भांगरभूंय | प्रतिनिधी
नवी दिल्ली, खबरां संस्था ः संयुक्त राष्ट्रांच्या मनीस उदरगत निर्देशांकांत (United Nations Human Development Index) 2022 वर्सा भारताचे क्रमवारीत एका सुवातीन सुदारणा जाल्या. भारत 193 देशां मदीं 135 वयल्यान 134 चेर पावला. 2021 वर्सा ह्या निर्देशांकांत 191 देश आशिल्ले.
लैंगिक असमानता निर्देशांकांत 2022 वर्सा भारताचो क्रमांक 193 देशांतल्यान 0.437 गूण मेळोवन 108 वे सुवातेर आशिल्लो. जाल्यार 2021 वर्सा भारत जीआयआयंत 0.490 गूण मेळोवन 191 देशांतल्यान 122 वे सुवातेर आशिल्लो. जीआयआयच्या आंकडेवारीत 2021 वर्साच्या तुळेंत 14 अंकांनी सुदारणा जाल्या अशें बायला आनी बाल उदरगत मंत्रालयान सांगलां.
पूण देशांतल्या कामगार मळार वांटो घेवपाचें प्रमाणांत बायल आनी दादले मदीं व्हड फरक दिसून येता. बायलांचो वांटो 28.3 टक्के जाल्यार दादल्यांचो वांटो 76.1 टक्के आसा. तांचे मदलो फरक 47.8 टक्के आसा.
युनायटेड नेशन्स डेव्हलपमेंट प्रोग्रामच्या ‘ब्रेकिंग द ग्रिडलॉक: रीइमॅजिनिंग कोऑपरेशन इन अ पोलराइज्ड वर्ल्ड’ ह्या अहवालांत ही आंकडेवारी उजवाडाक आयल्यात. 2022 वर्सा भारतान आयुश्य, शिक्षण आनी वट्ट दरडोई राश्ट्रीय उत्पन्न (जीएनआय) सयत सगळ्या एचडीआय निर्देशकांत सुदारणा केली. हाचे खाला आयुश्य 67.2 वर्सां वयल्यान 67.7 वर्सां मेरेन वाडलां.
भारतांन फाटल्या कांय वर्सानी मनीस उदरगतींत उल्लेखनीय प्रगती केल्या अशें अहवालांत म्हणलां. 1990 सावन जल्माक येतना आयुश्य 9.1 वर्सां, शालेय शिक्षणाची अपेक्षीत वर्सां 4.6 वर्सां आनी सरासरी शालेय शिक्षणाची वर्सां 3.8 वर्सांनी वाडल्या.
भारताचो दरडोई जीएनआय सुमार 287 टक्क्यांनी वाडलां अशें तातूंत म्हणलां. प्रजनन भलायकी मळार भारताची कामगिरी दक्षिण आशियांतल्या हेर देशां परस बरी आसा अशें मंत्रालयान सांगलां. फाटल्या 10 वर्सांत जीआयआयत भारताची क्रमवारी सातत्यान सुदारल्या, ताका लागून देशांत लैंगिक समानताय मेळोवपाचे दिकेन उदरगत जाल्ल्याचे दिसून येता अशेंय मंत्रालयान सांगलें. 2014 वर्सा जीआयआय 127 क्रमांकाचेर आशिल्लो आनी आतां तो 108 क्रमांकार पावलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
