भांगरभूंय | प्रतिनिधी
भांगरभूंय । प्रतिनिधी
पणजीः हणजूण कोमुनिदादची हणजूण हांगची 32.166 हजार चौखण मीटर जमीन 16 ऑक्टोबर 1952 दिसा बोगस सेलडीडी करून हडप केल्ल्याचें 72 वर्सां उपरांत उक्ताडार आयिल्ल्यान हे संबंदी केल्ले सगळे वेव्हार रद्द करून जमीन परत कोमुनिदादचे सुवादीन करपाची मागणी उत्तर गोंय कोमुनिदाद प्रशासक सागर गावडे हांणे प्रतिज्ञापत्रा वरवीं मुंबय उच्च न्यायालयाच्या गोंय खंडपिठांत केल्या.
हणजूण हांगां सर्वे नंबर 436/1 हातूंतली कोमुनिदादची 96,580 चौखणी मीटर जमीन बोगस दस्तावेजां वरवीं हडप केल्ल्याचो दावो करून डॉ फेंटन डिसोझा, ट्रेव्हर मस्कारेन्हास आनी मायकल मंडोसा हांणी गोंय खंडपिठांत याचिका सादर केल्ली. तातूंत तांणी राज्य सरकार, हणजूण कोमुनिदाद, उत्तर गोंय कोमुनिदाद प्रशासक, उत्तर गोंय जिल्होधिकारी, हणजून पंचायत सयत राजेश पार्सेकार, ताची घरकान्न, शिवशंकर मयेकार आनी ताची घरकान्न आनी अविदंत इंद्र एलएलपी हे कंपनीक प्रतिवादी केल्लें. याचिकादारांक 2022 वर्सा जुलय म्हयन्यांत हणजूण कोमुनिदादच्या 436/1 ह्या सर्वें नंबरातले जमीन नितळसाणेचें काम चल्लां अशी खबर मेळ्ळी. ताणी हे विशीं पंचायत आनी कोमुनिदाद मंडळा कडेन चवकशी केली तेन्ना शिवशंकर मयेकार आनी ताची घरकान्न बांदकाम करपा खातीर जमीन नितळ करतात अशें कळ्ळें. हे विशीं तांणी आनीक चवकशी केली तेन्ना मयेकार हाणे 5,930 चौखण मीटर जमीन राजेश पार्सेकार हाचे कडल्यान 15 डिसेंबर 2018 दिसा विकती घेतिल्ल्याची म्हायती मेळ्ळी. याचिकादारांनी म्हायती हक्क कायद्या खाला दस्तावेज मेळयले तेन्ना पार्सेकार हाचो बापूय मदू सदा पार्सेकार हांणे 16 ऑक्टोबर 1952 दिसा दुआर्ते फ्रान्सिस डिसोझा हाचे कडल्यान हणजूणच्या सर्वे नंबर 436/1 तली 32,166 चौखण मीटर जमीन 850 रुपयांक विकतें घेतिल्ल्याचें सामकार आयलें. दुआर्ते डिसोझा हाका 2 नोव्हेंबर 1914 दिसा मरण आयिल्लें आसतना 16 ऑक्टोबर 1952 दिसा ताच्या नांवान बोगस सेलडीडी केल्ल्याचें सामकार आयलें.
हे विशीं याचिकादारांनी चवकशी केली तेन्ना दुआर्ते डिसोझा हाका गव्हर्नर जनरला आदेश जारी करून 32,166 चौखण मीटर कोमुनिदाद जमीन आफ्रामेंत पद्दतीन दिल्ल्याचीं कागदपत्रां मेळ्ळी. दुआर्ते डिसोझा आनी तांच्या घरच्यांक 6 जानेवारी 1913 दिसा कोमुनिदादची 348 चौखण मीटर जमीन दिल्ली. उपरांत तातूंत फेरफार करून 348 चौखण मीटर जमनीचे सुवातेर 96,580 चौखण मीटर जमीन दिल्ल्याचो बोगस दस्तावेज तयार केल्ल्याचें उक्ताडार आयलें. ह्या पुराय प्रकरणाची चवकशी करपाची मागणी याचिकादारांनी संबंदीत यंत्रणे कडेन केली. मात कसलीच हालचाल जायना हे पळोवन तांणी मुंबय उच्च न्यायालयाच्या गोंय खंडपिठांत याचिका दाखल केली. ताची दखल घेवन न्यायालयान सरकारी यंत्रणेक बाजू मांडपाक सांगल्लें. पार्सेकार घराब्या सयत हेर प्रतिवादींक वयल्या जमनीचे दस्तावेज सादर करपाचो आदेश दिला. वादग्रस्त जमनी संबंदी कसलेच वेव्हार करपाक प्रतिबंद केला.
उसो उक्ताडार आयलो प्रकार
उत्तर गोंय कोमुनिदाद प्रशासनान संबंदीत जमनीची चवकशी केली तेन्ना बोगस दत्तावेज तयार केल्ल्याचें सामकार आयलें. तशेंच कोमुनिदादींतली पावती पुस्तक आनी हेर दस्तावेज ना जाल्ल्याचें सामकार आयलें. हे मजगतीं कोमुनिदाद प्रशासनान सबंदीत जमनी संबंदी 16 ऑक्टोबर 1952 दिसा जाल्ल्या सेलडीडाची पुरातत्व खात्या कडेन म्हायती मागयली.. त्या वेळार सेलडीडीचे सुवातेर आंतोनियो पियो जुझे लोबो आनी मारिया सेलिना दा नोरोन्हा हांचे मदीं जाल्ल्या काजारा पयलींच्या कबलात पत्र सामकार आयलें. ह्या प्रकरणाची दखल घेवन उत्तर गोंय कोमुनिदाद प्रशासकान उच्च न्यायालयाच्या गोंय खंडपिठांत प्रतिज्ञापत्र सादर करून संबंदीत जमनी संबंदीचे सगले विक्री वेव्हार रद्द करून जमीन परत हणजूण कोमुनिदादचे सुवादीन करपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
