ओत्तलीं.
जर्मनींत सात लाख नोकऱ्यो
सद्या जर्मनीक संवसारांतली तिसरी व्हड अर्थवेवस्था तशेंच युरोपांतली सगळ्यांत व्हड अर्थवेवस्था म्हणून वळखतात. सध्या थंय ज्येश्ठ नागरिकांचो आंकडो वाडत आसा आनी दुसरे वटेन तरणाट्यांचो आंकडो उणो जायत आसा. हाका लागून फाटल्या कांय दिसां सावन हांगा सात लाख कर्मचाऱ्यांचो उणाव आसा. आनीक एक वर्स जाले उपरांत देशांत सुमार 70 लाख प्रशिक्षीत कर्मचाऱ्यांची गरज पडटली.
डायस व्हेल अहवाला प्रमाण, हाचो थंयचे अर्थीक प्रगतीचेर वायट परिणाम जावपाक लागला. हाचो फायदो भारतान घेवपाक जाय. जायत्या शिकिल्ल्या तरणाट्यांक थंय नोकरी मेळूं शकता. सद्या एका आंकडेवारी प्रमाण, जर्मनींतल्या वेगवेगळ्या विद्यापिठांनी सुमार 43 हजार विद्यार्थी शिकतात. वट्ट विद्यार्थ्यां मदीं हें प्रमाण सुमार 14 टक्के आसा. आयटी आनी अभियांत्रिकी मळार व्हड संद आसा.
जर्मनींत जल्मदर 1.4 इतलो उणो आसा. एकंदरीत जर्मनींत नोकऱ्यो जाय. भारतांत उरफाटी परिस्थिती आसा. नोकरी सोदपी हजारांनी तरणाटे आसात देखून तांकां देशांत नोकरी आनी उद्देग कशे दितले तें सरकारान पळोवपाक जाय. जर्मनी सारक्या जायत्या देशांनी नोकरेच्यो संदी मेळूं येतात. सरकारान कांय तरणाट्यांक जर्मनींत नोकरी मेळची, हे खातीर यत्न करचे.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
