भांगरभूंय | प्रतिनिधी
एक काळ आशिल्लो, वळखीचो कोण मेळ्ळ्यार ताका आमचे बँकेंत (थळाव्यो बँको, पतसंस्था न्हय!) कामाक येता काय म्हूण विचारताले. सरकारी नोकरीय सोंपेपणी मेळटाली. रोजगार विनिमय केंद्रांत नांव नोंद केलें काय नोकरेचे काॅल येतालेच. मागीर काळ बदल्लो आनी सगलेंच बदल्लें. फाटल्या 25 – 30 वर्सांच्या काळांत तर सरकारी नोकरे खातीर वशिलो लावपाची पद्दत रुढ जाली. नोकरी मेळोवपाक सुटकेस पावोवची पडटा, अशे लोक उक्तेपणी उलोवपाक लागले. गुण कितलेय आसूं, वशिलो, वळख आसा तांकांच सहज नोकरी मेळपाक लागली. ताका लागून कांय लोकप्रतिनिधी ‘लोकप्रीय’ जाले. परत – परत वेंचून येवपाक लागले. सरकारी नोकऱ्यो, कंत्राटां वांटून घेवपाचे प्रकार जाले. खुद्द मंत्री, आमदारांनीय एकमेकांचेर ते विशीं जाहीर आरोप केले. मात, आतां हे वशिलेबाजीक पूर्णविराम मेळटलो, अशी आस्त. कारण, हाचे मुखार राज्य कर्मचारी भरती आयोगा वरवीं सरकारी पदां भरतले. ताची सुरवात जाल्या. आयतारा संगणकाचेर आदारीत परिक्षा (सीबीटी) जाली आनी 24 वरां भितर निकाल लागलो. कन्झर्व्हेशन असिस्टंट, वायरलेस ऑपरेटर, लायट हावस कीपर, लॅब टेक्निशीयन आनी टेक्निशियन, चित्रकला शिक्षक ह्या पदां खातीर 1,273 उमेदवारांनी ऑनलायन पद्दतीन अर्ज सादर केल्ले. तातूंतले 984 जाण परिक्षेक बसले. तांकां आपूण परिक्षेंत पास जालों, हें रोखडेच कळ्ळें. कितले गुण पडल्यात तेंय पळोवपाक मेळ्ळें. आतां संबंदीत पदां खातीर फुडली प्रक्रिया सुरू जातली. परिक्षे सारकी तीय पारदर्शक आसची. लोकसभा वेंचणूक जाहीर जावचे पयलीं हें जाल्यार बरें.
आदल्या तेंपार परिक्षा जाताल्योच अशें ना. बँकांनी भरती जाताली तेन्ना त्यो जाताल्यो. मात तातूंत कोण पास जाल्यात, नापास जाल्यात, कोणाक नोकरी मेळ्ळ्या तें कळनाशिल्लें. एकाच घरांतले 2-2 जाण राष्ट्रीयिकृत बँकांनी लागिल्ल्याचीं उदाहरणां आसात. सरकारी नोकरीय कोणाक मेळ्ळी तें कार्यालयांत वतकच कळटालें. 1980 उपरांत गोंयांत सगलेंच बदलत गेलें. साबार सरकारां आयलीं, गेलीं. भ्रश्टाचाराचेय आरोप, प्रत्यारोप जाले. रोजगार मळूय, खास करून सरकारी नोकऱ्यांचें, बदल्लें. गोंय कामगार भरती सोसायटी, गोंय मनीसबळ उदरगत म्हामंडळा वतीनूय नोकर भरती जाताली. ताचेर विरोधकांचे आरोपूय जाल्ले. मात हाचे मुखार राज्य कर्मचारी भरती आयोगा वतीन उमेदवारांची निवड जातली. ताका लागून लोकप्रतिनिधींक आपल्या वशिल्याचे उमेदवार वेंचपाक मेळचे नात. हालींच्या वर्सांनी सरकारी नोकऱ्यां खातीर घेतिल्ल्या परिक्षांचे निकाल 2- 2 वर्सां लागूंक नाशिल्ले. ताका लागून सरकारी नोकरेची वाट पळोवपी जायत्या जाणांक निरशेणी आयिल्ली. मात हाचे मुखार तशें जावचें ना, ही बरी गजाल. परिक्षा प्रक्रिया पारदर्शक जाल्ल्यान उमेदवारांक हाचो फायदो जातलो. नोकरी मेळ मेरेनची फुडली प्रक्रियाय अशीच जावंची. कांय वर्सां पयलीं शिक्षक भरती वेळार चड गुण मेळिल्ल्या कांय उमेदवारांक उपरांत कुशीक दवरले असो आरोप जाल्लो, पुलीस भरतीचेरुय दुबाव व्यक्त जाल्लो. हे दीस परतून येवचे न्हय. प्रामाणीक, पात्र उमेदवारांचेर अन्याय जावचो न्हय. आयोगा वरवीं भरती करपाचो मुख्यमंत्री डाॅ. प्रमोद सावंत हांणी घेतिल्ल्या ह्या निर्णया तांच्या सगल्या वांगड्यांनी, उमेदवारांनीय तेंको दिवपाक जाय. आयोगाची ही पयलीच परिक्षा. पदांच्यो दोन जायराती उजवाडाक आयल्यात. उरिल्ल्यो रोखड्योच येतल्यो आनी मेगा भरती वरवीं नोकऱ्यो दिवपाचो यत्न जातलो, अशें जाहीर जालां. लायक आसात, त्या उमेदवारांक नोकरेंत रोखडेच कायमूय केल्यार बरें.
हाचे मुखारुय परिक्षा जातल्यो, तेन्ना गोंयकार तरणाट्यांनी लक्ष दवरपाक जाय. कांय जाणांक हें दुसऱ्यान सांगचें पडटा. पंचायत, पालिकांनी हे विशीं फुडाकार घेतल्यार बरो. फकत सरकारीच न्हय, तर राज्या भायरुय विवीध मळांचेर गोंयकारांनी यत्न करपाक जाय. देशांत गुणवत्तेचो उणाव ना. गांवगिऱ्या वाठारांतले गुणवत्तेक उर्बा दिवपाची गरज आसा, अशें इस्रोचे अध्यक्ष डाॅ. एस. सोमनाथ हांणी हालींच पणजे विज्ञान परिशदेंत म्हणलें. तेन्ना गांवांतल्या तरणाट्यांनीय लोकप्रतिनिधींचे हुंबरे झरोवचे परस स्पर्धा परिक्षा, गोंय राज्य कर्मचारी भरती आयोगाच्यो परिक्षा, सामान्य ज्ञान….. हांची तयारी करची. मुलाखत कशी दिवची, हाचोय अभ्यास करचो. राज्य सरकाराच्यो नोकऱ्यो खरें म्हणल्यार गुणवत्ता, गुणवत्ता आनी गुणवत्तेच्याच निकशाचेर मेळपाक जाय. हाचो फायदो प्रशासनाक जातलो. तें चड प्रामाणीकपणान, बरे तरेन चलतलें…. आनी गोंय उदरगतीच्या मळार आनीक नेटान मुखार वतलें!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
