जीवनसत्व बी 3 चें चड प्रमाणांत सेवन केल्यार काळजाचें दुयेंस वाडूंक शकता

भांगरभूंय | प्रतिनिधी

सध्याचे व्यस्त जिणे पद्दतींत, असंतुलीत आहार आनी शारिरीक हालचाली उण्या प्रमाणांत आशिल्ल्यान कुडींत पोशक तत्वांचो उणाव जाता. हाका लागून जायते जाणांक थकवो येवप, दुबळेपण आनी सुस्तताय ह्यो समस्या जातात. अशें परिस्थितींत स्वताक सक्रीय दवरपा खातीर जायते जाण विचार करिनासतना बाजारांत मेळपी जीवनसत्त्वांच्यो गुळयो घेतात. पूण, दोतोराच्या सल्ल्या बगर मल्टीविटामिन गुळयो वा सप्लिमेंट्स वखदां घेवप कुडीक हानीकारक थारूंक शकता.
नव्या एका संशोधनांतल्यान दिसून आयलां की जीवनसत्व बी 3 वा नियासीन चड प्रमाणांत घेतल्यार रगतपेशींचें लुकसाण जावन आनी दाह जावन काळजाच्या दुयेंसांचो धोको वाडूंक शकता. हाचो अर्थ असो न्हय की मांस, नुस्तें, कड्डणां आनी ब्रेड ह्या खाणापसून मेळिल्ल्या जीवनसत्व बी 3 खातीर हो धोको वाडूं येता. पूण जीवनसत्व बी 3 सप्लिमेंटचे चड प्रमाणांत सेवन केल्यार समस्या निर्माण जावंक शकतात. देखून जर तुमी 1000 मिग्रामाचे जीवनसत्व बी 3 सप्लिमेंट्स घेतात जाल्यार आतांच बंद करचें.

जीवनसत्व बी 3 कितलें प्रमाणांत गरजेचें?

भलायकी तज्ञ म्हणटात, 18 वर्सां वयर आशिल्ल्या दादल्यांक दिसाक 16 मिग्रॅ जीवनसत्व बी 3 आनी बायलांक 14 मिग्रॅ जीवनसत्व बी 3, जाल्यार गुरवार बायलांक 18 मिग्रॅ जीवनसत्व आसप गरजेचें. तुमी जीवनसत्व बी 3 सप्लिमेंट्स घेतात जाल्यार दोतोराचो सल्लो घेवपाची गरज आसा.
पोटाच्या बरे भलायके खातीर जीवनसत्व बी 3 खूब म्हत्वाचें मानतात. बी 3 जीवनसत्वाक निकोटीनिक ॲसिड अशेंय म्हण्टात. पूण तें चड प्रमाणांत घेतल्यार काळजाच्या दुयेंसांचो धोको वाडूंक शकता.

आमकां जीवनसत्व बी 3 सप्लिमेंटची गरज कित्याक?

पचन प्रक्रिये खातीर हें जीवनसत्व खूब म्हत्वाचें अशें भलायकी तज्ञ सांगतात. जीवनसत्व बी 3 अन्न उर्जेंत रुपांतरीत करपाचें काम करता. पोट आनी पचन क्रिया ह्या दोनूय प्रकारांक हें गरजेचें आसा. अशे परिस्थितींत तुमी जीवनसत्व बी 3 भरपूर आशिल्ली खाणांचो तुमच्या आहारांत आस्पाव करात.

जीवनसत्व बी 3 काळजाच्या दुयेंसांचो धोको कसो वाडयता?

नियासिनाक लागून दाह जाता अशें अभ्यासांतल्यान दिसून आयलां. हाका लागून शीर अशीर जातात आनी प्लेक्साची वाड नेटान जाता आनी ब्लॉकेजेस जाता ताका लागून काळजाचो आताक येता.

कोलेस्टेरॉल आशिल्ल्यांनी कितें करचें?

कोलेस्टेरॉल वाडल्यार काळजाचे दुयेंस जावंक शकतात. कोलेस्टेरॉल चड आशिल्ल्यान शीर ब्लॉक जाता, जाका लागून काळजाक रगताची पुरवण जावंक पावना. अशा वेळार काळजाचो आताक येवपाची शक्यताय आसता. देखून कोलेस्टेरॉल वाडचें न्हय म्हूण वेळार जतनाय घेवची. अशा लोकांनी आहार आनी व्यायामाचेर भर दिवन तें नेमान करचें.