भांगरभूंय | प्रतिनिधी
इंटरमिटेंट फास्टिंग (Intermittent Fasting) लागून ह्या दिसांनी सगळ्यांचे जिणे पद्दतींत बदल जाला. चड करून सगळ्यांकच वरां वरां एकाच सुवातेर बसून काम करचें पडटा. हाका लागून दुयेंसा वांगडाच लठ्ठपणाय वाडटा. हो लठ्ठपणा उणो करपाक कांय जाण जिमाची निवड करतात जाल्यार कांय जाण डाएट करतात. हातूंत इंटरमिटेंट फास्टिंग हो ट्रेंड ह्या दिसांनी चालू आसा. इंटरमिटेंट फास्टिंग म्हळ्यार चरबी उणी करपा खातीर आनी निरोगी जिणे पद्दती खातीर उपास करप. डाएट सारकोच वजन उणें करपाचो हो एक उपाय. इंटरमिटेंट फास्टिंगाक लागून गोडेंमूत जाल्ल्या दुयेंतीं मदीं इन्सुलिनाची पातळी संतुलित उरता अशें म्हण्टात. पूण, हालींच्या एका अभ्यासांतल्यान धक्को दिवपी म्हायती मेळ्ळ्या. इंटरमिटेंट फास्टिंग केल्यार काळजाच्या आताकान मरण येवपाचो धोको 91 टक्क्यांनी वाडटा अशें ह्या अभ्यासांतल्यान स्पश्ट जालां.
इंटरमिटेंट फास्टिंगांत दिसाच्या कांय थारायल्या वेळार आहार घेवपाक मेळटा. दिसाक फकत आठ ते बारा वरां भितर आहार घेवपाक मेळटा. ह्या वेळा भायर दीसभर उपास करचो पडटा. थारावीक वेळार आहार केल्यार, मागीर कितलेशेच वरां कांयच खावंक मेळना. इंटरमिटेंट फास्टिंगाचे गणित 16/8 अशें आसा. ते प्रमाण दिसांतल्यान 16 वरां जेवणा पसून पयस रावतात आनी उरिल्ल्या 8 वरांतच खावपाक मेळटा.
हालींच सादर केल्ल्या एका अभ्यासांत अमेरिकेच्या डेटाबेसाचेर आदारीत 8 ते 17 वर्सां पिरायेच्या 20 हजार व्यक्तींचेर इंटरमिटेंट फास्टिंग लागून जाल्ल्या परिणामाचो सोद घेतलो. तातूंत जे लोक दर दिसा आठ वरां परस उणें वेळांत आहार घेतात तांका काळजाच्या आताकाक लागून मरण येवपाचो धोको 91 टक्के चड आशिल्ल्याचें दिसून आयलां. ज्या लोकांक पयलींच काळजाचे दुयेंस आशिल्ले तांकां उपास केल्यार काळजाचे दुयेंस आनी स्ट्रोक हाका लागून मरण येवपाचो धोको 66 टक्क्यांनी वाडलो.
इंटरमिटेंट फास्टिंग कोणें आनी कशें करचे?
इंटरमिटेंट फास्टिंग हो सगळ्यां खातीर न्हय अशें जाणकार सांगतात. चड कॅलरीसची गरज आशिल्ल्या 25 वर्सां सकयल्या तरणाट्यांनी आनी गुरवार बायलांनी तो करचो न्हय. तशेंच गोडेंमूत आनी काळजाचे दुयेंस आशिल्ल्या लोकांनी इंटरमिटेंट फास्टिंग करचें न्हय अशें डॉ. बहल सांगतात. आनिकूय एक गरजेचें म्हणल्यार जेवणाचो वेळ दिसांचो आसचो रातच्या वेळार उसरां जेवप भलायकी खातीर बरें न्हय. इंटरमिटेंट फास्टिंग करप्यांनी थारयल्या वेळार जेवप गरजेचें आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
