भांगरभूंय | प्रतिनिधी
हालींच्या तेंपार गोंयांत जायत्यो कार्यावळी जातात, ज्यो करियराचे नदरेन म्हत्वाच्यो आसात. कांय दिसां पयलीं आमी मायभास दीस, शिवजयंती मनयली. तिका व्हडलो प्रतिससाद मेळ्ळो. एके कार्यावळींत मुख्यमंत्री दो. प्रमोद सावंत हांणी शिवाजी महाराजांचे विचार नवे पिळगे मेरेन पावोवपाचे यत्न करपाक जाय, अशें आवाहन जमिल्ल्यांक केलें. पूण मनांत आयलें हें कार्य करतलो कोण? नवी पिळगी चडशी आसता शाळा, काॅलेजांनी. म्हणटकच थंय त्यो कार्यावळी दवरच्यो पडल्यो. पूण, तांकां कामां भरपूर. खेरीज उलोवपाचें काम करतलो कोण? उलोवपी हाडलो जाल्यार ताका खर्च करपाक जाय, तो करतलो कोण? अशे जायते प्रस्न उपस्थित जातात. म्हूण हांवेंच अश्यो कार्यावळ करपाचें थारायलां. पळोवया कितलो प्रतिसाद मेळटा तो. सांगपाचें म्हणल्यार म्हापुरुसांच्यो जायत्यो गजाली आमकां प्रेरणा दिवंक शकतात. पूण त्यो आयकून, वाचून आमी प्रत्यक्ष कृतींत हाडपाक जाय. अर्थांत ताचे खातीर वाचन करून त्यो गजाली जाणून घेवपाक जाय.
जर तुमीं वाचलें ना वा आयकलें ना जाल्यार गैरसमज पातळटात. एक व्हडली गैरसमजूत आसा, ती म्हणल्यार शिवाजी महाराज आनी गोंयचो संबंद कितें? तर एखादो इतिहास तज्ञ हें तुमकां सांगूं शकता वा तुमी जर अभ्यास केलो, तर कळूं शकता. पूण तुमी वाचपाक जाय. इंटरनेटाचेर ही सगली म्हायती मेळटा. शिवाजी महाराज जांव वा सुटके झुजारी, तांणी जिवाची पर्वा करीनासतना ह्या होमखणांत उडकी मारली. म्हणून आमी जगपाक शकतात. तुमकां जर इतिहास विशय आसा जाल्यार तुमचे शिक्षण हाचेर चड सांगू शकतले. हो तुमच्या करियराचो विशय जावं शकता.
दुसरी कार्यावळ म्हणल्यार विज्ञान महोत्सव . नगरगांवां जावपी कृशी महोत्सव तशेंच कुशलटाय विकास फांट्या वतीन आयोजित केल्लो मुफत अभ्यासक्रम तुमकां शिकपाचो आसा जाल्यार ते खातीर तुमी 8 मार्च मेरेन अर्ज करपाक जाय. ह्या अभ्यासक्रमांत तुमकां थ्री डी डिझायनींग, थ्री डी पेंटींग, पीएलसी बोन्साय, शिंवपाचें तंत्रगिन्यान, ब्युटिशियन सारके आठ अभ्यासक्रम शिकपाक मेळटले. हे तुमकां मुख्यमंत्री कुशळटाय पथ येवजणे सकयल शिकयतले. हालींच म्हापश्या पालयेकार ट्रस्ट आनी गोंय सरकाराच्या कला, संस्कृती फांट्यान एक संगिताची कार्यावळ सादर केली. तिचें मुख्य आकर्शण आशिल्लें भजनसम्राट म्हूण देशभर नामना आशिल्ले गायक अनुप जलोठा. हेर गायक, गायिकाय आसल्यो. पूण जलोठा हांच्या आवाजांत गाजिल्लीं देवाचीं भजनां आयकप हो वेगळो अणभव आशिल्लो. तांणी पेटयेचे मजतीन केल्लें गायन त्या फांट्यांत करियर करप्याक आकर्शित करपाक शकता. पेटयेची तांचीं बोटां फिरतालीं ताका तुमी जादूच म्हणटले. अर्थांत हें सगलें अभ्यासान, सरावान शक्य जावं येता. जितलो तुमचो अभ्यास, मेहनत चड तितलें तुमकां बरें फळ. परिक्षेक लेगीत हीच संवय उपेगाक पडटा, हें वेगळें सांगपाक नाका.
हालींच आमी विज्ञानदीस सगले कडेन मनयलो. बुधवाराय मनोवपाचे आसात. हो विज्ञान फांटो करियरा खातीर सामको म्हत्वाचो. देखून अश्यो कार्यावळी तुमी चुकोवंक फावना. एक व्हडली कार्यावळ गोंय विज्ञान केंद्रांत हे मजगतीं जाली. प्रदर्शनूच आशिल्ले. जें तुमकां ह्या फांट्यांत येवपाक आकर्शित करपाक शकतलें, हातूंत दुबाव ना. भारताकूच न्हय, तर पुराय संवसाराक संशोधकांची गरज आसा. इतले प्रस्न निर्माण जाल्यात. ते सोडोवपाची तांक विज्ञानांत चड आसा.
तुमकां खबर आसतलीच, गोंयांत धावे मेरेन रोबोटिक्स कोडिंग हो म्हत्वाचो विशय फुडल्या वर्सा सावन सुरू जावपाचो आसा. तो सुरू करपी अख्ख्या देशांतलें गोंय हें पयलें राज्य. हाचो लाव घेवन जंय मनशाक चड भिरांत आसा, त्या सुवातीं वयलीं कामां रोबिटिक्स तंत्रगिन्यान आमी कशें वापरूं शकतात, हाच विचार विद्यार्थ्यांनी करचो आनी तशें संशोधन मुखार हाडचें. हें तशें कठीण न्हय हें संगणक वापरप्यांक खबर आसतली. कृत्रिम बुद्धीमत्ता (एआय) हो विशय हालीं लोकप्रीय जालाच. तो खंय विचारिल्ल्या प्रस्नांची जाप कांय सेकंदां भितर मुखार दवरता. घे म्हूण म्हायती. जाय तितली घेवची. ताका लागून तुमी समस्यांचेर उपाय काडपाक शकतात, हातूंत अजाप ना.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
