काजू पिका कडेन लक्ष जाय

भांगरभूंय | प्रतिनिधी

सरकारान चड उत्पन्न दिवपी काजू पिकाक उर्बा दिवंक जाय आनी चडांत चड शेतकार ह्या मळाचेर येतले हे खातीर यत्न करूंक जाय.

काजीची वळख गोंयकारांक 1563 आनी 1578 वर्सा जाली. म्हणल्यार 460 वर्सां जायत आयलीं. पुर्तुगेझांनी जमनीची झीज, धूप आडावपाक काजू पयलीं मलबार दर्यादेगेर हाडले आनी रोखडेच ते गोंयांत पावले. गोंयांत मात पीक म्हूण ताचो वापर जावपाक लागलो. काजू मूळ द. अमेरिकेचो. ब्राझीलांतल्यान पुर्तुगेझांनी तो हाडलो. काजू हें उतर मूळ ब्राझील, पॅराग्वेचे तुपी- इंडियन भाशेंतल्यान (अकाजू) पुर्तुगेझींत गेलां. रेड इंडियनांची लोकसंख्या सामकी उणी जाली आनी कालांतरान ही तुपी भासूय सोंपली. काजी मात संवसारभर फाफसल्यो. तांणी गोंयकारांचेंय कल्याण केलें. मुट्टे, बिबे, घोडकां, निरो, हुर्राक, फेणी, बियो हांचो वापर हांगा जाता. ताचे वरवीं गोंयकारांच्या हातांत चार पयशे घोळटात. अर्थांत फेणयेक लागून कांय घराबे त्रासांत पडल्यात. पूण, काजीन गोंयचे अर्थवेवस्थेक योगदान दिलां, हें मान्य करचेंच पडटलें. फक्त गोंयां पुरतो आशिल्लो काजू रोखडोच केरळ, कर्नाटक, महाराष्ट्रांत पावलो. उपरांत तामिळनाडू, पाँडेचरी, आंध्र, ओडिशा, अस्तंत बंगाल आनी अंदमान जुंव्याचेरूय ताणें पांय रोंयले. आयज भारत काजूचें उत्पादन आनी निर्गत करपी संवसारांतलो आघाडेचो देश जाला.
काजीचें पीक चड, उणें येत आसता. अंदूं गोंयचें काजू पीक देंवलां. सुमार 50 टक्के इतलें, अशें शेतकी खातें सांगता. म्हणटकच शेतकार (काजकार) त्रासांत पडल्यात. कालूच आदर्श कृशी संस्थेचे अध्यक्ष प्रकाश वेळीप हांणी राज्यांत काजू दुकळ जाहीर करचो, अशी मागणी केल्या. आदारभूत मोल वाडोवन 175 रुपया करचें, अशेंय तांणी सरकारा कडेन मागलां. सध्या देडशें रुपया मेळटा. काजू किला फाटल्यान 113 रुपया खपता. म्हणचे फक्त 37 रुपया आदारभूत मोल. सध्या फक्त दोन हजार काजू उत्पादकां कडेनूच कृशी कार्ड आसा. हो आंकडो 20 टक्के जाता. हाचो अर्थ कितलेशेच शेतकार ह्या आदारभूत मोला पसून पयस आसात. तांकांय हें मोल मेळपाक संबंदीत शेतकार, संस्था, सरकारी यंत्रणांनी यत्न करपाक जाय.
गोंयांत काजीचें पीक घेवपी 16 हजार शेतकार आसात. तातूंतले साडेतीन हजार सेंद्रीय पद्दतीन पीक घेतात, जाल्यार उरिल्ले सदचे पद्दतीन. पोरूं 1920 टन सेंद्रीय काजू मेळिल्ले. अंदूं 909 टन इतले देंवल्यात. म्हणल्यार पीक उणें आयलां. देखून काजू दुकळ जाहीर करून शेतकारांक अर्थीक मजत दिवची अशी मागणी श्री. वेळीप हांणी केल्या. अर्थांत सध्या आचारसंहिता आशिल्ल्यान ही मागणी आडकून उरूंक शकता.
शेतकी खात्याच्या मतान, लहरी हवामानाक लागून काजींचें पीक देंवला. 50 ते 60 टक्के इतलें. फाटलीं कांय वर्सां पावस नोव्हेंबर मेरेन पडटा, शिंयाचो मोसमूय सारको नासता. ताचो हो परिणाम. काजू म्हणल्यार गांवगिऱ्या वाठाराची अर्थवेवस्था. ह्या मोसमांत रोजगारूय मेळटा. काजू वेंचप, जनावरां पसून राखप, मागीर भाटयेर व्हरून सोरो काडप, तयार म्हाल शारांनी व्हरप. अर्थवेवस्थेचें हें चक्र हवामानाक लागून कांय फावटीं नीट चलना. काजू कारखानेय आदले वरीं नात. ल्हान कारखाने तर बंदूच जाल्यात. बार्रांचो आंकडो वाडला, पूण काजू फेणी उत्पादन देंवलां. हेर पिकां परस गोंयांत काजींचें पीक चड. मात ताका अजून मुखेल पीक म्हूण दर्जो मेळूंक ना. शेतकार आधार निधी येवजणे खाला हॅक्टरा फाटल्यान 40 हजार रुपया लुकसाण भरपाय मेळटा. पूण, काजींच्या पिका खातीर अक्षरशा घाम गळोवचो पडटा. तातूंत रानदुकर, गोरवां सकयल पडिल्ले काजू बियां सयत खातात. माकडूय पिकाचें लुकसाण करतात. ताका लागून नवी पिळगी ह्या वेवसाया पसून पयस राविल्ली दिसता. सरकारान चड उत्पन्न दिवपी काजू पिकाक उर्बा दिवंक जाय आनी चडांत चड शेतकार ह्या मळाचेर येतले हे खातीर यत्न करूंक जाय.
दुसरी एक म्हत्वाची गजाल म्हणल्यार भायल्यान (म्हणल्यार आफ्रिकेंतल्यान) काजी हाडून त्यो भाजून विकपाचे प्रकार खूब वाडल्यात. भायल्यान रेडिमेड काजूबियोय हाडटात. ताका लागून गोंयच्या काजूंक धपको बसला. हे आयातीचेर सरकारान बारीकसाणेन लक्ष दवरचें पडटलें. हे विशीं कृशी खात्याक, संबंदीत मंत्र्यांक खबर आसा. गोंय हें पर्यटन राज्य. हांगा येवपी लागीं लागीं 100 टक्के पर्यटक काजूबियो व्हरतातूच. दिवाळी, नातलांकूय भेट दिवपाक कांय जाणांक त्यो लागतात. म्हणटकच गोंयचे काजू म्हणून तांकां आफ्रिकेचे रुच नाशिल्ले काजू दिवप ही फटवणूक. कोणेय ती केल्यार ख्यास्त दितात. मागीर हे चुकीक माफी कित्याक?