भांगरभूंय | प्रतिनिधी
नवी दिल्ली, खबरां संस्था ः भारत हो संवसारांतलो सगळ्यांत व्हडलो शस्त्रां आयात करपी देश थारला. फाटल्या पांच वर्सांत संवसारांतलीं सगळ्यांत चड शस्त्रां विकतीं घेतल्यांत. हाचे भायर आशियां खंडातली शस्त्रां खरेदी करपाच्या मळारय भारत पयल्या सुवातेर आसा.
स्टॉकहोम इंटरनॅशनल पीस रिसर्च इन्स्टिट्यूटनान (सिपरी) सोमारा जाहीर केल्ल्या अहवालांत ही म्हायती उक्ती जाल्या. अहवाला प्रमाण भारताची शस्त्रां खरेदीत पांच वर्सांत 4.7 टक्क्यांनी वाडल्या. भारता वांगडाच जपानांतल्यान आशियांतल्या शस्त्रांची आयात 155% वाडल्या. तेच बरोबर चीनाची शस्त्रांची आयात 44 टक्क्यांनी देंवल्या. जाल्यार पाकिस्तान शस्त्रां आयात करपी मळार पांचवे सुवातेर आसा.
दुसरे वटेन युरोपांतली शस्त्रांची आयात 2014-18 वर्साच्या तुळेंत 2019-23 वर्सा दुपेटीन वाडली. हाचे मुखेल कारण म्हळ्यार रशिया-युक्रेन झुज. युरोपीय राज्यांतल्यान शस्त्रांची आयात 2014-18 वर्सा परस 2019-23 वर्सा 94 टक्क्यांनी चड आशिल्ली. फेब्रुवारी 2022 मेरेन उण्यांत उण्या 30 देशांनी युक्रेनाक लश्करी मजत म्हणून मुखेल शस्त्रां दिली. हाका लागून 2019-23 वर्सा युक्रेन हो सगळ्यांत चड युरोपियन शस्त्र आयात करपी देश आनी संवसारांतलो चवथो व्हडलो शस्त्रां आयात करपी देश थारलो. ह्या काळांत अमेरिकेच्या निर्यातींत 17% वाड जाली. रशियेचे शस्त्र निर्यातींत व्हड प्रमाणांत देंवती कळाव जालो. पयलेच खेपे रशिया शस्त्र निर्यातींत तिसऱ्या क्रमांकाचेर पावला. जाल्यार अमेरिका पयलें सुवातेर आनी फ्रांस दुसरें सुवातेर आसा.
फ्रेंच देशाची शस्त्रांची निर्यात 2014-18 ते 2019-23 ह्या काळांत 47 टक्क्यांनी वाडली. फ्रेंच देशाच्या शस्त्रांचो सगळ्यांत चड खरेदीदार भारत आशिल्लो जातूत वट्ट निर्यातींतलो 30% वांटो आशिल्लो. सध्या रशिया युक्रेना कडेन झुजांत घुस्पला आनी ताची शस्त्रांची निर्यात खूब उणी जाल्या. 2014-18 ते 2019-23 ह्या काळांत रशियेची शस्त्र निर्यात 53 टक्क्यांनी देंवली. 2019 वर्सा ताणें 31 देशांक शस्त्रां विकली, जाल्यार 2013 वर्सा फकत 12 देशांनी शस्त्रां विकतीं घेतलीं. भारतान रशिये कडल्यान 34% शस्त्रां विकतीं घेतलीं
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
