भांगरभूंय | प्रतिनिधी
भांगरभूंय । खबरां मेज
पणजीः कृशी मळार शेतकारांनी शेंतात रासायनीक साऱ्याचो वापर करपाचे सोडून सैमीक शेतांचेर भर दिल्यात तांच्या वर्सुकी जोडींत 50 तें 80 टक्क्यां मेरेन वाड जावपाक शकता असो दावो कृशी मळार वेगवेगळे प्रयोग करपा खातीर भारत सरकाराचो पद्मश्री पुरस्कार फावो जाल्ले सेम शेतकार संजय पाटील हांणी केला. सेंद्रीय साऱ्याक लागून जमनीचो कस वाडून भरपूर प्रमाणात पीक घेवप शक्य आसा, अशें तांणी पिळर्णच्या म्युझियम ऑफ गोवांत जाल्ल्या गोंयची पांचवीशार उत्क्रांत हे एमओजी कार्यावळींत पर्यावरणवादी क्लावड आल्वारीस आनी सेंद्रींय शेतकार योगिता मेहरा हांचे कडेन चर्चा करतना सांगलें.
संजय पाटील हांणी 1991 सावन सैमीक शेतां करपाक सुरवात केली. रासायनीक साऱ्याचो वापर करपाचे तांणी पुरायपणान सोडून दिलें आनी सेंद्रीय सारें वापरपाक सुरवात केली .ह्या बदलाक लागून आपल्याक पकत 80 टक्के फायदोच जालो ना जाल्यार जमनीची पिकाळसाण तिगोवन दवरपा खातीर आनी रासायनीक साऱ्यांक लागून पर्यावरणाचें जावपी नुकसान उणें करपा करपाक येश मेळ्ळें अशें तांणी सांगलें.
सरकाराच्यो शेतकी येवजण्यांचो आनी अनुदानांचो उपेग कृशी उत्पादन वाडोवपाक करचो असो सल्लो तांणी गोंयांतल्या शेतकारांक दिला. शेतकारांनी सैमीक साधन सुविधांचो वापर करून शेतां केल्यार फुडल्या पांच तें धा वर्सा भिरत गोंयांत खऱ्या अर्थान कृशी क्रांती जावापक शकता अशें तांणी सांगलें. संजय पाटील हाणी भारतीय शेतकी संशोधन मंडळ – मध्य दर्यादेग शेतकी संशोधन संस्था (आयसीएआर-सीसीएआरआय), गोंयच्या तंत्रीक पालवान शून्य उर्जा सूक्ष्म शिंपणावळ प्रणाली तांणी आपल्या सावयवेरें हांगच्या कुळागरांत येसस्वीपणान चालील लावंन एक आदर्श प्रस्थापीत केला. 1986 वर्सा सांवन ते पुराय वेळ शेतकार म्हणून वावुरतात. रासायनीक साऱ्याचो वापर करून फायद्याचें ना हे कळून आयल्या उपरांत तांणी सेंद्रीय साऱ्याचो वापर करून सैम शेत करून कृशी उत्पादन वाडयले आनी आपलो अर्थीक फायदो करून घेतलो.
रसायनांचो वापर करतना एकंदर येणावळ चड आशिल्ली. पूण रसायनीक सारें, कीड कनाशकां आनी तणनाशकां खातीर सुमार 50 टक्के चड खर्च येतालो. उत्पादन खर्च आनी उत्पादन विकून मेळपी पयशे हाचो मेळ घातल्यार खर्चूच चड जातालो अशें तांणी सांगलें.रसायनीक शेतींतल्यान सैमीक शेतींत संक्रमण करपाक सुमार पांच वर्सां लागतात, बदलांकडेन पिकांक जुळोवपाक मेळचो म्हूण सेंद्रीय शेती हो मदलो पांवडो आसता. सैमीक शेती पुरायपणान सुरू जाले उपरांत पिकांचें उत्पन्न चडांत चड पावपाक एक ते दोन वर्सां लागतलीं आनी शेतकारांक 50 टक्के फायदो जातलो अशें पाटील हांणी सांगलें.
थळाव्या गोरवांचे शेण आनी मूत, गोड आनी चण्याचे पीट जमनींत भरसून तातूंत जीवमृत हो सूक्ष्मजंतू द्रव वापरून पीक तरतरून येवपाक मजत जाता अशी म्हायती तांणी दिली. तरणाट्या शेतकारांनी पारंपरीक शेतांक आधुनिकतेची जोड दिवंन फायदो करून दिवपी शेता कडेन येवपाची गरज आसा अशें पाटील हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
