भांगरभूंय | प्रतिनिधी
हालींची जीण खूब व्यस्त आनी धावपळींची जाल्या. आनी हे व्यस्त जिणेंत जायतीं जाणां स्वताचे भलायके कडेन दुर्लक्ष करतात. दुयेंसा पसून पयस रावपाक जाय तर बरी आनी निरोगी जिणे पद्धत गरजेची. दरेक बायलेन वेळार भलायकी तपासणी करप तितलेंच म्हत्वाचें. पिराय वाडत वता तशी रोगप्रतिकार शक्त, कुडीच्या अवयवांची कार्यक्षमताय उणी जावंक लागता. चड कोलेस्टेरॉल, स्तन आनी गर्भाशयाचो कॅन्सर आनी हेर जायत्या तरांच्या दुयेंसांचोय धोको वाडटा. भलायकेन बरे उरपा खातीर वैजकी सल्लो घेवप आनी कांय चांचण्यो करप गरजेचें. पिरायेच्या 30- 40 वर्सांत काळजाचे दुयेंस, गोडेंमूत, उच्च रक्तदाब, स्थूलताय, कॅन्सर अशें जिणे पध्दतीक संबंदीत दुयेंस जावपाची शक्यताय आसता. देखून दरेक बायलेन 30 पिराये उपरांत कांय चांचण्यो करच्यो. अशे तरेन दुयेंसांची जाणविकाय वेळार जाता आनी ताचेर उपचारूय करप सोंपें जाता.
वर्सातल्यान एकदा तरी ‘ह्यो’ चांचण्यो करप गरजेच्यो…
१. थायरॉयड चांचणी
जायत्या बायलांक थायरॉयड जावपाचो धोको आसता. 30 वर्सां वयर आशिल्ल्या बायलांनी थायरॉयडाची चांचणी करची. अचकीत मासिक पाळी येवप, अचकीत वजन वाडप, केंस वचप वा वांझपण हीं ताची सामान्य लक्षणां. ते खातीर रगत तपासणे वरवीं टी 3, टी 4 आनी टीएसएच हांचें प्रमाण दिसता. थायरॉयडाचें वेळार उपचार करप गरजेचें.
२. पॅप स्मीअर
पॅप स्मीअर चांचणी ही एक स्क्रीनिंग टेस्ट आसा. चड करून गर्भाशयाच्या कॅन्सरा खातीर ताचो उपेग करतात. पॅप स्मीअर केल्यार गर्भाशयाच्या लागसारच्या पेशींत खंयचेय अनपेक्षीत बदल जाल्या तें वेळार कळूंक शकतात जाचेर वेळार उपचार करूं येतात. पिरायेच्या 30 वर्सां सावन बायलांनी दर पांच ते धा वर्सांनी गर्भाशयाच्या कॅन्सराची तपासणी करची.
३. एसटीडी (Sexually Transmitted Diseases) चांचणी
तुमी एका परस चड जोडीदारा बरोबर शारिरीक संबंद दवरतात वा जी बायलां गुरवार जावपाची येवजण करता तांणी ही चांचणी नक्कीच करची. ताका लागून तुमकां लिंगीक दुयेंस जाल्ल्याची पारख जाता.
४. रगतदाबाची चांचणी
30 वर्सां उपरांत बायलांक रगतदाबा संबंदीत समस्या वाडपाक लागल्यात. उच्च रगतदाब हो काळजाच्या दुयेंसांचो धोको आशिल्ल्याचो संकेत. देखून बायलांनी वेळार रगतदाबाची चांचणी करची.
५. स्तनाची तपासणी
दरेक बायलेन स्तनाच्या कॅन्सराची तपासणी करची. बायलांचे स्तनाच्या कॅन्सराची तपासणी करपा खातीर स्वताचे स्तनाची तपासणी आनी मॅमोग्रामचो (स्तनांचे एक्स-रे) वापर करतात. स्तनांत गांठ आसल्यार वा स्तनाच्या कॅन्सराचीं सुरवातीचीं खंयचींय लक्षणां आसल्यार ह्या तपासणी वरवीं वळखूंक शकतात. हाची वेळार लक्षणां दिसल्यार उपचार करपय सोंपें जाता.
