वेंचणुकेंतलें तीर्थ

भांगरभूंय | प्रतिनिधी

वेंचणुको शांतिकायेन जावच्यो हे खातीर वेंचणूक आयोग, राज्य प्रशासन आपले परीन यत्न करता. ताका पालव दिवप प्रत्येकाची लागणूक. जावं ते मागीर राजकी पक्ष, संघटणां आनी समाज!!

रात थोडी, संवगां चड, अशें म्हणटात. प्रत्यक्षांत ही म्हण संवगांचेरूच आदारीत आसा. म्हणल्यार फांतोड जायत आयली तरी नाटकांतलीं पात्रां सोंपून सोंपनात. एक- एक माचयेर येत रावतात. पूण, चड करून ही म्हण काम चड आनी वेळ उणो वा कामाच्या वेळार तें करिनासतना नाका जाल्ली बडबड करप हे बाबतींत वापरतात. आतां वेंचणुकेचो प्रचार नेटान सुरू जातलो. हांगांय रात थोडी, संवगां चड (म्हणल्यार कामां, तुमचे तकलेंत आयला तो अर्थ न्हय). खास करून वेंचणूक आयोग आनी पुलीस यंत्रणे खातीर. तांकां दोळ्यांत तेल घालून म्हणटात (हीय एक म्हणूच) तशें सादूर रावचें पडटलें. कालूच मोलें चेक नाक्या लागसारच्या रानांत गस्तीचेर गेल्ल्या पुलिसांक सोऱ्याच्यो 37 बाटल्यो मेळ्ळ्यो. बेवारशी स्थितींत त्यो लिपोवन दवरिल्ल्यो. हातूंत कितें नविदाद? गोंयांतल्यान भायर गेल्लो सोरो कर्नाटक चेक नाक्या वयले अबकारी अधिकारी अदीं मदीं धरतात, अशें कोणाकूय दिसतलें. मात, आतां वेंचणूक काळ सुरू जाला आनी ह्या काळांतलें सगल्यांत मोलादीक एनर्जी ड्रिंक म्हणल्यार सोरो, (आनी दुडू!) हें आमी विसरूंक फावना. आतां सोऱ्याचे व्हाळ व्हांवतले आनी तातूंत पावन जावपाक जो- तो धडपडटलो. तेन्ना सोऱ्याचेर नियंत्रण हें जायच.
मोल्यां रानांत सोरो मेळ्ळो, थंय कोण नाशिल्लो. तो लिपचोरयां कर्नाटकांत व्हरताले, असो दुबाव पुलिसांनी उक्तायला. लोकसभा वेंचणूक पुराय देशांत आसा. म्हणटकच शिमे वयल्यान सोरो भायर- भितर जायत रावतलो. निदान 7 मे मेरेन तरी पुलिसांक सादूर रावचें पडटलें. प्रचाराक भोंवपी आदल्या तेंपार थंड पेयां (एखादोच कोण तिर्थप्राशन करी), वडा- पाव, चिकन इतल्याचेर समाधान मानताले. मात, आतां काळा वांगडा प्रचारकूय बदल्ल्यात. चडश्यांक ओली मेजवानी जाय पडटा. हातूंत काॅलेजीक वचपी तरणाटेय कांय प्रमाणांत आसतात. पुलिसांनी सांजच्या, रातच्या वेळार गस्त घालीत जाल्यार वाट चुकिल्ल्या तरणाट्यांक उजू मार्गार हाडपाक मेळटलें. उमेदवार आनी तांच्या मुखेल वावुरप्यांनीय हाचेर विचार करपाक जाय. आतां मेळत थंय पोस्टर, बॅनर लावपाक मेळनात. नाजाल्यार आदल्या तेंपार लोकांच्या रंगयिल्ल्या घरांचेर पसून पोस्टर लावन वण्टी विद्रूप करपी आशिल्ले. झाडांक खिळे मारून बॅनर लावपी आशिल्ले. तातूंत पर्यावरणाचें लुकसाण जाता, हाचीय तांकां पर्वा नाशिल्ली. शस्त्रां घेवन भोंवपी विशिश्ट लोकांचेर चड बारीक नदर दवरची पडटली. शस्त्रां सरकारजमा करपाक सांगल्यांत. पूण सगलेच तीं करिनात. म्हणटकच खंयच अनुचीत प्रकार घडचो न्हय, हाची जापसालदारकी गस्त घालपी पुलिसांक घेवची पडटली.
वेंचणुको शांतिकायेन जावच्यो हे खातीर वेंचणूक आयोग, राज्य प्रशासन आपले परीन यत्न करता. ताका पालव दिवप प्रत्येकाची लागणूक. जावं ते मागीर राजकी पक्ष, संघटणां आनी समाज!!
अमूल दूद अमेरिकेंत
अमूल हो डेरी ब्रँड आनी गोंयच्या संबंदाक ह्या मार्चांत 58 वर्सां जालीं. गोंयकार सिल्वेस्टर डा कुन्हा हांणी 1966 वर्सां अटरली बटरली डिलिशियस हे घोशणे सयत अमूलाची जायरात सुरू केल्ली. उपरांत राहूल डा कुन्हान त्यो जायराती केल्यो. अमूलाचे दर सप्तकाक बदलपी फलक एका काळाक गाजिल्ले. आतां अमूल कंपनी अमेरिकेंत दुदाचें उत्पादन व्हरपाची आसा. अमूल चलोवपी गुजरात सहकारी दूद विक्री फेडरेशनान अमेरिकेंतले धावी सगल्यांत व्हडली दूद संस्था मिशिगन दूद उत्पादक संघटणे कडेन भागिदारी केल्या. अमूल 50 देशांनी आपल्या म्हालाची निर्गत करता, पूण दुदाचें ब्रँडींग आनी विक्री अमेरिकेंतूच करपाची ही पयलीच खेप. अमूल कंपनी खातीरूच न्हय, तर भारतीयां खातीर ही अभिमानाची गजाल.
दूद एकठांय करप, प्रक्रिया करप अमेरिकन कंपनी करतली. मात, ताची विक्री, ब्रँडींग अमूलाचें आसतलें. भारतांत मेळटा, तशेंच अमूल दूद सकाळीं अमेरिकेंतल्या कांय राज्यांनी मेळटलें. थंयच्या भारतीय आनी आशियायी लोकांचो आंकडो नदरे मुखार दवरून दोनूय कंपनींनी हो निर्णय घेतला. उपरांत थंयच लोणी, धंय आनी पनीर करून विकपाची येवजण आसा.
आमच्या गोंयांत दुदाच्या मळाचेर व्हडलें पावल उखलपाची संद आसा. कारण हांगां फावोशें दुदाचें उत्पादन जायनाशिल्ल्यान भायल्यान दूद हाडचें पडटा. भायल्यो दूद कंपनीं गोंयकारांच्या जिवाचेर गिरेस्त जाल्यात. गोंयकारांनी हाचेर विचार करुंक फावो.