संवसारांतलो सगळ्यांत व्हडलो सोरोप

भांगरभूंय | प्रतिनिधी

आमी सगळ्यांनी जायत्या प्रकारचे वेगवेगळे ल्हान, व्हड सोरोप पळयल्यात. पूण आतां संवसारांतलो सगळ्यांत व्हडलो तशेंच वजनान जड आशिल्ल्या सोरोपाचो सोद अ‍ॅमेझॉनांतल्या रानांत शास्त्रज्ञांनी लायलो. ग्रीन ॲनाकोंडा (Green Anaconda) अशें ह्या सोरोपाचे नांव जावन आसा.
ग्रीन अॅनाकोंडा हो संवसारांतलो सगळ्यांत धोक्याचो सोरोप. संवसारांतल्या सगळ्यांत लांब सोरपांमदीं ताची गणना जाता. मेळिल्ल्या ग्रीन अॅनाकोंडाची तकली मनशाचे तकले इतली व्हड आसा. ताची लांबाय 26 फूट आनी वजन 250 किल इतलें आसा. अॅनाकोंडा जरी व्हड आसलो तरी तो सवकास हालचाली करता. पूण प्रत्यक्षांत तो चपळ आसा. सावजाचे कुडीक वेटाळो घालून ताचो श्वास घेवपाची शक्त तो नश्ट करता आनी उपरांत सावजाक पुराय गिळटा.

उत्तर आनी दक्षिणे कडले ग्रीन अॅनाकोंडा 10 दशलक्ष वर्सां आदीं वेगळे जाल्ले. मागीर खंयचे व्हडलें? हाचो सोद चालू आशिल्लो. तो सोदपा खातीर शास्त्रज्ञांनी अॅमेझॉन रानांत सोद घेवपाक सुरवात केली. अॅनाकोंडाच्यो चार जाती आसात. तातूंतलो ग्रीन अॅनाकोंडा सगळ्यांत व्हडलो. तो आपलें पुराय जिवीत उदकांत सारता. तांचे नाकपुडयो आनी दोळे तकलेचे वयल्या वटेन आसतात. ताका लागून उदका पोंदा आसतना लेगीत ताका सावज पळोवंक मेळटा.
ग्रीन अॅनाकोंडा ऑलिव्ह पाचवें रंगाचे आसतात. ताच्या आंगाचेर व्हड काळे दाग आसतात. ऍमेझॉन आनी ओरिनोको वाठारांत हें मेळटात. ताची हल्लो करपाची पद्दत, पांशियेस आनी गती हाका लागून ताका सगळ्यांत धोक्याचो जनावर मानतात. तो एकाच वेळार कॅपीबारा, मानगें, हरण, ल्हान गाय ह्या जनावरांक गिळूंक शकता. हो सोरोप विखारी न्हय. पूण तो आपल्या सावजांक खाता. तांकां नेटान दाबल्यार तांचीं सगळीं हाडां मोडटात. तांची स्वास घेवपाची तांक सोंपता आनी मागीर तांका तो गिळटा.