६. लिपिड प्रोफायल
लिपिड प्रोफायल चांचणेंत रगतांतल्या कांय चरबीच्या रेणूचें प्रमाण मेजतात. हे चांचणेंत जायते प्रकारचे कोलेस्टेरॉल सोदून काडूंक मेळटा. ही चांचणी काळजाची आनी रगत पेशींची भलायकी तपासपाक मजत करता. लिपिड प्रोफायलाचो तपासल्यार खावपाची संवय, आहार, ताण, व्यायाम आनी जिणे पद्धत सुदारूं येता.
७. गोडेंमूत
ह्या दिसांनी गोडेंमूत हो एक सामान्य दुयेंस जाला. संवसारांतले जायतीं जाणां ह्या दुयेंसाक लागून त्रासांत आसात. 35 वर्सां वयर आशिल्ल्या बायलांनी प्री-डायबिटीज वा गोडेंमूत तपासपाक दर तीन वर्सांनी रगतांतल्या ग्लुकोजाची चांचणी करची. बायल जाड आसल्यार वा गोडेंमूताची आनुवंशिक फाटभूंय आसल्यार बेगीन तपासणी करप गरजेचें आसा. काळजाचे दुयेंस, उणी नदर आनी मूत्रपिंडाचे दुयेंस अशे गंभीर दीर्घकाळ भलायकी समस्या आडावपा खातीर तुमच्या रगतांतल्या साकरेच्या प्रमाणाचेर नियंत्रण दवरप म्हत्वाचें.
८. जीवनसत्व ड चांचणी
बायलांची पिराय वाडत वता तशी तांच्या कुडींत जीवनसत्व ड ची उणीव जाता. ताका लागून जायत्या दुयेंसांचो धोको वाडटा. बायलांक हीं पोशक तत्वां खूब म्हत्वाचीं. हे चांचणेंतल्यान रगतांतल्या व्हिटॅमिन ड चें प्रमाण कळटा. हाडां आनी दांत, तशेंच रोगप्रतिकार शक्त निरोगी दवरपाखातीर जीवनसत्त्व ड म्हत्वाचें.
९. हाडांची तपासणी करप
ऑस्टिओपोरोसिस हो दुयेंस संवसारभरांतल्या बायलांनी व्हड प्रमाणांत मेळटा. ऑस्टिओपोरोसिस हो एक हाडांचो दुयेंस आसून तातूंत हाडां दुबळी जातात. ऑस्टिओपोरोसिस स्थितींत हाडांची तांक उणी जाता आनी ल्हान जखम वा पडल्या उपरांत हांडा फ्रॅक्चर जावपाची शक्यताय आसता. देखून चाळीशी उपरांत हाडांची नेमान तपासणी करप गरजेचें.
१०. थॅलेसेमिया चांचणी
आयज लेगीत चडशा बायलांक थॅलेसीमिया दुयेंसा विशीं म्हायती ना. थॅलेसीमिया हो आनुवंशिक दुयेंस जो पालकांतल्यान भुरग्यां मदीं वता. जर आवय-बापूय दोगांकय थॅलेसीमिया आसल्यार भुरग्याक थॅलेसीमिया जावपाची चड शक्यताय आसता. देखून थॅलेसीमिया आनी हेर हिमोग्लोबिनोपॅथी आनी लैंगिक संसर्गजन्य दुयेंसा सारकिल्ल्या रगताक लागून जावपी विकारांची रगत तपासणी करप गरजेची. थॅलेसीमियाची चांचणी गुरवारपणांत वा भुरगें जल्माक आयल्या उपरांत करतात. हे खातीर रगत तपासणी खंयच्याय वेळार करूं येता.
११. ईसीजी
फाटल्या कांय वर्सांत बदलत्या जिणे पध्दती सयत वेगवेगळ्या कारणांक लागून काळजाच्या दुयेंसांचें प्रमाण वाडलां. काळजा संबंदीत दुयेंसांक लागून जिवाक धोको निर्माण जावं येता. काळजाचो आताक हें मरणाचे मुखेल कारण. काळीज सारकें काम करता काय ना तें पळोवपाखातीर ईसीजी चांचणी करप गरजेचें आसा.
बायलांची पिराय वाडत वता तशें तांच्या कुडींत कांय बदल जावंक लागतात. दरेक बायलेन आपल्या आहाराचेर खासा लक्ष दिवचें. देखून ताण वेवस्थापनाचेर लक्ष केंद्रीत करचें. नेमान व्यायाम करचो, बरी न्हीद घेवची आनी भलायकेची जतनाय घेवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
