भारतांतली 19.3% भुरगीं झीरो फूड श्रेणींत

भांगरभूंय | प्रतिनिधी

झीरो फूड चिल्ड्रन अहवालांत दावो

नवी दिल्ली, खबरां संस्था ः अमेरिकन मेडिकल असोसिएशनाच्या जर्नल JAMA नेटवर्क ओपनांत 12 फेब्रुवारीक एक संशोधन उजवाडायलां. तातूंत भारतांतल्या 6 ते 23 म्हयन्यांच्या भुरग्यांचो अभ्यास केला. भारतांतलीं 67 लाख (19.3%) भुरगीं झीरो फूड श्रेणीत येतात असो दावो अहवालांत केला. हाचो अर्थ देशांत 67 लाख भुरगीं आसात, जांणी 24 वरांत ना दूद पियेलें, ना खाण खाल्लें.
संवसारांतल्या 92 उण्या आनी मध्यम उत्पन्नाच्या देशांच्या वळेरेंत भारत तिसरो क्रमांकाचेर आसा, असो दावो ह्या अभ्यासांत केला, जंय इतले भुरगे झीरो फूड भुरग्यांच्या श्रेणींत आसात. हातूंत गिनी (21.8%) आनी माली (20.5%) भारताच्या फुडें आसात. थंय परिस्थिती भारता परस वायट आसा.

हार्वर्ड विद्यापिठाचे प्रोफेसर एस व्ही सुब्रमण्यम आनी व्हिजिटिंग सायंटिस्ट रॉकिल किम हांणी हो अभ्यास केला. तांणी 92 देशांतल्या 6 ते 23 म्हयन्यांच्या वट्ट 2 लाख 76 हजार भुरग्यांचेर संशोधन केलां. हाचे खातीर तांणी 2010 ते 2022 मेरेनचो डेटा घेतला, जो वेगवेगळ्या देशांनी जाहीर केला.
प्रोफेसराच्या म्हणण्या प्रमाण, सगल्या 92 देशांतल्या 10.4% भुरगीं झीरो फूड श्रेणीत येतात. मध्य अमेरिकेंतल्या कोस्टा रिका हांगा फकत 0.1% भुरगीं 24 वरां दुद आनी खाणा बगर आसात. 6 ते 23 म्हयने पिराय भुरग्यांचे उदरगती खातीर म्हत्वाची अशें प्रोफेसराचें मत आसा. हे पिरायेचेर तांकां योग्य आहार मेळपाक जाय. ही समस्या अस्तंत आफ्रिका, मध्य आफ्रिका आनी भारतांत चड प्रमाणांत दिसून येता.