भांगरभूंय | प्रतिनिधी
पावसाच्या दिसांनी तकली वयर काडपी डेंग्यू, मलेरिया सारक्या दुयेंसांची धाम आतां बाराय म्हयने पातळपाक लागल्या. हालींच दोन खेपे दिवचले डेंग्यूचे दुयेंती सांपडले. हेर कडेनूय ते मेळ्ळ्यात. आडसरांच्यो, नाल्ल्यांच्यो कट्ट्यो, टायर, काशी, लातां हांचे वांगडाच मेळटा थंय दिसपी घाणयाऱ्या उदकाचीं गटारां हाका लागून जळारांची पैदास जाता. इमारतींचीं बांदकाम चलतात, थंय तेर्रास घट करपाक उदक सांठयतात आनी त्या नितळ उदकांत डेंग्यू, मलेरियाचीं जळारां तांतयां घालतात. गटारां परसूय हे जागे चड भिरांकूळ. ताकाच लागून घडये बार्देशाच्या उपजिल्होधिकाऱ्यांनी हालींच बसका घेवन म्हापशें पालिका आनी तालुक्यांतल्या पंचायतींक पावसाचें उदक खंयच सांचपाक दिवं नाकात असो आदेश दिला. मे म्हयन्याचे पयले पंद्रशेंत खरें म्हणल्यार राज्यांतल्या सगल्याच पंचायतींनी, पालिकांनी हें नितळसाणेचें काम हातांत घेवपाक जाय. मिर्गाचो पावस कोसळपाक लागलो काय मागीर हीं कामां हातांत घेवन उपकारना. तेन्ना खूब उशीर जाल्लो आसता. खरें म्हणल्यार स्वराज संस्थांक हें खबर आसपाक जाय. सरकारी यंत्रणांनी ते विशीं बसका घेतकच जागें जावप चुकीचें!
जळारां पसून डेंग्यू, चिकन गुन्या, येलो फिवर, मलेरिया, हतीरोग अशीं साबार दुयेंसां जातात. तातूंत संवसारभरांत वर्साक 7 लाखां वयर लोकांक मरण येता. चडशीं भुरगीं. जळारांक लागून संवसारांत सगल्यांत चड मरणां जातात, तीं आफ्रिका आनी आशिया खंडांत. हाचे वयल्यान आमी जळारां पसून कितले सादूर रावपाक जाय, तें कळटा. भारतांत सगल्याकूच जळारां आसात. वांगडां दुयेंसांय, पूण जंय दोंगर, दुर्गम वाठार आसा, थंय मलेरिया, डेंग्यू चड प्रमाणांत पातळटा. हाची बादा चड करून जाता, आदिवासींक. ईशान्ये कडलीं राज्यां, ओडिशा, झारखंड, छत्तीसगढ, मध्यप्रदेश, गुजरात, महाराष्ट्र, अस्तंत बंगाल ह्या राज्यांनी पावसाच्या दिसांनी जळारां पसून जाल्ल्या दुयेंसांचो आंकडो चड आसा, हें खुद्द सरकारी यंत्रणांचे अहवाल सांगतात.
राज्यांत बेकायदो नर्सरी आनी कावलां अड्ड्यांचो मुद्दो म्हापशेचे बसकेंत गाजलो. हीं थळां जळारां पैदास केंद्रां जाल्यांत, असो दावो भोवतेकांनी केलो. कावलां अड्ड्यांचेर लातां, डबे आसतात. थंय पावसाचें उदक सांठून उरलें जाल्यार जळारांक रान मेकळें. नर्सरींनीय वाझ, रोपे लायिल्ल्यो पोतयो आसतात. तातूंतय उदक उरता. गोंयांत आडसरां विकपाचो धंदो व्हड प्रमाणांत चलता. फोडिल्लीं आडसरां ते नेमके खंय उडयतात, तें पळोवचें पडटलें. सगलेच मेळटा थंय उडोवचे नात. पूण, थोडे तरी आशिकुशीक व्हरून तीं उडयतात आसतले. पालिका, पंचायतींनी हाचेर नदर दवरपाक जाय. हे बसकेंत भलायकी केंद्रांनी दिल्ली मलेरिया, डेंग्यूच्या प्रकरणांची आंकडेवारी, बांदकाम प्रकल्पांचो आंकडो सादर जालो. खास करून दर्यादेग वाठारांत बांदकामां नेटान चलतात. तीं करपाक अर्थांत दुसऱ्या राज्यांतल्यान मानाय, कामेऱ्यां येतात. तातूंतल्या एकल्याक पसून मलेरिया, डेंग्यू आसल्यार तो पातळपाक चड वेळ लागना. हें मतींत घेवन संबंदीत काॅण्ट्रॅक्टरान आपल्या कामगारांची वैजकी तपासणी करून तांकां भलायकी कार्डां दिवपाक जाय. कायद्यान ती सक्ती आसा. पूण कायदो पाळटा कोण?
राज्यांतल्यो शाळा एप्रील, मे म्हयन्यांत बंद आसतात. म्हणटकच विद्यार्थ्यांच्यो नितळसाण मोहिमो जायनात. पूण गांवांतल्या महिला मंडळांनी, क्लबांनी, समाजवावुरप्यांनी जळारांक लागून दुयेंसां पातळचीं न्हय, म्हूण नितळसाणीचें कार्य करूं येता. सध्या बरेच समाजसेवक हें काम करतात. हेरांनी तांचे पसून आदर्श घेवचो.
कामगारांक मच्छरदाणींचें वांटप करपाची सुचोवणी बसकेंत जाली. येवजण बरी आसा. तांकांच कित्याक? जंय दुयेंसां पातळटात, थंयच्या नागरिकांकूय त्यो दिवपाक जाय. भोवतेक लोकांक जळारां जावचीं न्हय, म्हूण कितें करपाक जाय, तें सगलें खबर आसता. पूण सरकाराच्या माथ्यार आप-पाप थापून ते मेकळे जातात. स्वता हात- पांय हालयनात. आळसायूय करतात. ताचोच मागीर वायट परिणाम जाता. पंचायत, पालिकांनी भलायकी अधिकाऱ्यां सांगता वावरप आनी उपाय घेवप गरजेचें. पूण बरेच लोकप्रतिनिधी गरज आशिल्लो तेंको दिनात, असो शीण बसकेंत कांयजाणांनी उक्तायलो. तो जर खरो आसत, जाल्यार…..! आपलो गांव सुरक्षीत दवरप ही दरेका लोकप्रतिनिधीची जापसालदारकी, हे तांणी विसरचें न्हय. जळार हो ल्हान, कुस्कुटा येदो जीव आसलो तरी तो धुमशेणां घालूं शकता, हेंय तांणी मतींत दवरचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
